రాజస్థాన్‌లో కర్ణాటక కాంగ్రెస్ వ్యూహం.. ఆసక్తికర ట్వీట్ చేసిన సీఎం అశోక్ గెహ్లాట్

కాంగ్రెస్ పార్టీలో వర్గపోరు సర్వ సాధారణమే. అది జాతీయ స్థాయి నుంచి మొదలుకుంటే గ్రామ స్థాయి వరకు కొనసాగుతూనే ఉంటుంది. రెండు వర్గాలు కొట్టుకుని.. ప్రత్యర్థి పార్టీలకు లాభమైన ఉదంతాలు హస్తం పార్టీలో కోకొల్లలు ఉన్నాయి. ఈ క్రమంలోనే ఇటీవల కర్ణాటకలో కాంగ్రెస్ పార్టీ విజయం సాధించిన తర్వాత ఈ పరిస్థితిలో కొంత మార్పు వచ్చినట్లు కనిపిస్తోంది. అక్కడ ఎన్నికలకు ముందు సొంత పార్టీలోనే సిద్ధరామయ్య, డీకే శివకుమార్‌ వర్గాల మధ్య తీవ్ర మాటల యుద్ధం నడిచింది. ఇది ఎన్నికల్లో కాంగ్రెస్ పార్టీ ఘన విజయం సాధించిన తర్వాత మరింత ముదిరింది. కర్ణాటక సీఎం పదవి తమకే అంటూ రెండు వర్గాలు బహిరంగ ప్రకటనలు చేశాయి. చివరికి రంగంలోకి దిగిన హైకమాండ్.. సిద్ధరామయ్యను సీఎం చేసి పరిస్థితిని చక్కదిద్దింది. అయితే ప్రస్తుతం రాజస్థాన్‌లో కూడా ఇదే వ్యూహాన్ని అనుసరించాలని కాంగ్రెస్ పార్టీ భావిస్తోంది.

అయితే 2018 లో రాజస్థాన్‌లో కాంగ్రెస్ పార్టీ విజయం సాధించిన తర్వాత సీఎంగా అశోక్ గెహ్లాట్ ప్రమాణ స్వీకారం చేశారు. అయితే సీఎం పదవి కోసం ప్రయత్నాలు చేసిన సచిన్ పైలట్.. ఒక దశలో తిరుగుబాటు జెండా ఎత్తేందుకు కూడా సిద్ధమయ్యారు. అదే ఎన్నికల్లో మధ్యప్రదేశ్‌లో కూడా అధికారంలోకి వచ్చిన కాంగ్రెస్ పార్టీ కమల్‌నాథ్‌ను సీఎం చేసింది. అయితే కొన్ని రోజులకే ఆ పార్టీలో జ్యోతిరాధిత్య సింధియా తిరుగుబాటు చేసి బీజేపీలో చేరి కేంద్ర మంత్రి పదవి దక్కించుకున్నారు. అదే పరిస్థితి ఇటు రాజస్థాన్‌లో కూడా జరుగుతుందని భావించినా.. హైకమాండ్ ఆదేశాలు, బుజ్జగింపులతో వెనక్కి తగ్గిన సచిన్ పైలట్.. సైలెంట్ అయ్యారు. అయితే ఎన్నికలకు ముందు సీఎం అశోక్ గెహ్లాట్‌పై తీవ్ర విమర్శలు చేశారు. ఈ క్రమంలోనే మరోసారి రంగంలోకి దిగిన హైకమాండ్ ఇద్దరు నేతలను బుజ్జగించింది.

కర్ణాటకలో సిద్ధరామయ్య, డీకే శివకుమార్‌ల మధ్య ఎన్నికల ముందు, తర్వాత ఉన్న అంతరాన్ని కాస్త తగ్గించిన కాంగ్రెస్ హైకమాండ్.. సిద్ధరామయ్యకు సీఎం.. డీకే శివకుమార్‌కు డిప్యూటీ సీఎం పదవులు కట్టబెట్టి శాంతింపజేసింది. ఈ క్రమంలోనే ప్రస్తుతం రాజస్థాన్‌లో మరోసారి అధికారంలోకి వచ్చేందుకు ఇరువురు నేతలు కలిసి పనిచేయాలని హస్తం పార్టీ అధినాయకత్వం అటు అశోక్ గెహ్లాట్‌కు, ఇటు సచిన్ పైలట్‌కు సూచించింది. దీంతో ముందు ఎన్నికల్లో గెలిచి అధికారం దక్కించుకున్న తర్వాత సీఎం కుర్చీ గురించి ఆలోచించవచ్చని ఇరువురు నేతలు అభిప్రాయానికి వచ్చినట్లు తెలుస్తోంది. ఈ నేపథ్యంలోనే ఒకరితో ఒకరు కలిసి పనిచేస్తామని ఇద్దరు నేతలు చెప్పారు.

ఈ క్రమంలోనే తాము ఇద్దరం ఒకటే అనే సంకేతాలను అటు ప్రజల్లోకి.. ఇటు పార్టీ కార్యకర్తల్లోకి పంపిస్తున్నారు. ఈ నేపథ్యంలోనే తాజాగా రాజస్థాన్ సీఎం అశోక్‌ గెహ్లాట్‌ చేసిన ట్వీట్ ఆసక్తికరంగా మారింది. సచిన్ పైలట్, కాంగ్రెస్ పార్టీ జనరల్ సెక్రెటరీ కేసీ వేణుగోపాల్, తాను ఉన్న ఫోటోను అశోక్‌ గెహ్లాట్‌ షేర్ చేశారు. కలిసి గెలుస్తున్నాం అంటూ ఆ ఫోటోకు క్యాప్షన్ కూడా ఇవ్వడంతో తాను, సచిన్ పైలట్.. ఈ ఎన్నికల్లో కలిసి పోరాటం చేసి మళ్లీ కాంగ్రెస్‌ పార్టీకి అధికారాన్ని కట్టబెడతామన్న వార్తలను పంపించారు. అటు సచిన్‌ పైలట్‌ కూడా తాజాగా మీడియాతో మాట్లాడుతూ తనకు సీఎం అశోక్ గెహ్లాట్‌కు‌ ఎలాంటి వివాదాలు లేవని స్పష్టం చేశారు. రాజకీయ నాయకులుగా తాము హుందాగా వ్యవహరించాల్సి ఉంటుందని పేర్కొన్నారు. అయితే గతంలో సీఎం అశోక్ గెహ్లాట్‌పై చేసిన విమర్శలపై సచిన్ పైలట్‌ను మీడియా ప్రశ్నించగా.. తాను అలాంటి వ్యాఖ్యలేవీ చేయలేదని.. ఎవరు అన్నారో వారే బాధ్యత వహిస్తారని తేల్చి చెప్పారు. ఐదు రాష్ట్రాల ఎన్నికల్లో భాగంగా రాజస్థాన్‌లో ఈ నెల 25 వ తేదీన పోలింగ్‌ జరగనుంది.