పాక్ ఎన్నికల బరిలో భారత మూలాలున్న హిందూ మహిళ.. ఎవరీ డాక్టర్ సవీరా ప్రకాష్

ఆర్థిక, రాజకీయ సంక్షోభంతో తీవ్రంగా కొట్టుమిట్టాడుతున్న పాకిస్థాన్‌లో ఫిబ్రవరిలో సార్వత్రిక ఎన్నికలు జరగనున్నాయి. ఈ క్రమంలోనే ఇప్పటికే నామినేషన్ల పర్వం ప్రారంభమైంది. అయితే ఖైబర్ పఖ్తుంఖ్వా ప్రావిన్స్‌లోని బునేర్ జిల్లా నుంచి డాక్టర్ సవీర్ ప్రకాష్ అనే మహిళ నామినేషన్ దాఖలు చేశారు. అయితే ఆమె భారత మూలాలున్న హిందూ మహిళ కావడం ప్రస్తుతం తీవ్ర ఆసక్తికరంగా మారింది. అయితే ఖైబర్ ఫఖ్తుంఖ్వా ప్రావిన్స్ నుంచి నామినేషన్ వేసిన తొలి మహిళగా.. ఎన్నికల్లో పోటీ చేస్తున్న తొలి హిందూ మహిళగా ఆమె ప్రస్తుతం వార్తల్లోకి ఎక్కారు. అయితే ఎన్నికల్లో పోటీకి సంబంధించి పాకిస్థాన్ ఎన్నికల సంఘం ఇటీవలె కీలక సవరణ చేసింది. దీని ప్రకారం జనరల్ స్థానాల్లో 5 శాతం సీట్లు మహిళలకు కేటాయించడం తప్పనిసరి చేసింది.

ఇక డాక్టర్ సవీరా ప్రకాష్ తండ్రి ఓం ప్రకాష్ భారతీయ మూలాలు ఉన్న వ్యక్తి. పాకిస్థాన్‌లో హిందూ సంఘాల పోరాట సమితిలో ఆయన ఒక సభ్యుడు కూడా. దీనికి తోడు బనర్ జిల్లాలో ఓం ప్రకాష్ ఒక పేరుపొందిన వైద్యుడు. మానవతా దృక్ఫథంతో ఎంతో మంది పేదలకు ఉచితంగా వైద్యం అందించిన వ్యక్తిగా ఓం ప్రకాష్‌కు ప్రత్యేక గుర్తింపు ఉంది. అయితే ఆయన ఈ మధ్యే వైద్య వృత్తికి దూరంగా ఉంటున్నారు. మరోవైపు.. 35 ఏళ్లుగా పాకిస్థాన్‌ పీపుల్స్‌ పార్టీలో ఓం ప్రకాష్ సభ్యుడిగా ఉన్నారు. అయితే తన తండ్రి ప్రత్యక్ష రాజకీయాల్లో లేనప్పటికీ.. డాక్టర్ సవీరా ప్రకాష్ తాను ఎన్నికల బరిలో నిలవాలని నిర్ణయించుకుంది. ఈ నేపథ్యంలోనే బునేర్‌ జిల్లాలోని పీకే-25 స్థానానికి డాక్టర్ సవీరా ప్రకాష్ సోమవారం నామినేషన్‌ పత్రాలను సమర్పించింది.

35 ఏళ్ల డాక్టర్‌ సవీరా ప్రకాష్ అబోట్టాబాద్‌ ఇంటర్నేషనల్‌ మెడికల్‌ కాలేజీ నుంచి 2022 లో ఎంబీబీఎస్‌ పట్టా అందుకున్నారు. ఇక గత కొన్నేళ్లుగా పాకిస్థాన్ పీపుర్స్ పార్టీ బునేర్‌ జిల్లా మహిళా విభాగానికి జనరల్‌ సెక్రటరీగా డాక్టర్ సవీరా ప్రకాష్ పనిచేస్తున్నారు. అయితే తాను వైద్య విద్య అభ్యసించే సమయంలో.. ప్రాక్టీస్ చేసే సమయంలో ఆస్పత్రుల్లో వసతుల లేమి తనను ఆలోచింపజేసేదని.. అదే తనను రాజకీయాల వైపు అడుగులు వేయడానికి కారణం అయిందని డాక్టర్ సవీర్ ప్రకాష్ వెల్లడించారు. ఈ ఎన్నికల్లో తాను విజయం సాధిస్తే.. హిందువుల బాగు కోసం కృషి చేయడంతో పాటు మహిళా సాధికారత.. సంక్షేమ సాధన కోసం కృషి చేస్తానని స్పష్టం చేశారు. మరోవైపు బునేర్‌ జిల్లా ప్రజలు మార్పు కోరుకుంటున్నారని.. ఇమ్రాన్‌ నోషాద్‌ ఖాన్‌ అనే ఒక సోషల్‌ మీడియా ఇన్‌ఫ్లుయెన్సర్‌ తెలిపాడు. ఈ క్రమంలోనే వారి అభివృద్ధి కోసం ఎన్నికల్లో పోటీ చేస్తున్న డాక్టర్ సవీరా ప్రకాష్‌కు మద్దతుగా తాను ఎన్నికల ప్రచారం నిర్వహిస్తానని స్పష్టం చేశాడు. ఇక పాక్‌ సార్వత్రిక ఎన్నికల పోలింగ్‌ వచ్చే ఏడాది ఫిబ్రవరి 8 వ తేదీన జరగనుంది.