న్యూ ఇయర్ వేడుకల్లో విషాదం.. ఘోర రోడ్డు ప్రమాదంలో ముగ్గురు మృతి

కొత్త ఏడాది తొలిరోజే వారి జీవితాల్లో చివరి రోజుగా మారింది. ఎంతో ఆనందంగా అప్పటివరకు న్యూ ఇయర్ సెలబ్రేషన్స్ చేసుకున్న ఆ యువకులు.. ఇంటికి చేరకుండానే అనంత లోకాలకు చేరారు. ప్రకాశం జిల్లాలో జరిగిన ఘోర రోడ్డు ప్రమాదంలో ముగ్గురు యువకులు అక్కడికక్కడే దుర్మరణం పాలయ్యారు. వారు ప్రయాణిస్తున్న బైక్.. ఎదురుగా వచ్చిన బొలేరో వాహనం ఒకదానికొకటి అతివేగంతో ఢీకొట్టడంతో ఘోర ప్రమాదం చోటు చేసుకుంది. దీంతో వైరు అక్కడికక్కడే మృతి చెందారు. ప్రకాశం జిల్లా బేస్తవారపేట మండలం శెట్టిచెర్ల అడ్డరోడ్డు వద్ద సోమవారం తెల్లవారుజామున ఈ ఘోర ప్రమాదం జరిగింది. బేస్తవారపేట పంచాయతీ పాపాయిపల్లికి చెందిన పవన్‌ (20), శ్రీనివాస్‌ (21), రాహుల్‌ (21) న్యూ ఇయర్ వేడుకలు జరుపుకున్నారు. అనంతరం టీ తాగేందుకు పందిళ్లపల్లి సమీపంలోని టోల్‌ప్లాజా వద్దకు బైక్‌పై వెళ్తుండగా.. ఈ ఘటన చోటు చేసుకుంది. ఈ క్రమంలోనే గిద్దలూరు నుంచి బేస్తవారపేట వైపు వెళ్తున్న బొలెరో వాహనం.. ఆ ముగ్గురు యువకులు ప్రయాణిస్తున్న బైక్‌ను ఎదురెదురుగా అతి వేగంగా ఢీకొంది. ఈ ప్రమాదంలో ముగ్గురు యువకులు అక్కడికక్కడే దుర్మరణం పాలయ్యారు. సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని పరిశీలించారు. ఆ ముగ్గురు యువకుల మృతదేహాలను పోస్టుమార్టం కోసం కంభం ప్రభుత్వాసుపత్రికి తరలించారు. ఈ మేరకు ఈ ఘటనపై కేసు నమోదు చేసుకుని.. దర్యాప్తు చేపట్టినట్లు ఎస్సై నరసింహారావు తెలిపారు. కొత్త ఏడాది రోజే జరిగిన ఘోర రోడ్డు ప్రమాదంలో ముగ్గురు యువకులు ప్రాణాలు కోల్పోవడంతో వారి కుటుంబాల్లో తీవ్ర విషాదం నెలకొంది. ఈ ఘటనతో ఆ 3 కుటుంబాలు రోదిస్తున్నాయి. చేతికి అంది వచ్చిన కొడుకులు చనిపోవడంతో ఆ తల్లిదండ్రులు రోదిస్తున్నారు.