గత ఐదేళ్లలో 20 సార్లు కూలిన సిల్క్యారా సొరంగం.. వెలుగులోకి సంచలన విషయాలు

ఉత్తరాఖండ్‌లోని ఉత్తరకాశీలో నవంబరు 12న నిర్మాణంలో ఉన్న సిల్క్యారా-బార్‌కోట్ సొరంగం కూలిపోయి అందులో చిక్కుకున్న 41 మంది కార్మికులను అనేక ప్రయత్నాలు చేసి చివరకు 17 రోజులు తర్వాత సురక్షితంగా బయటకు తీసుకొచ్చారు. అయితే, ఈ సొరంగం కూలిపోవడం ఇదే మొదటిసారి కాదని, గత ఐదేళ్లలో 20 సార్లు పాక్షికంగా కూలిపోయిందని అధికారులు తెలిపారు. ఛార్‌ధామ్ మార్గంలో అతిపెద్దదైన ఈ సొరంగం పొడవు 4.5 కిలోమీటర్లు. నేషనల్ హైవేస్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ లిమిటెడ్ డైరెక్టర్ (అడ్మిన్ అండ్ ఫైనాన్స్) అన్షఉ మనీశ్ ఖల్ఖో మాట్లాడుతూ.. నిర్మాణ పనులు జరుగుతున్న ఈ సొరంగంం పాక్షికం నుంచి మధ్యస్థంగా 19 నుంచి 20 సార్లు కూలిపోయిందని అన్నారు.

ఈ ప్రాంతంలోని భూమి స్వభావం వల్లే ఇలా జరుగుతుందని చెప్పారు. ‘ఏ సొరంగం నిర్మాణంలో అయినా ఇలాగే జరుగుతుంది కానీ, ఈసారి దురదృష్టవశాత్తూ కార్మికులు శిథిలాల్లో చిక్కుకున్నారు’ అని మనీశ్ తెలిపారు. ‘కావిటీస్’ అని కూడా పిలువబడే పతనాలు సిల్క్యారా వైపు, సొరంగం చివర ఉన్న బార్కోట్ రెండింటిలోనూ సంభవించాయి. సిల్క్యారా వైపు కంటే బార్కోట్ వైపు ఎక్కువ కూలిపోయిందని చెప్పారు. సిల్క్యారా చివర నుంచి సొరంగం ముఖద్వారం లోపల 160- 260 మీటర్ల (చైనేజ్ అని కూడా పిలుస్తారు) ప్రాంతాన్ని 'రెడ్ జోన్' లేదా పెళుసుగా ఉండే రాళ్లను కలిగి ఉన్న 'షీర్ జోన్'గా గుర్తించామని ఆయన చెప్పారు. ఈ ప్రాంతాన్ని బలోపేతం చేయడానికి అదనపు రక్షణ చర్యలు తీసుకుంటామని ఖల్ఖో పేర్కొన్నారు. సొరంగం నిర్మాణంతో సంబంధం ఉన్న మరొక అధికారి మాట్లాడుతూ.. ఈ ప్రాంతంలో భూమి స్వభావం, రాళ్ల వైషమ్యం వల్ల చాలాసార్లు సొరంగం కూలిపోవడానికి కారణం’ అని వివరించారు. ఐరోపాకు చెందిన ప్రముఖ కంపెనీ బెర్నార్డ్ గ్రుప్పే.. ఈ సొరంగ డిజైన్‌‌లో నవయుగ ఇంజినీరింగ్ సంస్థకు సహకరించింది. సొరంగ నిర్మాణ పనుల కాంట్రాక్ట్ దక్కించుకున్న నవయుగ సంస్థ.. టెండర్ డాక్యుమెంట్‌లలో ఊహించిన దానికంటే భౌగోళిక పరిస్థితులు, మరింత సవాలుగా ఉన్నట్లు నిరూపితమైనట్టు గతంలో పేర్కొంది.