ఆగ్నేయ బంగాళాఖాతంలో అల్పపీడనం,,,,,తమిళనాడులోని పలు జిల్లాలకు భారీ వర్షసూచన

ఈశాన్య రుతుపవనాల ప్రభావంతో తమిళనాడులోని పలు జిల్లాలు, పుదుచ్చేరిలో రెండు రోజుల పాటు భారీ నుంచి అతిభారీ వర్షాలు కురిసే అవకాశం ఉందని భారత వాతావరణ విభాగం (ఐఎండీ) హెచ్చరించింది. మంగళవారం నాలుగు జిల్లాల్లో అత్యంత భారీ వర్షాలు కురుస్తాయని పేర్కొంది. అలాగే, మరో 16 జిల్లాల్లో భారీ వర్షం కురిసే అవకాశం ఉందని చెన్నై వాతావరణ కేంద్రం తెలిపింది. ఆగ్నేయ బంగాళాఖాతంలో మంగళవారం అల్పపీడనం ఏర్పడనుందని పేర్కొంది. దీని ప్రభావంతో పలు జిల్లాలను భారీ వర్షాలు ముంచెత్తే అవకాశం ఉందని అప్రమత్తం చేసింది.

ఐఎండీ హెచ్చరికలతో తమిళనాడు, పుదుచ్చేరి ప్రభుత్వాలు అప్రమత్తమయ్యాయి. ముందు జాగ్రత్త చర్యల్లో భాగంగా కడలూరు, మైలాడుదురై, విల్లుపురం జిల్లాల్లోని విద్యా సంస్థలకు తమిళనాడు ప్రభుత్వం సెలవులు ప్రకటించగా.. పుదుచ్చేరి కూడా స్కూల్స్‌ను మూసివేసింది. విల్లుపురం, చెంగల్పట్టు, కాంచీపురం, కడలూర్‌ జిల్లాల్లో, పుదుచ్చేరిలో ఒకటి, రెండు చోట్ల భారీ నుంచి అతిభారీ వర్షాలు కురుస్తాయని ఐఎండీ సూచించింది.

తమిళనాడులోని తిరువళ్లూరు, చెన్నై, రాణిపేట, తిరువణ్ణామలై, కళ్లకురిచ్చి, తిరుప్పత్తూర్‌, వేలూర్‌, అరియలూర్‌, పెరంబలూర్‌, పుదుక్కోట్టై, తిరుచ్చిరాపళ్లి, తంజావూరు, తిరువారూర్‌, నాగపట్టణం, మైలాడుదురై జిల్లాలు, కారైక్కల్‌లో ఒకటి, రెండు చోట్ల భారీవర్షం కురిసే అవకాశం ఉందని తెలిపింది. నవంబరు 15న చెన్నై, తిరువళ్లూరు, కాంచీపురం, చెంగల్పట్టు, తిరుప్పత్తూర్‌, వేలూర్‌, రాణిపేట, తిరువణ్ణామలై జిల్లాల్లో పలు భారీవర్షం.. 16, 17 తేదీల్లో కడలూరు, అరియలూర్‌, పెరంబలూర్‌, తిరుచ్చిరాపళ్లి, మదురై, దిండుక్కల్‌, విరుదునగర్‌, శివగంగై, తూత్తుకుడి, తంజావూరు, పుదుక్కోట్టై తదితర జిల్లాల్లో ఒకటి, రెండు చోట్ల భారీవర్షానికి అవకాశం ఉందని తెలిపింది.

రాగల 48 గంటలు చెన్నైలో ఆకాశం మేఘావృతమై ఉంటుందని.. కొన్నిచోట్ల మోస్తరు నుంచి భారీవర్షం కురిసే అవకాశం ఉందని ఐఎండీ అంచనా వేసింది. మంగళవారం ఆగ్నేయ బంగాళాఖాతం, దానిని ఆనుకుని ఉన్న అండమాన్‌ ప్రాంతాల్లో గంటకు 55 కి.మీ వేగంతో గాలులు వీచే అవకాశం ఉందని, మత్స్యకారులు చేపల వేటకు వెళ్లొద్దని హెచ్చరించింది. తమిళనాడుకు ఎంతో కీలకమైన ఈశాన్య రుతుపవనాలు ఈ ఏడాది ఆలస్యంగా ప్రవేశించాయి. గతవారం సాధారణం కంటే 17 శాతం లోటు వర్షపాతం నమోదయ్యింది. ఆ రాష్ట్ర తాగు, సాగు నీటి అవసరాలకు ఈ రుతుపవనాలే పెద్ద దిక్కు.