నగ్న వీడియోలు బయటపెడతా.. పంజాబ్ సీఎం మాజీ భార్య వార్నింగ్

పంజాబ్ ముఖ్యమంత్రి భగవంత్ మాన్ చిక్కుల్లో పడుతున్నారు. సొంత కుటుంబం నుంచే ఆయన విమర్శలు, ఆరోపణలు ఎదుర్కొంటున్నారు. భగవంత్ మాన్ గురించి మొదటి భార్య కూతురు చేసిన సంచలన ఆరోపణలు మరువకముందే మాజీ భార్య సంచలన వ్యాఖ్యలు చేశారు. భగవంత్ మాన్ నగ్నవీడియోలు బయటపెడతానంటూ ఆయన మాజీ భార్య ఇంద్రప్రీత్ కౌర్ గ్రేవాల్ హెచ్చరించారు. సోషల్ మీడియా వేదికగా ఆమె ఈ పోస్ట్ చేసినట్లు తెలుస్తోంది. దీనికి సంబంధించిన స్క్రీన్ షాట్లను శిరోమణి అకాళీదల్ పార్టీ అధికార ప్రతినిధి పరంబన్స్ సింగ్ రోమానా షేర్ చేశారు.

ఫేస్‌బుక్‌లో ఓ న్యాయవాది పోస్టుకు ప్రీత్ గ్రేవాల్ ఈ రిప్లై ఇచ్చినట్లు తెలిసింది. పంజాబ్ సీఎం భగవంత్ మాన్ మద్యం తాగుతూ నగ్నంగా ఉన్న వీడియోలను బయటపెడతానంటూ ఆమె వ్యాఖ్యానించారు. ఈ పోస్టుకు సంబంధించిన స్క్రీన్ షాట్లను ట్విటర్‌లో పంచుకున్న శిరోమణి అకాళీదల్ అధికార ప్రతినిధి పరంబన్స్ సింగ్ రోమానా.. పంజాబ్ లాంటి పవిత్రభూమికి ఇలాంటి వ్యక్తి సీఎంగా ఉన్నాడంటూ విమర్శించారు. కుటుంబానికి, పంజాబ్ ప్రజలను మోసం చేసిన వ్యక్తిని దేవుడే శిక్షిస్తాడని ట్వీట్లో పేర్కొన్నారు.

మరోవైపు పంజాబ్ సీఎం కుమార్తె, మొదటి భార్య కూతురు సీరత్ కౌర్ మాన్ పేరిట కూడా సోషల్ మీడియాలో ఓ వీడియో వైరల్ అవుతోంది. తాను భగవంత్ మాన్ కుమార్తెనని పరిచయం చేసుకున్న సీరత్ మాన్.. అయితే నాన్న అని పిలిపించుకునే హక్కు ఆయన కోల్పోయాడని వీడియోలో పేర్కొంది. తాను ఇప్పుడు అతన్ని సీఎం మాన్ అనే పిలుస్తానని.. తమ కుటుంబాన్ని ఆయన్ను నిర్లక్ష్యం చేశారని విమర్శించింది. ఇన్నిరోజులు తాము మౌనంగా ఉండబట్టే.. ఆయన సీఎం స్థానానికి చేరుకోగలిగారంటూ ఆరోపించింది. సీఎం రెండో భార్య ప్రస్తుతం గర్భంతో ఉందన్న సీరత్..ఆయన మూడోసారి తండ్రి కాబోతున్నాడని తెలిపింది.

రాజకీయం చేయడం తన ఉద్దేశం కాదన్న సీరత్ మాన్ కౌర్.. భగవంత్ మాన్ గురించి అందరికీ తెలియాలనేదే తమ ఉద్దేశమని వీడియోలో పేర్కొంది. భగవంత్ మాన్ తమను పట్టించుకోలేదని, మానసికంగా వేధించారని ఆరోపించింది. ఫుల్లుగా మద్యం తాగడం, అబద్ధాలు చెప్పడం ఆయనకు అలవాటని ఆరోపించింది. ఈ వీడీయోలను సోషల్ మీడియాలో షేర్ చేస్తున్న బీజేపీ శ్రేణులు.. ఆప్ నేతలు వీటికి సమాధానాలు చెప్పాలని డిమాండ్ చేస్తున్నారు.