మాజీ సైనికులనే ఉగ్రవాదులుగా మార్చి పంపుతున్న పాకిస్థాన్

మనదేశంలోలో శాంతి, భద్రతల సమస్యలను సృష్టించేందుకు శత్రుదేశం పాకిస్థాన్ వేసే నక్కజిత్తులు అన్నీ ఇన్నీ కావు. సరిహద్దుల గుండా తీవ్రవాదులను జమ్మూకశ్మీర్‌లోకి పంపిస్తూ అక్కడ అశాంతిని రేకెత్తించేందుకు దాయాది దేశం నిత్యం ఏదో ఒక దుర్మార్గపు ఆలోచన చేస్తూనే ఉంటుంది. అలాంటి దుష్టపన్నాగం ఒకటి తాజాగా వెలుగుచూసింది. రాజౌరీ ఎన్‌కౌంటర్ తర్వాత.. పాకిస్థాన్ దుర్భుద్ధి మరోసారి బయటపడింది. సైన్యంలో పనిచేసి పదవీవిరమణ పొందిన సైనికులను.. తీవ్రవాదులుగా మార్చి భారతదేశంపైకి ఉసిగొల్పుతున్న పాకిస్థాన్ దుష్టపన్నాగం తాజాగ బయటపడింది. జమ్మూకశ్మీర్‌లో ఉగ్రకార్యకలాపాల కోసం వీరిని పంపుతున్నట్లు ఇండియన్ ఆర్మీ ఉన్నతాధికారులు వెల్లడించారు. రాజౌరీ ఎదురుకాల్పుల ఘటన వివరాలను వెల్లడించే క్రమంలో ఈ వివరాలను సైతం ఇండియన్ ఆర్మీ అధికారులు బయటపెట్టారు. ఈ ఎదురుకాల్పుల ఘటనలో భారత సైన్యానికి చెందిన ఐదుగురు జవాన్లు అమరులయ్యారు. అలాగే లష్కరే తోయిబా ఉగ్రవాది, మరో స్నైపర్‌ను భద్రతాబలగాలు మట్టుబెట్టాయి.

" పాకిస్థాన్ సైన్యంలో పనిచేసి రిటైర్ అయిన సైనికులు జమ్మూకశ్మీర్‌లో ఉగ్రవాద కార్యకలాపాలు సాగిస్తున్నట్లు గుర్తించాం. ఫూంచ్, రాజౌరీ బెల్ట్‌లో సుమారు 25 మంది ఉగ్రవాదులు ఉన్నట్లు గుర్తించాం. స్థానికంగా ఉండే యువత ఉగ్రవాదం వైపు వెళ్లకపోవటంతో ఈ ప్రాంతంలోకి విదేశీ ఉగ్రవాదులను దింపేందుకు వారు ప్రయత్ని్స్తున్నారు. స్థానికులు ఇచ్చిన సమాచారం ఆధారంగానే లష్కరేతోయిబా కమాండర్, అతని అనుచరుణ్ని మట్టుబెట్టాం. దాంగ్రీ ఘటనలో కూడా చనిపోయిన వారి పాత్ర ఉన్నట్లు తేలింది".. అని నార్తర్న్ ఆర్మీ కమాండర్ లెఫ్టినెంట్ జనరల్ ఉపేంద్ర ద్వివేదీ శుక్రవారం వెల్లడించారు.

రాజౌరీ జిల్లాలోని కాలాకోట్‌ అటవీ ప్రాంతంలో గురువారం భద్రతాబలగాలు, ఉగ్రవాదులకు మధ్య ఎదురుకాల్పులు జరిగాయి. ఈ ఘటనలో క్వారీ అనే లష్కరేతోయిబా కమాండర్‌తో పాటు మరో ఉగ్రవాదిని సైన్యం మట్టుబెట్టింది. ఎదురుకాల్పుల్లో ఇద్దరు ఇండియన్ ఆర్మీ ఆఫీసర్లు, ముగ్గురు సైనికులు అమరులయ్యారు. సైన్యం కాల్పుల్లో హతమైన లష్కరే తోయిబా కమాండర్ క్వారీని పాకిస్థాన్ జాతీయుడిగా అధికారులు గుర్తించారు. ఐఈడీలను అమర్చడంలో, గెరిల్లా యుద్ధతంత్రంలో నిపుణుడిగా తెలిపారు. ధాంగ్రీ , కండీ ఉగ్రవాద ఘటనల్లో క్వారీ సూత్రధారిగా ఉన్నట్లు వివరించారు. మరోవైపు చనిపోయిన వారు ఉగ్రవాద కార్యకలాపాల్లో నిష్ణాతులన్న ఆర్మీ అధికారులు.. ధైర్యసాహసాలతో భారతసైనికులు వారిని మట్టుబెట్టారని ప్రశంసించారు.