ఒక్క కోడిగుడ్డు రూ.32.. రోజురోజుకూ దిగజారుతున్న పాక్ ఆర్థిక పరిస్థితి!

దాయాది దేశం పాకిస్థాన్‌ పరిస్థితి రోజు రోజుకూ దయనీయంగా మారుతోంది. ఇప్పటికే ఆర్థిక సంక్షోభంతో కొట్టుమిట్టాడుతున్న ఆ దేశం వద్ద విదేశీ మారక నిల్వలు పూర్తిగా అడుగంటిపోయాయి. దీంతో ప్రపంచ దేశాలు, ప్రపంచ సంస్థల వద్ద పాక్ అడుక్కుతింటోంది. ఒకవైపు.. పాకిస్థాన్‌లో ఆర్థిక సంక్షోభం కొనసాగుతుండగా.. మరోవైపు.. రాజకీయంగా తీవ్ర దుర్భిక్ష పరిస్థితులు నెలకొన్నాయి. మరోవైపు.. పాకిస్థాన్‌లో ఉగ్రదాడులతో ఆ దేశం ఉక్కిరిబిక్కిరి అవుతోంది. ఈ క్రమంలోనే నిత్యావసరాల ధరలు అమాంతం పెరిగిపోయాయి. పాకిస్థాన్‌లో ఒక్క కోడిగుడ్డు ధర ఏకంగా రూ.32 కు చేరిందంటే పరిస్థితి ఏ విధంగా ఉందో అర్థం చేసుకోవచ్చు.

దీంతో కోడి గుడ్లను కొనాలంటేనే పాకిస్థానీలు వణికిపోతున్నారు. పౌల్ట్రీ ఫామ్‌లలో ఉపయోగించే సోయాబీన్‌ సరఫరా తగ్గిపోవడంతోనే ప్రస్తుత పరిస్థితి తలెత్తిందని పాక్ వ్యాపార వర్గాలు తెలిపాయి. దీంతో గుడ్ల ధరలు అమాంతం పెరిగిపోయాయని చెబుతున్నారు. 30 డజన్ల గుడ్ల ధర రూ.10,500 నుంచి రూ.12,500కు పెరగడంతో ప్రజల్లో తీవ్ర ఆగ్రహ ఆవేశాలు వ్యక్తం అవుతున్నాయి. అయితే ధరలను అదుపు చేసేందుకు వ్యాపారులకు పాక్ ప్రభుత్వం హెచ్చరికలు జారీ చేస్తోంది. డజను గుడ్లను రూ.360 కి విక్రయించాలని ప్రభుత్వం చెప్పినప్పటికీ.. రిటైల్‌ వ్యాపారులు భారీగా లాభాలు దోచుకుంటున్నారు. ఈ క్రమంలోనే డజన్ గుడ్లను రూ.389 కి అమ్ముతున్నారు. దీంతో ఒక్కో కోడిగుడ్డు ధర రూ.32 కి చేరుకుంది.

అయితే పాకిస్థాన్‌లో ప్రధాని రాజీనామా చేయడంతో ఆపద్ధర్మ ప్రభుత్వం కొనసాగుతోంది. ఈ క్రమంలోనే సోయాబీన్స్‌ దిగుమతికి ప్రభుత్వం అనుమతి ఇచ్చినప్పటికీ.. దానికి సంబంధించిన నోటిఫికేషన్‌ను ఇంకా జారీ చేయలేదు. ఫలితంగా సోయాబీన్ దిగుమతిపై ప్రభావం పడింది. ఇక పాకిస్థాన్‌లో ద్రవ్యోల్బణం పెరుగుదల కొనసాగుతున్నట్లు ఆల్‌ పాకిస్థాన్‌ బిజినెస్‌ ఫోరం వెల్లడించింది. ద్రవ్యోల్బణం భారీగా పెరగడంతో పాకిస్థాన్‌లో ఆహారం, ఇంధనం ధరలు సహా నిత్యావసరాల ధరలు అమాంతం పెరుగుతున్నాయని పేర్కొంది. మరోవైపు.. . అమెరికా డాలర్‌తో పోలిస్తే పాకిస్తాన్ రూపాయి విలువ గణనీయంగా క్షీణించడం.. ఇంధన ఖర్చులు భారీగా పెరగడం వల్లే ఇలాంటి పరిస్థితులు తలెత్తుతున్నాయని చెప్పింది.