రోగం వస్తే ఆస్పత్రికి వెళ్తారా లేక గుడికా.. అయోధ్యపై బిహార్ మంత్రి

అయోధ్యలో రామ మందిర ప్రాణ ప్రతిష్ఠకు సమయం ఆసన్నమవుతోంది. బీజేపీని విమర్శించే క్రమంలో బిహార్ మంత్రి, ఆర్జేడీ నేత చంద్రశేఖర్ చేసిన వ్యాఖ్యలు.. అయోధ్య రామ మందిర ప్రారంభోత్సవం వేళ తీవ్ర వివాదానికి దారి తీశాయి. ఈ క్రమంలోనే అయోధ్య రామాలయం గురించి బిహార్ విద్యాశాఖ మంత్రి చంద్రశేఖర్ చేసిన వ్యాఖ్యలు తీవ్ర వివాదాస్పదంగా మారాయి. ఏదైనా అనారోగ్యం బారిన పడిన వారు ఆస్పత్రికి వెళ్లి చికిత్స పొందుతారా లేక దేవుడి గుడికి వెళ్లి మొక్కుతారా అంటూ మంత్రి చంద్రశేఖర్ చేసిన వ్యాఖ్యలు పెను దుమారానికి కారణం అయ్యాయి.

ప్రజలు అస్వస్థతకు గురైనపుడు గానీ లేక గాయపడినపుడు గానీ వారు ఆలయాలను సందర్శించకుండా ఆస్పత్రులకు వెళ్లి చికిత్స తీసుకుంటారని చంద్రశేఖర్ పేర్కొన్నారు. ఒకవేళ మీరు గాయపడినపుడు ఎక్కడికి వెళ్తారు. దేవాలయాలకా లేక ఆస్పత్రికా అని మీడియా సమావేశంలో ప్రశ్నించారు. ఒకవేళ ఎవరైనా చదుకోవాలన్నా.. అధికారి కావాలన్నా.. ఎమ్మెల్యే, ఎంపీ కావాలని ఆశ ఉన్నా గుడికి వెళ్తారా లేక చదువుకోవడానికి స్కూళ్లకు వెళ్తారా అని ప్రశ్నించారు. ఈ సందర్భంగానే సూడో హిందుత్వ వాదులు, సూడో జాతీయ వాదుల పట్ల అప్రమత్తంగా ఉండాలని ప్రజలకు సూచించారు.

ఈ సందర్భంగా దేవాలయాలను విమర్శిస్తూ, విద్యాలయాలను కొనియాడుతూ బిహార్‌లో పోస్టర్లు వేసిన ఆర్జేడీ ఎమ్మెల్యే ఫతే బహదూర్ సింగ్‌కు తన మద్దతును తెలియజేసిన చంద్రశేఖర్ సావిత్రీబాయి ఫూలే కూడా అదే చెప్పారని అన్నారు. చదువుకోవాలని సావిత్రిబాయి పూలే కూడా చెప్పారని.. అదే మాటను ఫతే బహదూర్ సింగ్ కూడా చెప్పారని.. అందులో తప్పేముందని ప్రశ్నించారు. దేవాలయాల కోసం కేటాయించిన స్థలాలను దోపిడీ స్థలాలుగా మార్చారని చంద్రశేఖర్ సంచలన ఆరోపణలు చేశారు.

ఇక అయోధ్యలో ఈ నెల 22 వ తేదీన జరగనున్న రామ మందిర ప్రారంభోత్సవం గురించి కేంద్రంలో అధికారంలో ఉన్న బీజేపీ రాజకీయాల కోసం వాడుకుంటున్నారని ప్రతిపక్షాలు తీవ్ర స్థాయిలో విమర్శలు గుప్పిస్తున్నాయి. రామ మందిరాన్ని ఎన్నికల్లో రాజకీయ పావుగా బీజేపీ ఉపయోగిస్తోందని తీవ్ర విమర్శలు గుప్పిస్తున్నారు. కొంత మంది రాజకీయ ప్రముఖలకు ఆహ్వానం అందించకపోవటం పట్ల బీజేపీపై మండిపడుతున్నారు.