అయోధ్యలోని రామమందిర ప్రాణప్రతిష్ఠకు ఏర్పాట్లు,,,,కాంగ్రెస్ కుటుంబంలో సోనియాకు మాత్రమే ఆహ్వానం

ఈ నెల 22న జరగబోయే అయోధ్యలోని రామమందిర ప్రాణప్రతిష్ఠకు ఏర్పాట్లు చివరి అంకానికి చేరుకుంటున్నాయి. ఈ కార్యక్రమానికి సినీ, రాజకీయ, వ్యాపార ప్రముఖులకు ఆహ్వానాలను పంపారు. కాంగ్రెస్ కుటుంబం విషయానికి వస్తే కేవలం సోనియా గాంధీని మాత్రమే ఆహ్వానించారు. రాహుల్ గాంధీ, ప్రియాంక గాంధీ వాద్రాలను పక్కనబెట్టారు. శ్రీరామ జన్మభూమి తీర్థ క్షేత్ర ట్రస్ట్ నిర్దేశించిన ప్రమాణాల ప్రకారం.. రాహుల్ గాంధీ, ప్రియాంక గాంధీలు ఆహ్వానాలను స్వీకరించడానికి అనర్హులని, కేవలం సోనియా గాంధీ మాత్రమే ఆహ్వానించారని విశ్వసనీయ వర్గాలు తెలిపాయి.

కాంగ్రెస్ పార్లమెంటరీ పార్ట్ చీఫ్ హోదాలో సోనియాను ఆలయ నిర్మాణ కమిటీ చైర్‌పర్సన్ నృపేంద్ర మిశ్రా ఆహ్వానించినట్లు సంబంధిత వర్గాలు తెలిపాయి. ప్రధాన పార్టీల అధ్యక్షులు.. లోక్‌సభ, రాజ్యసభలో ప్రతిపక్ష నాయకులు, 1984- 1992 మధ్యకాలంలో రామమందిర ఉద్యమంలో పాల్గొన్నవారు. ఇక, మూడు వర్గాల రాజకీయ అతిథులకు ట్రస్ట్ ఆహ్వానాలు పంపుతోంది. ప్రత్యేక అతిథులలో స్వామీజీలు, పారిశ్రామికవేత్తలు, కళాకారులు, క్రీడాకారులు ఉన్నారు.

వీహెచ్‌పీ వర్కింగ్ ప్రెసిడెంట్ అలోక్ కుమార్ ఇటీవల రాజ్యసభలో ప్రతిపక్ష నేతగా ఉన్న కాంగ్రెస్ అధ్యక్షుడు మల్లికార్జున్ ఖర్గేను ఆహ్వానించారు. 2014 నుంచి లోక్‌సభకు అధికారికంగా ప్రతిపక్ష నాయకుడు లేకపోవడంతో కాంగ్రెస్ హౌస్ లీడర్ అధీర్ రంజన్ చౌదరికి ఆహ్వానం పంపింది. ఎస్పీ అధ్యక్షుడు అఖిలేశ్ యాదవ్, బీఎస్పీ చీఫ్ మాయావతికి త్వరలో ఆహ్వానాలు పంపుతామని ట్రస్ట్ వర్గాలు పేర్కొన్నాయి. వీరితో పాటు బీజేపీ సీనియర్ నేతలు ఎల్‌కే అద్వాణీ, మురళీ మనోహర్ జోషిలను ఇప్పటికే ఆహ్వానించారు.

‘రాముడు అందరివాడు.. వివక్ష ఉండదు. వేడుకకు రాజకీయ భావాలు ఉండకూడదని మేము నిర్ణయించుకున్నాం’ అని వీహెచ్‌పీ జాతీయ సెక్రటరీ జనరల్ మిలింద్ పరాండే చెప్పారు. ఒకప్పుడు రాముడి ఉనికిని సవాల్ చేసిన వారిని కూడా స్వాగతిస్తామని ఆయన వివరించారు. బీజేపీ, ఆర్‌ఎస్‌ఎస్‌లు మతాన్ని రాజకీయ సాధనంగా వాడుకుంటున్నారని ఆరోపిస్తూ పలువురు విపక్ష నేతలు రామమందిర ప్రతిష్ఠకు హాజరు కాబోమని చెప్పిన కొద్ది రోజుల తర్వాత విహెచ్‌పీ నేత ఈ ప్రకటన చేయడం గమనార్హం. సీపీఐ, తృణమూల్ కాంగ్రెస్‌తో సహా కొన్ని పార్టీలు వేడుకలో పాల్గొనేందుకు నిరాకరించడం విడ్డూరంగా ఉందని పరండే విమర్శించారు. ‘రామజన్మభూమి ఉద్యమానికి మద్దతివ్వాలి, కానీ వారు చేయలేదు. ఇప్పుడు, దీర్ఘకాలంగా ఎదురుచూస్తున్న రామాలయం సాకారం కావడం వల్ల దానిని సమర్థించిన వారు ప్రయోజనం పొందితే వారు అసూయపడకూడదు.’ అని పరోక్షంగా ప్రతిపక్ష పార్టీల తీరుపై విమర్శలు గుప్పించారు. అయితే, మందిర ప్రారంభోత్సవ వేడుక రాజకీయ వివాదానికి కేంద్రంగా మారుతోంది.