పాయింట్ నెమో.. భూమి కంటే అంతరిక్ష కేంద్రానికి దగ్గర.. జీవుల్లేని ఈ ప్రదేశం గురించి ఆసక్తికర విశేషాలివే

ఈ భూమి మీద అత్యంత మారుమూల ప్రాంతం ఏంటో తెలుసా..? పాయింట్ నెమో. అయితే ఇక్కడ పిడికెడు మట్టి కూడా దొరకదు. ఎందుకంటే ఇది పసిఫిక్ మహా సముద్రం మధ్యలో ఉన్న ప్రదేశం. న్యూజిలాండ్, అంటార్కిటికా, దక్షిణ అమెరికా మధ్య ఉన్న ఈ ప్రదేశం నుంచి సమీపంలో ఉన్న భూభాగానికి వెళ్లాలంటే.. కనీసం 2600 కిలోమీటర్లు ప్రయాణించాలి. అందుకే దీన్ని ‘ఓషియానిక్ పోల్ ఆఫ్ ఇన్‌యాక్సెసిబులిటీ’ (చేరుకోలేని మహాసముద్ర ధ్రువం) అని పిలుస్తుంటారు.

ఈ పాయింట్‌కి చేరువగా మానవ నివాస సముదాయాలేవీ ఉండవు. అందుకే సైంటిస్టులు దీన్ని నెమో అని పిలవడం మొదలుపెట్టారు. లాటిన్ భాషలో నెమో అంటే ‘ఎవరూ లేని’ అని అర్థం. భూమ్మీద నివసించేవారి కంటే.. భూమికి 258 మైళ్ల ఎత్తున అంతరిక్ష కేంద్రంలో ఉండే వ్యోమగాములు ఈ ప్రాంతానికి చేరువగా ఉంటారు. అంటే.. భూమి మీద మానవ నివాసయోగ్యమైన ప్రదేశాలతో పోలిస్తే.. అంతరిక్ష కేంద్రం పాయింట్ నెమో‌కు చేరువగా ఉంటుంది.

దక్షిణ పసిఫిక్ మహాసముద్రంలోని ఈ పాయింట్‌ను చేరుకోవడం అంత తేలికేం కాదు. పసిఫిక్ అంటే ప్రశాంతమైన అని అర్థం. కానీ ఇక్కడ సముద్రం అంత ప్రశాంతంగా ఉండదు. ఇక్కడ సముద్ర జలాల ప్రవాహాలు ఎక్కువగా ఉండటంతో.. అలలు బలంగా ఎగిసి పడుతుంటాయి. పోషకాలు అధికంగా ఉండే నీరు ఈ ప్రాంతంలోకి ప్రవహించకుండా రొటేటింగ్ కరంట్ నిరోధిస్తుంది. దీంతో ఎలాంటి ఆహారం దొరకని ఈ ప్రాంతంలో సముద్ర జీవులు బతకడం అసాధ్యమే. అయితే ఈ ప్రాంతం పూర్తిగా నిర్జీవమైంది అనుకోవడానికి లేదు. ఇక్కడికి చేరువగా రకరకాల బ్యాక్టీరియాలు, చిన్న పీతలను శాస్త్రవేత్తలు గుర్తించారు.

1997లో ఈ ప్రాంతంలో నీటి అడుగున భారీ శబ్దాలను గుర్తించిన శాస్త్రవేత్తలు ఆశ్చర్యపోయారు. 3 వేల మైళ్ల కంటే ఎక్కువ దూరం నుంచి, నీటి అడుగున ఉన్న మైక్రోఫోన్‌ల ద్వారా ఈ ధ్వనిని గుర్తించారు. అమెరికా నేషనల్ ఓషియానిక్ అండ్ అట్మాస్ఫియరిక్ అడ్మినిస్ట్రేషన్‌కు చెందిన శాస్త్రవేత్తలు ఈ మిస్టరీ శబ్దాన్ని "ది బ్లూప్" అని పిలిచారు. 1992లో క్రొయేషియాకు చెందిన సర్వే ఇంజినీర్ హ్రోవ్జే లుకాటెలా కంప్యూటర్ ప్రోగ్రామ్ ద్వారా ఈ పాయింట్‌ను‌ గుర్తించారు. కచ్చితంగా ఈ పాయింట్ ఉన్న చోటు మీదుగా ఇప్పటి వరకూ మనుషులెవరూ వెళ్లిన దాఖలాలు దాదాపుగా ఉండకపోవచ్చు.

అయితే లుకాటెలా ఈ ప్రాంతాన్ని గుర్తించడానికి 66 సంవత్సరాల ముందే హెచ్‌పీ లవ్‌క్రాఫ్ట్ అనే రచయిత ‘ది కాల్ ఆఫ్ కథూలూ’ అనే పుస్తకంలో దక్షిణ పసిఫిక్ సముద్రంలో దాదాపుగా ఈ ప్రాంతంలోనే ఆక్టోపస్‌లా అనేక చేతులున్న ఓ జీవి గుహ ఉండేదని రాసుకొచ్చారు. శాస్త్రవేత్తలు సముద్రం అడుగు నుంచి వింత శబ్దాన్ని గుర్తించిన ప్రదేశం.. లవ్‌క్రాఫ్ట్ ప్రస్తావించిన ప్రాంతానికి ఎంతో చేరువగా ఉండటం గమనార్హం. అయితే ఈ శబ్దం అంటార్కిటికాలో మంచు ఫలకలు విరిగిపోవడం వల్ల వచ్చిందని.. లవ్‌క్రాఫ్ట్ పేర్కొన్నట్టుగా అక్కడ వింత జీవులేవీ లేవని తేలింది.

భూమ్మీద అత్యంత మారుమూలన ఉన్నప్పటికీ ‘పాయింట్ నెమో’ మానవాళికి ఉపయోగపడుతోంది. మనుషులతోపాటు సాగర జీవులు సైతం లేని ప్రదేశం కావడంతో.. కాలం తీరిన ఉపగ్రహాలు, అంతరిక్ష వ్యర్థాలను పాయింట్ నెమో వైపు మళ్లించి, ఇక్కడే కూల్చివేస్తున్నారు. దీంతో ఈ ప్రాంతం వ్యౌమనౌకల శ్మశానవాటికలా మారింది. యూరోపియన్ స్పేస్ ఏజెన్సీ స్పేస్ షిప్‌లతోపాటు రష్యాకు చెందిన సోయూజ్ స్పేస్ క్రాఫ్ట్‌లు, సోవియట్ యూనియన్‌ కాలానికి చెందిన మిర్ స్పేస్ స్టేషన్‌కు పాయింట్ నెమో వద్దే కూల్చేశారు.