రోడ్డు ప్రమాదంలో తండ్రి మృతి, చిన్నారికి గాయాలు
Andhra Pradesh Telugu | Suryaa Desk | Published : Sat, Oct 14, 2023, 12:39 PM
విజయనగరం జిల్లా, లక్కవరపుకోట మండలంలో రోడ్డు ప్రమాదం చోటు చేసుకుంది. వివరాల్లోకి వెళ్ళితే.... కొత్తవలస మండలం చీడివలస గ్రామానికి చెందిన సుధా రాము(40) కూలి పనులు చేసుకుంటూ జీవనం సాగిస్తున్నాడు. ఇతనికి కుమార్తె, కుమారుడు కాగా కుమార్తె జ్యోత్స్న జమ్మాదేవిపేట వద్ద మహాత్మా జ్యోతిబాపూలే పాఠశాలలో 5వతరగతి చదువుతోంది. ఈ క్రమంలో దసరా సెలవుల కారణంగా కుమార్తెను ఇంటికి తీసుకువచ్చేందుకు శుక్రవారం సాయంత్రం రాము ద్విచక్రవాహనంపై జమ్మాదేవిపేటకు బయలుదేరాడు. పాఠశాల నుంచి తన కుమార్తెను తీసుకుని స్వగ్రామానికి వెళ్తుండగా జమ్మాదేవిపేట గ్రామం వద్ద ఎదురుగా వస్తున్న లారీ వీరి ద్విచక్రవాహనాన్ని బలంగా ఢీకొంది. ఈ ఘటనలో గాయపడిన రాము, జ్యోత్స్నను స్థానికులు వెంటనే ఎస్‌కోట పీహెచ్‌సీకి తరలించగా అప్పటికే రాము మృతి చెందాడని వైద్యులు తెలిపారు. స్వల్ప గాయాలైన జ్యోత్స్న ప్రస్తుతం ఒక ప్రైవేటు ఆసుపత్రిలో చికిత్స పొందుతుంది. ఘటనపై కేసు నమోదు చేసి దర్యాప్తు చేస్తున్నామని పోలీసులు తెలిపారు.
|
|