నా పోరాటం అధికారులతోనే.. జగన్‌తో కాదు: శింగనమల ఎమ్మెల్యే

వైఎస్ఆర్సీపీలో ఇన్‌ఛార్జుల మార్పులతో సిట్టింగ్ ఎమ్మెల్యేలు అధిష్టానంపై ఆగ్రహం వ్యక్తం చేస్తున్నారు. బహిరంగంగానే విమర్శలు చేస్తున్నారు. శింగనమల ఎమ్మెల్యే జొన్నలగడ్డ పద్మావతి ఫేస్‌బుక్ లైవ్‌లో మాట్లాడిన వీడియో వైరల్ అవ్వడంతో ఆమెకు సీఎంవో నుంచి పిలుపు వచ్చింది. వీడియోపై వివరణ ఇవ్వాలని ఎమ్మెల్యే పద్మావతిని జగన్ కోరినట్టు తెలుస్తోంది. ముఖ్యమంత్రితో భేటీ అనంతరం శింగనమల ఎమ్మెల్యే మీడియా ముందు మాట్లాడారు. తాను పోరాడుతుంది అధికారులతోనే కాని, అధినేత జగన్‌పైన కాదని పద్మావతి అన్నారు.

ఒక వర్గం మీడియా తనపై తప్పుడు కథనాలను రాస్తుందని, తన మాటలను వక్రీకరించారని ఆమె మండిపడ్డారు. తాను యూటర్న్ తీసుకోలేదని, తాను రైట్ టర్న్‌లోనే ఉన్నానని చెప్పారు. ఎస్సీ మహిళ మాట్లాడితే వారి స్వప్రయోజనాల కోసం మార్చి రాశారని ఎమ్మెల్యే ఆగ్రహం వ్యక్తం చేశారు. తాను అన్న ప్రతి మాటలను జగనన్నకు ఆపాదించారని, నియోజకవర్గంలో ఉన్న సమస్యలను తాను ప్రస్తావించాను తప్పించి ఆయనను ఏనాడు వ్యతిరేకించలేదని వివరణ ఇచ్చారు. తాను పక్క నియోజకవర్గ ఎమ్మెల్యేలపై మాత్రమే విమర్శలు చేశానని పేర్కొన్నారు.

ఎవరి కుటుంబంలో విభేదాలు లేవని ఆమె ప్రశ్నించిన ఆమె... జగనన్నను విత్తనంలా భూమిలో పాతిపెడితే చెట్టుగా మొలుస్తాడు.. బంతి అనుకుని కొడితే డబుల్ స్పీడ్‌తో వస్తాడన్నారు. జగనన్న కోరుకున్న విధంగా 175 స్థానాలలో విజయం సాధించాలని చెప్పారు. తాను ఎన్నడూ జగనన్న సైనికురాలినేని అన్నారు. జగన్ పై వ్యతిరేక ప్రచారం చేసే వారంతా ఖచ్చితంగా రాష్ట్ర సరిహద్దులే కాదు దేశం దాటి పోవాల్సిందేనని అన్నారు. తనపై తప్పుడు ప్రచారం చేస్తే న్యాయస్థానాన్ని ఆశ్రయిస్తానని జొన్నలగడ్డ పద్మావతి హెచ్చరించారు. జగనన్న వద్ద ఎమ్మెల్యేగా ఉండటం తన పూర్వజన్మ సుకృతంగా భావిస్తానని తెలిపారు.

‘గతంలో చేసిన తప్పులను సరిదిద్దడానికి ఐదేళ్లలో చాలా కష్టపడుతున్నాం.. మరో 30 ఏళ్లు జగన్ సీఎంగా ఉంటే తప్పా రాష్ట్రంలో అధికారులు గానీ, ప్రతి ఒక్కరి ఆలోచనా విధానం మారే అవకాశం లేదు.. జగనన్న లాంటి వాళ్లు కుల, మతాలకు అతీతంగా సంక్షేమ పథకాలు పెట్టారు.. ఇన్నీ చేస్తున్నా ఓ మీడియా ఇష్టమొచ్చినట్టు మాట్లాడుతున్నారు.. బయట ఏం మాట్లాడకూడదా?’ అని ఆమె ప్రశ్నించారు. అనవసరంగా ఎక్కడికక్కడ నా మాటలను వక్రీకరించి, పద్మావతి పార్టీకి గుడ్ బై చెబుతోందని, ఎదురు తిరిగిందని బురదజల్లే ప్రయత్నం చేస్తున్నారని మండిపడ్డారు. అప్పటికి ఇప్పటికీ ఎప్పటికీ నేను జగన్‌కు విధేయురాలినే.. రాజకీయంగా ఓనమాలు తెలియని నన్ను ఈ స్థాయికి తీసుకొని వచ్చారని ఎమ్మెల్యే స్పష్టం చేశారు.