తిరుపతి బధిరుల పాఠశాలలో దారుణం.. విద్యార్థి నోట్లో టర్పెంటైన్ ఆయిల్ పోసి నిప్పంటించి, పరిస్థితి విషమం
Andhra Pradesh Telugu | Suryaa Desk | Published : Wed, Nov 22, 2023, 09:48 PM
తిరుపతి బధిరుల పాఠశాలలో విద్యార్థుల మధ్య ఘర్షణ కలకలంరేపింది. ఆ కోపంలో ఓ విద్యార్థిపై సహచర విద్యార్థులు నిప్పంటించారు. వడమాలపేట రజక కాలనీకి చెందిన దాము కుమారుడు చందు టీటీడీ చెవిటి మూగ పాఠశాలలో చదువుతున్నాడు. ఈ క్రమంలో మంగళవారం చందు 70 శాతం కాలిపోయిన గాయాలతో ఉన్నాడు.. వెంటనే స్కూల్ సిబ్బంది తిరుపతి రుయా ఆస్పత్రికి తరలించారు.. డాక్టర్లు అతడి పరిస్థితి విషమంగా ఉందంటున్నారు. వెంటనే సమాచారం అందుకున్న తల్లిదండ్రులు ఆస్పత్రికి వచ్చారు. తమకు న్యాయం చేయాలని కోరుతున్నారు. ఆస్పత్రిలో చికిత్స పొందుతున్న చందు.. తనపై టర్పెంటైన్ ఆయిల్ పోసి నిప్పు పెట్టారని రాసి చూపిస్తున్నాడు. మంగళవారం హాస్టల్లో విద్యార్థుల మధ్య ఘర్షణ జరిగిందని చెబుతున్నారు. చందు నోటిలో తోటి విద్యార్థులు కెమికల్ ఆయిల్ పోసి నిప్పంటించినట్లు ఆరోపిస్తున్నారు. అయితే దాడి చేసిన వారిని కాపాడేందుకు హాస్టల్ వార్డెన్, సిబ్బంది ప్రయత్నిస్తున్నారే ఆరోపణలు వినిపిస్తున్నాయి. హాస్టల్లో సీసీ ఫుటేజ్ పరిశీలించాలని డిమాండ్ చేస్తున్నారు. ఈ ఘటనపై పోలీసులు ఆరా తీస్తున్నారు.
|
|