శబరిమలలో ప్రారంభమైన మండల పూజలు,,,,శుక్రవారం ఉదయం నుంచి భక్తులకు అనుమతి

కేరళలోని శబరిమల ఆలయం రెండు నెలల మండల, మకర విళక్కు పూజలకోసం తెరుచుకుంది. దీంతో అయ్యప్ప దర్శనం కోసం భక్తులు పోటెత్తారు. శుక్రవారం తెల్లవారుజామున 3 గంటలకు ఆలయ ద్వారాలను తెరిచిన ప్రధాన పూజారి మహేశ్ మోహనరారు.. ప్రత్యేక పూజలు నిర్వహించారు. సంప్రదాయబద్దంగా పలు కార్యక్రమాలు పూర్తయిన తర్వాత భక్తులను దర్శనం కోసం అనుమతించారు. కేరళతో పాటు తమిళనాడు, ఆంధ్రప్రదేశ్‌, తెలంగాణ, కర్ణాటక నుంచి వేలాది మంది భక్తులు తరలివచ్చారు. మండల పూజల కోసం శబరిమల ఆలయం గురువారం సాయంత్రం తెరుచుకోగా.. శుక్రవారం నుంచి దర్శనాలు ప్రారంభమయ్యాయి.

కేరళ దేవాదాయ శాఖ మంత్రి కె.రాధాకృష్ణన్‌, ట్రావెన్‌కోర్‌ దేవస్థానం బోర్డు(టీడీబీ) నూతన అధ్యక్షుడు పీఎస్‌ ప్రశాంత్‌లు, ఎమ్మెల్యేలు ప్రమోద్ నారాయణ్, కేయూ జెనిశ్ కుమార్‌లు స్వామివారిని దర్శించుకున్నారు. రెండు నెలల పాటు కొనసాగే ధర్మశాస్తా దర్శనానికి అన్ని ఏర్పాట్లు చేసినట్లు మంత్రి రాధాకృష్ణన్‌ తెలిపారు. భక్తులకు ఎలాంటి అసౌకర్యం, ఇబ్బందులు లేకుంగా జాగ్రత్తలు తీసుకున్నట్లు చెప్పారు. మలయాళ మాసం వృశ్చికం మొదటి రోజున అయ్యప్ప సన్నిధానంలో మండల పూజలు మొదలవుతాయి. ఇవి మకర జ్యోతి వరకూ కొనసాగుతాయి. మకరవిళక్కు అనంతరం ఆలయాన్ని మూసివేస్తారు. కేవలం నెలవారీ పూజల కోసం మూడు రోజుల పాటు ఆలయాన్ని తెరుస్తారు.

శుక్రవారం ఉదయానికే అయ్యప్పలతో పంబా తీరం నిండిపోయింది. పంబ నుంచి సన్నిధానం వరకూ భారీగా క్యూలైన్‌లో భక్తులు వేచి ఉన్నారు. ఈ ఏడాది సన్నిధానం, మాలిగాపురత్తమ్మ ఆలయ ప్రధాన పూజారాలుగా పీఎన్ మహేశ్, పీజీ మురళి ఎంపికయ్యారు. వీరు ఏడాది పాటు ఈ రెండు ఆలయాల్లో ప్రధాన కార్యక్రమాలను నిర్వహిస్తారు. ఇక, గత మూడేళ్లుగా వర్చువల్ క్యూ విధానం అమల్లో ఉంది. ముందుగా భక్తులకు దర్శన టిక్కెట్లను ఆన్‌లైన్‌లో బుక్ చేసుకుని.. తమకు కేటాయించిన సమయానికి క్యూలోకి చేరుకోవాలి.