ఇది కదా అమ్మ ప్రేమ అంటే.. చావుకు ఎదురెళ్లి మరీ బిడ్డల ప్రాణాలు రక్షించిన తల్లి!

తన ఇద్దరు బిడ్డలను కాపాడుకునేందుకు ఓ తల్లి ప్రాణాలకు తెగించింది. ప్రమాదవశాత్తు రైల్వే ప్లాట్ ఫాం నుంచి రైలు పట్టాలపై ఇద్దరు పిల్లలతో కలిసి ఓ తల్లి పడిపోయింది. అయితే అప్పుడే రైలు కదలడంతో ఇద్దరు పిల్లలను పట్టాల మధ్యలో పెట్టి వారిపై పడుకుంది. వెంట్రుక వాసిలో ప్రాణాల నుంచి పిల్లలను రక్షించింది. ఈ ఘటన బిహార్‌లో చోటు చేసుకుంది. ఈ సంఘటనకు సంబంధించిన దృశ్యాలను అక్కడ ఉన్నవారు వీడియో తీసి సోషల్ మీడియాలో ఉంచడంతో తెగ వైరల్ అవుతున్నాయి. పిల్లలను కాపాడుకునేందుకు ఆ తల్లి చేసిన సాహసం పట్ల నెటిజన్లు హ్యాట్సాఫ్ చెబుతున్నారు. అసలేం జరిగిందంటే?

బిహార్‌కు చెందిన ఓ మహిళ తన ఇద్దరు బిడ్డలతో కలిసి సహా దిల్లీకి వెళ్లేందుకు బయల్దేరింది. బార్హ్‌ రైల్వేస్టేషన్‌లో విక్రమశిలా ఎక్స్‌ప్రెస్‌ కోసం వేచి ఉన్నారు. అప్పుడే బార్హ్ రైల్వే స్టేషన్‌కు విక్రమశిలా ఎక్స్‌ప్రెస్ చేరుకుంది. దీంతో రైలులోకి ఎక్కేందుకు ప్లాట్‌ఫామ్ మీద ఉన్న ప్రయాణికులు ఒక్కసారిగా ఎగబడ్డారు. దీంతో ఆ మహిళ తన ఇద్దరు పిల్లలతో సహా ఆ గుంపులో ఇరుక్కుపోయి.. అక్కడి నుంచి జారి రైలు పట్టాలపై పడిపోయింది. అప్పుడే రైలు కూడా కదలడం ప్రారంభించడంతో.. ఆమెకు ఏం చేయాలో అర్థం కాలేదు. ఎలాగైనా తన బిడ్డలను కాపాడుకోవాలని గట్టి సంకల్పాన్ని చేసుకుంది.

వెంటనే పక్కన పడిపోయిన ఇద్దరు బిడ్డలను దగ్గరికి తీసుకుని వారిని రెండు పట్టాల మధ్యలో ఉంచింది. వారు పైకి లేవకుండా తాను వారి ఇద్దరిపై పడుకుంది. రైలు వారిపై నుంచి పూర్తిగా వెళ్లిపోయే వరకు అలాగే కదలకుండా పడుకుంది. వారికి అతి దగ్గరగా.. వెంట్రుక దూరంలో రైలు వెళ్లినా వారికి ఏమీ కాలేదు. చివరికి రైలు వెళ్లిపోయాక.. అక్కడ ఉన్న ప్రయాణికులు.. ఆ మహిళతోపాటు ఇద్దరు పిల్లలను సురక్షితంగా ప్లాట్‌ఫాంపైకి తీసుకువచ్చారు. అనంతరం వారిని స్థానికంగా ఉన్న ఆస్పత్రికి తరలించి చికిత్స అందించారు. అయితే ఈ ఘటనకు సంబంధించిన దృశ్యాలను అక్కడ ఉన్న వారు వీడియో తీసి సోషల్ మీడియాలో ఉంచారు. ఆ వీడియో ప్రస్తుతం తెగ వైరల్‌గా మారింది.