మైనర్ బాలికతో లైంగిక చర్యల్లో పాల్గొన్న యువకుడు,,,,పోక్సో చట్టం కింద 20 ఏళ్లు జైలు శిక్ష

కౌమారదశలో ఉన్న అమ్మాయిలు, అబ్బాయిలు తమ లైంగిక కోరికలను నియంత్రించుకోవాలని కలకత్తా హైకోర్టు సూచించింది. అంతేకాదు, ఇతర లింగవర్గాల గౌరవం, శారీరక స్వయంప్రతిపత్తిని కూడా గౌరవించాలని పేర్కొంటూ మార్గదర్శకాలను జారీ చేసింది. అత్యాచారం కేసులో జైలు శిక్ష పడిన యువకుడి పిటిషన్ విచారణ సందర్బంగా కలకత్తా హైకోర్టు పై విధంగా స్పందించింది. మైనర్ అయిన తన ప్రియురాలితో సెక్స్‌లో పాల్గొన్నందుకు గతేడాది యువకుడికి సెషన్స్ కోర్టు 20 ఏళ్ల జైలు శిక్ష విధించింది. పోక్సో చట్టం ప్రకారం మైనర్ బాలికతో శృంగారంలో పాల్గొనడాన్ని అత్యాచారంగా పరిగణించింది. దీంతో సెషన్స్ కోర్టు వేసిన శిక్షను రద్దుచేయాలని కోరుతూ అతడు హైకోర్టును ఆశ్రయించాడు. ఈ పిటిషన్‌పై విచారణ సందర్భంగా... తాను సమ్మతితోనే లైంగిక చర్యలో పాల్గొన్నానని, తర్వాత అతడ్ని వివాహం చేసుకున్నట్లు కోర్టుకు తెలిపింది. కాగా, దేశంలో శృంగారానికి సమ్మతి వయసు 18 ఏళ్లు అని, తమ సంబంధం నేరమని ఆమె అంగీకరించింది. పోక్సో చట్టం ప్రకారం 18 ఏళ్లలోపు బాలిక సమ్మతితో లైంగిక చర్యల్లో పాల్గొన్నా చెల్లుబాటుగా పరిగణించరు. ఇది అత్యాచారం అవుతుంది.

యువకుడి అభ్యర్థనపై సానుకూలంగా స్పందించిన జస్టిస్ చిత్త రంజన్ దాస్, జస్టిస్ పార్థ సారథి సేన్‌లతో కూడిన ద్విసభ్య ధర్మాసనం సెషన్స్ కోర్టు తీర్పును పక్కన పెట్టింది. చిన్న వయస్సులో లైంగిక సంబంధాల వల్ల తలెత్తే చట్టపరమైన సమస్యలను నివారించడానికి పాఠశాలల్లో సమగ్ర లైంగిక విద్యను అందించాలని స్పష్టం చేసింది. కౌమారదశలో ఉన్నవారిలో సెక్స్ అనేది సాధారణమైనదని, అయితే అలాంటి కోరికను ప్రేరేపించడం అనేది వ్యక్తి లేదా స్త్రీ లేదా పురుషుల చర్యపై ఆధారపడి ఉంటుందని ధర్మాసనం పేర్కొంది. బాలికలు తమ లైంగిక కోరికలను నియంత్రించుకోవాలని, రెండు నిమిషాల ఆనందానికి లొంగపోవద్దని కోర్టు సూచించింది.

‘లైంగిక కోరికలు లేదా ఉద్రేకాలను నియంత్రించుకోవాలి.. కేవలం రెండు నిమిషాల లైంగిక ఆనందాన్ని ఆస్వాదించడానికి లొంగిపోతే సమాజం దృష్టిలో ఆమె చిన్నచూపునకు గురువుతారు’ అని ధర్మాసనం వ్యాఖ్యానించింది. తన శరీర సమగ్రత, గౌరవం, స్వీయ-విలువ హక్కును రక్షించడం యువతుల కర్తవ్యమని బెంచ్ పేర్కొంది. అబ్బాయిలు.. అమ్మాయిల గౌరవాన్ని కాపాడాలని, మహిళలను గౌరవించేలా వారి మనసులను తీర్చిదిద్దుకోవాలని హితవు పలికింది. ‘ఒక యువతి లేదా స్త్రీ పేర్కొన్న విధులను గౌరవించడం కౌమారదశలో ఉన్న అబ్బాయిల కర్తవ్యం.. ఒక స్త్రీ, ఆమె స్వీయ-విలువను, ఆమె గౌరవాన్ని, గోప్యతను, ఆమె శరీర స్వయంప్రతిపత్తిని గౌరవించేలా అబ్బాయిలు తన మనస్సుకు శిక్షణ ఇవ్వాలి’ అని హైకోర్టు అభిప్రాయపడింది.