సభలో ప్రసంగిస్తుండగానే ఎమ్మెల్యే అరెస్ట్.. ఆ కేసులో అదుపులోకి తీసుకున్న ఈడీ

పంజాబ్‌లో అధికారంలో ఉన్న ఆమ్ ఆద్మీ పార్టీకి చెందిన ఎమ్మెల్యేను ఎన్‌ఫోర్స్‌మెంట్ డైరెక్టరేట్ అధికారులు చేశారు. అయితే ఓ బహిరంగ సభలో మాట్లాడుతుండగానే ఆ ఎమ్మెల్యేను అదుపులోకి తీసుకుని ఈడీ అధికారులు తరలించడం తీవ్ర చర్చనీయాంశంగా మారింది. అయితే ఒక మనీలాండరింగ్‌ కేసులో ఆ ఎమ్మెల్యేను అరెస్టు చేసినట్లు తెలుస్తోంది. ఎమ్మెల్యే మోసం చేశారని ఓ బ్యాంకు ఇచ్చిన ఫిర్యాదుతో రంగంలోకి దిగిన ఈడీ అధికారులు ఆయనను అదుపులోకి తీసుకున్నారు. ఆప్ ఎమ్మెల్యే జశ్వంత్‌ సింగ్‌ గజ్జన్‌మజ్రాను ఈడీ అధికారులు సోమవారం అరెస్టు చేశారు. పంజాబ్‌ మలేర్‌కోట్లా జిల్లాలోని అమర్‌గఢ్‌లో నిర్వహించిన ఓ బహిరంగ సభలో ఎమ్మెల్యే జశ్వంత్‌ సింగ్‌ పాల్గొన్నారు. ఇందులో భాగంగా ఆయన ప్రసంగిస్తుండగానే అక్కడికి ఈడీ అధికారులు చేరుకున్నారు. అనంతరం అక్కడే ఆయనను కస్టడీలోకి తీసుకున్నారు. అయితే ఎమ్మెల్యే జశ్వంత్‌ సింగ్‌ కంపెనీపై గత సంవత్సరం నమోదైన ఓ మనీ లాండరింగ్‌ కేసులో ఆయనను అరెస్టు చేసినట్లు తెలుస్తోంది. ఎమ్మెల్యే జశ్వంత్‌ సింగ్‌ను అరెస్ట్ చేసిన ఈడీ అధికారులు ఆయనను మొహాలీ కోర్టులో హాజరుపర్చనున్నాయి.

ఎమ్మెల్యే జశ్వంత్‌ సింగ్‌కు చెందిన ఓ కంపెనీపై గతేడాది లూథియానాలోని బ్యాంక్‌ ఆఫ్‌ ఇండియా బ్రాంచ్‌ ఒక ఫిర్యాదు చేసింది. ఆ కంపెనీ తమ బ్యాంకు నుంచి రూ.41 కోట్లు తీసుకుని మోసం చేసినట్లు బ్యాంక్ ఆఫ్ ఇండియా ఆరోపణలు చేసింది. ఈ క్రమంలోనే బ్యాంక్ ఆఫ్ ఇండియాపై సీబీఐ అధికారులు కేసు నమోదు చేశారు. ఆ తర్వాత గతేడాది సెప్టెంబరులో ఎమ్మెల్యే జశ్వంత్‌ ఇల్లుతో పాటు ఆయన కుటుంబం నిర్వహించే స్కూళ్లు, ఆఫీసులు, ఓ ఫ్యాక్టరీలో తనిఖీలు నిర్వహించింది. ఈ సోదాల్లో లెక్కల్లో చూపని రూ.16.57 లక్షల నగదు, విదేశీ కరెన్సీ, కొన్ని కీలక పత్రాలను సీబీఐ అధికారులు స్వాధీనం చేసుకున్నారు. వాటి ఆధారంగా రంగంలోకి దిగిన ఈడీ అధికారులు ఆయనపై మనీలాండరింగ్‌ కేసు కూడా నమోదు చేశారు.

బ్యాంక్ ఆఫ్ ఇండియా నమోదు చేసిన కేసులో విచారణకు హాజరు కావాలని ఎమ్మెల్యే జశ్వంత్‌కు ఈడీ అధికారులు ఇప్పటికే 4 సార్లు సమన్లు జారీ చేశారు. అయితే వాటికి ఎమ్మెల్యే నుంచి ఎలాంటి స్పందన రాకపోవడం, విచారణకు హాజరు కాకపోవడంతో తాజాగా ఆయనను అదుపులోకి తీసుకున్నట్లు ఈడీ వర్గాలు వెల్లడించాయి. అయితే ఈ అరెస్టును ఆమ్‌ ఆద్మీ పార్టీ తీవ్రంగా ఖండించింది. బహిరంగ సభ నుంచి ఒక ఎమ్మెల్యేను బలవంతంగా కస్టడీలోకి తీసుకోవడం దారుణమని ఆప్ అధికార ప్రతినిధి మాల్విందర్‌ కాంగ్ తీవ్రస్థాయిలో మండిపడ్డారు.