అలా చేస్తే జైలుకే.. ఏపీ ఎన్నికల సంఘం వార్నింగ్.. కలెక్టర్లకు కీలక ఆదేశాలు

ఆంధ్రప్రదేశ్‌లో ఓటర్ల జాబితాపై రాజకీయం వేడెక్కింది. ఫారం 7 ద్వారా ప్రతిపక్షాల ఓట్లను తొలగిస్తున్నారంటూ విపక్షాలు ఆరోపిస్తుండగా.. డబుల్ ఓట్లను, దొంగ ఓట్లను తొలగించాలంటూ వైసీపీ కోరుతోంది. దీనిపై రెండుపార్టీలు పోటాపోటీగా ఎన్నికల సంఘానికి ఫిర్యాదులు చేస్తున్నాయి. ఇక అధికార వైసీపీ ఇటీవలే ఏపీ ఎన్నికల ప్రధానాధికారి ముకేష్ కుమార్ మీనాను కలిసి ఈ అంశంపై ఫిర్యాదు చేసింది. తెలంగాణలో ఓటు వేసిన వారు.. ఏపీలో ఓటు వేయకుండా చర్యలు తీసుకోవాలని కోరింది. ఏపీవాసులు చాలా మంది తెలంగాణలో సెటిలయ్యారన్న వైసీపీ.. వారిలో చాలామందికి ఏపీలో కూడా ఓటు ఉందని ఫిర్యాదులో పేర్కొంది. ఈ నేపథ్యంలో డబుల్ ఓట్లపై చర్యలు తీసుకోవాలని కోరింది.

మరోవైపు వైసీపీ ఫిర్యాదులపై ఏపీ ఎన్నికల సంఘం స్పందించింది. హైదరాబాద్, చెన్నై, బెంగళూరు సహా ఇతర రాష్ట్రాల్లో ఓటుహక్కు ఉన్నవారు ఏపీ ఎన్నికల్లో ఓటు వేయకుండా చర్యలకు సిద్ధమైంది. డూప్లికేట్, డబుల్ ఓట్లపై ఈ మేరకు కీలక ఆదేశాలు జారీ చేసింది. దీనికి సంబధించి అన్ని జిల్లాల కలెక్టర్లకు ఎన్నికల ప్రధానాధికారి ముఖేష్ కుమార్ మీనా ఆదేశాలు జారీ చేశారు. ఒక వ్యక్తికి ఒకే నియోజకవర్గం, ఒకే రాష్ట్రంలో ఓటు ఉండాలన్న సీఈవో ముకేష్ కుమార్ మీనా... ఎక్కువ చోట్ల ఓటు ఉండటం నిబంధనలకు విరుద్దమని ఆదేశాల్లో పేర్కొన్నారు. ఫామ్ 6 ద్వారా కొత్త ఓటు నమోదు మాత్రమే చేయాలన్న ఎన్నికల సంఘం.. కొత్తగా ఓటు నమోదు చేసుకునేందుకు డిక్లరేషన్ తీసుకోవాలని సూచించింది. వేరే ఎక్కడ ఓటు లేదని డిక్లరేషన్ ఇచ్చిన తర్వాతే ముందుకు వెళ్లాలని పేర్కొంది, తప్పుడు డిక్లరేషన్ ఇచ్చే వారిపై కేసులు పెట్టాలని ఈసీ పేర్కొంది. తప్పుడు డిక్లరేషన్‌తో ఓటుకోసం దరఖాస్తు చేస్తే జైలు శిక్ష విధించాలని ఈసీ తన ఆదేశాల్లో పేర్కొంది. 20 ఏళ్లు పైబడిన యువత ఓటు హక్కుకోసం ఫామ్ 6 ద్వారా దరఖాస్తు చేస్తే అధికారులు విచారించి రిమార్క్‌ ఇవ్వాలన్న ఈసీ... ఎక్కడ నివాసం ఉంటే అక్కడే ఓటు హక్కు ఇవ్వాలని పేర్కొది. ఇళ్లు మారే వ్యక్తులు ఫామ్ 8 ద్వారా డిక్లరేషన్ ఇవ్వాలని సూచిస్తూ అన్ని జిల్లాల కలెక్టర్లకు రాష్ట్ర ఎన్నికల ప్రధానాధికారి ముఖేష్‌కుమార్‌ మీనా ఆదేశాలు జారీ చేశారు.

మరోవైపు ప్రతిపక్షాల ఓట్లను అధికార వైసీపీ తొలగిస్తోందంటూ టీడీపీ అధినేత చంద్రబాబు ఎన్నికల సంఘానికి లేఖరాశారు.ఎలక్టోరల్‌ మాన్యువల్‌ 2023 ప్రకారం మార్పులు జరగట్లేదన్న చంద్రబాబు.. క్షుణ్నంగా పరిశీలించి డబుల్‌ ఎంట్రీలను తొలగించాలని కోరారు. టీడీపీ వెల్లడించిన అభ్యంతరాలపై దృష్టి పెట్టాలని కోరారు. ఓట్లను తొలగించాలంటే కచ్చితమైన ఆధారాలు చూపించాలన్న టీడీపీ అధినేత.. ఎలాంటి విచారణ లేకుండానే ఓట్లను తొలగిస్తున్నారని ఫిర్యాదుచేశారు. ఓట్ల అవకతవకలు పునరావృతం కాకుండా చూడాలంటూ ఈసీకి రాసిన లేఖలో చంద్రబాబు కోరారు.