ఏపీలో భారీ వర్షాలకు అవకాశం
Andhra Pradesh Telugu | Suryaa Desk | Published : Tue, Nov 14, 2023, 06:29 PM
ఏపీకి వాతావరణశాఖ మరోసారి వర్ష సూచన చేసింది. బంగాళాఖాతంలో దక్షిణ అండమాన్ ప్రాంతంలో ఉపరితల ఆవర్తనం ఏర్పడినట్లు అమరావతి వాతావరణ కేంద్రం తెలిపింది. ఈ ప్రభావంతో మంగళవారం ఆగ్నేయ బంగాళాఖాతంలో అల్పపీడనం ఏర్పడే అవకాశముంది అన్నారు. ఇది పశ్చిమ మధ్య బంగాళాఖాతంలో ఈ నెల 16 నాటికి వాయుగుండంగా బలపడనుందని తెలిపారు. మరోవైపు నైరుతి బంగాళాఖాతంలో ఏర్పడిన ఉపరితల ఆవర్తనం కొనసాగుతోందన్నారు.ఈ ప్రభావంతో మంగళ, బుధవారాల్లో దక్షిణ కోస్తా, రాయలసీమలోని ఒకటి, రెండు ప్రాంతాల్లో భారీ నుంచి అతిభారీ వర్షాలు, పలుచోట్ల తేలికపాటి నుంచి ఓ మోస్తరు వర్షాలు కురిసే అవకాశముందన్నారు. ఇవాళ బాపట్ల, గుంటూరు, ప్రకాశం, నెల్లూరు, అన్నమయ్య, చిత్తూరు, తిరుపతి, కడప, శ్రీ సత్యసాయి తేలికపాటి నుంచి మోస్తరు వానలు పడతాయంటున్నారు. కొన్ని జిల్లాల్లో భారీ వర్షాలు కురుస్తాయంటున్నారు. మరోవైపు అల్పపీడనం హెచ్చరికతో రైతుల్లో అలజడి మొదలైంది. సోమవారం ఉదయం నుంచి వాతావరణంలో మార్పులు వచ్చి ఆకాశం మేఘావృతం కావడంతో పొలాల్లో వరి పనులను కాపాడుకునే పనిలో ఉన్నారు. కొన్ని జిల్లాల్లో వరి పైరు కోశారు.. ఒకేసారి కోతలు ప్రారంభం కావడంతో కూలీలకు గిరాకీ పెరిగింది. గతంలో ఒక్కో ప్రాంతంలో ఒక్కోసారి కోతలు కోసేవారు. అయితే ఈ ఏడాది ఒకే సారి కోతలు ప్రారంభం కావడంతో కూలీలు దొరక్కపోవడంతో అదనంగా వ్యయం చేయాల్సి వచ్చింది. ఇప్పుడు వారిని అల్పపీడనం టెన్షన్ కూడా వెంటాడుతోంది.
|
|