అక్టోబరు 7న మ్యూజిక్ ఫెస్ట్‌లో హమాస్ దాడులు.. వీడియో విడుదల చేసిన ఇజ్రాయేల్

అక్టోబరు 7న సూపర్ నోవా మ్యూజిక్ ఫెస్టివల్‌‌పై హమాస్ ముష్కరులు దాడిచేసి.. నరమేధానికి పాల్పడ్డారు. తాజాగా, దీనికి సంబంధించిన సెక్యూరిటీ కెమెరా వీడియో ఫుటేజ్‌ను ఇజ్రాయేల్ సోమవారం విడుదల చేసింది. ఇజ్రాయేల్‌లోకి చొరబడిన హమాస్ ముష్కరులు.. మ్యూజిక్ ఫెస్ట్ నుంచి ప్రజలను వెంబడించడం, ఒక మహిళను పాయింట్-బ్లాంక్ రేంజ్‌లో కాల్చి చంపడం ఈ వీడియోలో కనిపిస్తోంది. ఇజ్రాయేల్-గాజా సరిహద్దు వద్ద నెగెవ్‌ ఎడారిలో కిబ్బట్జ్‌ రీమ్‌ సమీపంలోని ఓ విశాల ప్రాంగణంలో ది సూపర్‌ నోవా పేరిట మ్యూజిక్‌ ఫెస్టివల్‌ను నిర్వహించిన విషయం తెలిసిందే.

హమాస్ మారణహోమానికి ప్రతికారం తీర్చుకును క్రమంలో గాజాలో గత నెలన్నర రోజులుగా చేస్తోన్న భీకర దాడులపై అంతర్జాతీయ విమర్శలను తిప్పికొట్టడానికి ఇజ్రాయేల్ ప్రయత్నిస్తోంది. కాల్పుల విరమణ కోసం అంతర్జాతీయంగా ఒత్తిడి పెరుగుతున్నప్పటికీ.. హమాస్ నిర్మూలించే వరకు పోరు కొనసాగిస్తామని ఇజ్రాయేల్ స్పష్టం చేసింది. ‘ఇది మంచి, చెడుల మధ్య జరుగుతోన్న యుద్ధం’ అని పేర్కొంటూ ఇజ్రాయేల్ విదేశాంగ మంత్రిత్వ శాఖ.. సోషల్ మీడియాలో వీడియోను షేర్ చేసింది.

హమాస్ ముష్కరులు సూపర్ నోవా ఉత్సవాన్ని ఊచకోతగా మార్చేందుకు ప్రయత్నించగా వారి నుంచి తప్పించుకుని జనం పరుగులు తీస్తుండటం వీడియోలో కనిపిస్తోంది. వీడియో చివరిలో వెంబడిస్తున్న మహిళల్లో ఒకరు కిందపడిపోగా.. ఆమె పక్కనే ఒక సాయుధుడు తన చేతిలోని రైఫిల్‌తో ఆమెపై సమీపం నుంచి కాల్పులు జరిపాడు. వీడియోలో ఆడియో లేదు... కానీ ట్రిగ్గర్‌ను లాగినప్పుడు నేలపై దుమ్ము పైకి లేస్తుంది. అయితే, బాధిత మహిళ ఎవరనేది గుర్తించలేదు. హమాస్‌ మిలిటెంట్ల దాడుల్లో మొత్తం 1,400 మంది ఇజ్రాయెలీలు ప్రాణాలు కోల్పోగా.. . ఈ మ్యూజిక్‌ ఫెస్టివల్‌ ప్రాంగణంలోనే దాదాపు మృతదేహాలను గుర్తించారు.