తిరుమలలో తెరుచుకున్న శ్రీవారి ఆలయం తలుపులు.. మళ్లీ దర్శనాలు ప్రారంభం

తిరుమల శ్రీవారి ఆలయం తలుపులు తెరుచుకున్నాయి. ఆదివారం తెల్లవారుజాము 3:15 గంటలకు టీటీడీ అధికారులు స్వామివారి ఆలయం తలుపులు తెరిచారు. పాక్షిక చంద్రగ్రహణం అనంతరం ఆలయాన్ని శుద్ధిచేసి.. ఉద‌యం 6 గంట‌ల నుండి భ‌క్తుల‌ను స‌ర్వ‌ద‌ర్శ‌నానికి అనుమతి ఇచ్చారు. శ్రీవారి ఆలయం దాదాపు 8 గంటల పాటూ మూతపడింది. శనివారం రాత్రి 7.05 గంటలలకు తలుపులు మూసిన సంగతి తెలిసిందే. ఆదివారం తెల్లవారుజామున 1.05 నుంచి 2.22 గంటల మధ్య పాక్షిక చంద్రగ్రహణం పూర్తయ్యింది. మరోవైపు తరిగొండ వెంగమాంబ అన్నప్రసాద భవనాన్ని శ‌నివారం సాయంత్రం 6 గంటలకు మూసివేశారు.. ఆదివారం ఉదయం 9 గంటలకు తెరిచారు.

పాక్షిక చంద్రగ్రహణం కారణంగా మూతపడిన టీటీడీ స్థానికాల‌యాలు కూడా తిరిగి తెరుచుకున్నాయి. అక్టోబ‌రు 29న వేకువ‌జామున 1.05 నుంచి 2.22 గంట‌ల వ‌ర‌కు పాక్షిక చంద్ర‌గ్ర‌హ‌ణం కొనసాగింది. తిరుచానూరు శ్రీ పద్మావతి అమ్మవారి ఆలయంలో శ‌నివారం సాయంత్రం 5 గంట‌ల‌కు ఆల‌య త‌లుపులు మూసివేశారు. ఆదివారం తెల్ల‌వారుజామున 4.30 గంట‌ల‌కు ఆల‌య త‌లుపులు తెరిచారు. శుద్ధి అనంత‌రం ఉదయం 7 గంట‌ల నుండి భ‌క్తుల‌కు స‌ర్వ‌ద‌ర్శ‌నానికి అనుమతించారు.

తిరుపతిలోని శ్రీ గోవిందరాజస్వామివారి ఆలయం, శ్రీ కోదండరామస్వామివారి ఆలయం, శ్రీ‌నివాస‌మంగాపురంలోని శ్రీ క‌ల్యాణ వేంక‌టేశ్వ‌ర‌స్వామివారి ఆల‌యాల్లో శ‌నివారం రాత్రి 7 గంట‌ల‌కు ఆల‌య త‌లుపులు మూసివేశారు. ఆదివారం తెల్ల‌వారుజామున 4.30 గంట‌ల‌కు ఆల‌య త‌లుపులు తెరిచారు.. శుద్ధి అనంత‌రం భ‌క్తుల‌కు స‌ర్వ‌ద‌ర్శ‌నం క‌ల్పిస్తారు. తిరుపతిలోని శ్రీకపిలేశ్వరస్వామివారి ఆలయంలో శ‌నివారం సాయంత్రం 6.45 గంట‌ల‌కు ఆల‌య త‌లుపులు మూసి వేశారు. ఆదివారం ఉద‌యం 4 గంట‌ల‌కు ఆల‌య త‌లుపులు తెరిచి శుద్ధి అనంత‌రం భ‌క్తుల‌కు స‌ర్వ‌ద‌ర్శ‌నం కల్పించారు.