టాలీవుడ్ ప్రొడ్యూసర్‌కు పవన్ కళ్యాణ్ ప్రమోషన్.. జనసేన పార్టీలో కీలక పదవి

టాలీవుడ్ ప్రొడ్యూసర్ బన్నీ వాసుకు జనసేన పార్టీలో కీలక పదవి దక్కింది. ఆయన జనసేన పార్టీ ప్రచార విభాగం ఛైర్మన్‌గా నియమితులయ్యారు. ఈ మేరకు ఆ పార్టీ అధినేత పవన్ కళ్యాణ్.. మంగళగిరిలోని పార్టీ కార్యాలయంలో నియామక పత్రాలు అందించారు. పార్టీకి ప్రచార విభాగం కీలకమైందని.. పార్టీ ఆశయాలను బలంగా ప్రజల్లోకి తీసుకెళ్లడంతో పాటు రానున్న ఎన్నికల్లో అధికారమే లక్ష్యంగా పనిచేయాలని పవన్‌ సూచించారు. ఈ పదవి పార్టీకి కీలకమైనదని.. అందరితో సమన్వయం చేసుకుంటూ ముందుకు సాగాలని సూచించారు. పార్టీ కోసం మరింత కష్టపడాలన్నారు. తనకు ఈ బాధ్యతలు అప్పగించిన పవన్‌కు బన్నీ వాసు ధన్యవాదాలు తెలిపారు.

రాష్ట్రంలో యువతకు తీవ్ర అన్యాయం జరుగుతోందని.. మహిళాభివృద్ధిని కూడా ప్రభుత్వం గాలికి వదిలేసిందన్నారు పవన్ కళ్యాణ్. మంగళగిరిలోని పార్టీ కార్యాలయంలో విశాఖ వైఎస్సార్‌సీపీ కార్పొరేటర్‌ డాక్టర్‌ మహ్మద్‌ సాధిక్‌, ప్రకాశం జిల్లా దర్శి నియోజకవర్గానికి చెందిన గరికపాటి వెంకట్‌లు జనసేనలో చేరారు. వారిద్దరికీ పార్టీ అధినేత కండువాలు కప్పి ఆహ్వానించారు. టీడీపీ-జనసేన పొత్తును నమ్మి గెలిపించాలని.. ఉత్తరాంధ్ర మొత్తం వైఎస్సార్‌సీపీ విముక్త ప్రాంతం కావాలి అన్నారు. ఉద్దానం తరహాలో ప్రకాశం జిల్లాలో ఫ్లోరోసిస్‌, నిరుద్యోగం వంటి సమస్యలను శాశ్వతంగా పరిష్కరిస్తామన్నారు. అభివృద్ధి, విద్య, ఉపాధి అవకాశాలు వచ్చేలా విధానాలు తీసుకొస్తామన్నారు.

విభజన, జగన్‌ అరాచక పాలనతో తీవ్ర నష్టం జరిగిందని.. టీడీపీ- జనసేన పార్టీలో ప్రభుత్వం పదేళ్లు అధికారంలో ఉంటే రాష్ట్రం సస్యశ్యామలం అవుతుందన్నారు. ప్రకాశం జిల్లాలో యథేచ్ఛగా గనులు తవ్వుతున్నారే గానీ.. ప్రజల గోడు పట్టించుకోవడం లేదన్నారు. తన బాల్యంలో ఫ్లోరోసిస్‌ సమస్య కారణంగా తాము కనిగిరి నుంచి వెళ్లిపోయామన్నారు. ప్రకాశం జిల్లాలో టీడీపీ-జనసేన అభ్యర్థులను గెలిపించి.. వైఎస్సార్‌సీపీకి ఒక్క సీటు కూడా రాకుండా చేయాలన్నారు. ఈ జిల్లాలో ఎన్నికల కోసం రూ.150 కోట్లు ఖర్చుపెట్టే ఎమ్మెల్యేలు ఉన్నారు గానీ.. ప్రజల కష్టాలు తీర్చే నాథులే లేరన్నారు. ఫలితంగా జిల్లా ప్రజలు పొట్ట చేత పట్టుకుని వలసలు పోవాల్సిన దుస్థితి ఎదురవుతోందన్నారు. గత ఎన్నికల్లో వైఎస్సార్‌సీపీకి అవకాశం ఇచ్చారని.. ఈసారి టీడీపీ-జనసేన పార్టీలకు ఛాన్స్ ఇవ్వాలన్నారు. మరోవైపు పవన్ కళ్యాణ్ ఏపీ రాజకీయాలపై ఫుల్‌గా ఫోకస్ పెడుతున్నారు. ఎన్నికలకు మరో మూడు, నాలుగు నెలల సమయం మాత్రమే ఉండటంతో వారాహి యాత్రను ప్రారంభించాలని భావిస్తున్నారట. అయితే దీనిపై త్వరలోనే క్లారిటీ రానుంది.. అంతేకాదు టీడీపీ, జనసేన పార్టీలు కలిసి ఉమ్మడిగా సభలను కూడా ఏర్పాటు చేసే ఆలోచనలో ఉన్నట్లు సమాచారం.