దేశంలోనే తొలిసారి,,,సరోగసీ ద్వారా పుంగనూరు కోడెదూడ జననం
Andhra Pradesh Telugu | Suryaa Desk | Published : Wed, Dec 20, 2023, 06:57 PM
దేశంలోనే తొలిసారి ఓ నాటు ఆవుకు పుంగనూరు జాతి కోడెదూడ జన్మించింది. అన్నమయ్య జిల్లా రైల్వేకోడూరు సమీపంలోని శెట్టిగుంటలో మేలు జాతి పుంగనూరు కోడెదూడకు పశువైద్యులు జీవం పోశారు. చింతలదీవి పశు క్షేత్రంలో అభివృద్ధి చేసిన ఏడు రోజుల వయస్సున్న ఘనీకృత పుంగనూరు జాతి పిండాన్ని పమిడిగంటం హరిరావుకు చెందిన నాటు ఆవు గర్భంలో ఈ ఏడాది మార్చి 4న స్థానిక పశువైద్యుడు డాక్టర్‌ ప్రతాప్‌ ప్రవేశపెట్టారు. మే 25న ఈ నాటు ఆవు చూలు కట్టింది.
చూలుకాలంలో పశువు ఆరోగ్య పరిరక్షణ కోసం రూ.2,500 విలువైన దాణా, ఖనిజ లవణాలతో కూడిన మేతను ఆర్బీకే ద్వారా ఉచితంగా అందించారు. ఈ నాటు ఆవు ఈనెల 17వ తేదీ రాత్రి 9.30 గంటల సమయంలో మేలుజాతి పుంగనూరు జాతి కోడెదూడెకు జన్మనిచ్చింది. కోడెదూడ చాలా ఆరోగ్యంగా ఉందని పశువైద్యులు తెలిపారు. దేశంలోనే తొలిసారి ఇన్‌విట్రో ఫెర్టిలైజేషన్‌ అండ్‌ ఎంబ్రియో ట్రాన్సఫర్‌ విధానంలో పుంగనూరు కోడెదూడ జన్మించింది. అంతేకాదు గతేడాది ఒంగోలు ఆవుకు సాహివాల్‌ దూడ జన్మించిన సంగతి తెలిసిందే. ఈసారి నాటు ఆవు గర్భంలో సరోగసి విధానంలో పిండమార్పిడి చేసి మేలుజాతి పుంగనూరు దూడకు జన్మనిచ్చింది.
|
|