అయోధ్య ప్రతిష్ఠ రోజున కర్ణాటక ఆలయాల్లో ప్రత్యేక పూజలు.. డీకే శివకుమార్

అయోధ్య రామమందిరం ప్రాణప్రతిష్ఠను పురస్కరించుకుని రాష్ట్రవ్యాప్తంగా ఆలయాల్లో ప్రత్యేక పూజలు, మంగళ హారతి నిర్వహించాలని కర్ణాటక ప్రభుత్వం రెండు రోజుల కింద ఉత్తర్వులు వెలువరించింది. ఈ నిర్ణయాన్ని తాజాగా కర్ణాటక డిప్యూటీ సీఎం, కాంగ్రెస్ ట్రబుల్ షూటర్ డీకే శివకుమార్ సమర్దించారు. అంతిమంగా మేము హిందువులమని, ఏ మతం లేదా చిహ్నం ఏ ఒక్కరికీ సొంతం కాదని పరోక్షంగా బీజేపీని ఉద్దేశించి ఆయన వ్యాఖ్యలు చేశారు.జనవరి 22న దేవాదాయ శాఖ పరిధిలో ఉన్న 34,000 దేవాలయాల్లో ప్రత్యేక పూజలు నిర్వహించాలని దేవాదాయ శాఖ మంత్రి రామలింగా రెడ్డి ఆదేశించారు.

రామ మందిరంలో విగ్రహాన్ని ప్రతిష్టించే సమయంలో అన్ని ముజ్రాయ్ ఆలయాల్లో ప్రత్యేక పూజలు నిర్వహించాలని ఆదేశించినట్టు ట్వీట్ చేశారు. రామాలయంలో ప్రాణప్రతిష్ఠ శుభ సందర్భాన్ని పురస్కరించుకుని దేవాలయాలను ఈ కార్యక్రమంలో భాగస్వామ్యం చేసేందుకు ప్రత్యేక పూజలు, మంగళ హారతి నిర్వహిస్తున్నట్టు చెప్పారు. ఈ అంశంపై మీడియా అడిగిన ప్రశ్నకు డిప్యూటీ సీఎం స్పందిస్తూ.. హిందువులుగా ఆలయాల్లో పూజలు జరిపించాలని ఆదేశించామని పేర్కొన్నారు. అలాగే, ప్రతిష్ఠా మహోత్సవానికి కాంగ్రెస్ పార్టీ హాజరవుతుందా? అని ప్రశ్నించగా.. త్వరలోనే నిర్ణయం వస్తుందని చెప్పారు.

‘మేము హిందువులం.. ప్రాణప్రతిష్ఠకు హాజరైతే తప్పేముంది? ఇదేమీ ప్రయివేట్ కార్యక్రమం కాదు.. వేడుకకు హాజరుపై ఏఐసీసీ నిర్ణయం త్వరలోనే వస్తుంది’ అని శివకుమార్ అన్నారు. ఇదే సమయంలో కేంద్ర ప్రభుత్వంపై విమర్శలు గుప్పించారు. ఆహ్వానితుల జాబితాపై కేంద్రం ఏరికోరి నిర్ణయం తీసుకుంటోందని పేర్కొన్నారు. కాగా, అయోధ్య ప్రాణ ప్రతిష్టకు హాజరు కావాలనుకుంటున్న కర్ణాటక కాంగ్రెస్ నేతలకు ఆ పార్టీ గ్రీన్ సిగ్నల్ ఇచ్చినట్టు తెలుస్తోంది. డీకే వ్యాఖ్యలపై కేంద్ర మంత్రి ప్రహ్లాద్ జోషి మాట్లాడుతూ.. చివరకూ కాంగ్రెస్ పార్టీకి జ్ఞానోదమైందని ఎద్దేవా చేశారు. జనవరి 22న అయోధ్యలో రామ్ లల్లావిగ్రహ ప్రాణ ప్రతిష్ట కార్యక్రమం జరుగుతోంది. ఈ వేడుకకు ప్రధాని నరేంద్ర మోదీ, యూపీ సీఎం యోగీ ఆదిత్యనాథ్‌తో పాటు పలువురు ప్రముఖులను శ్రీ రామ జన్మభూమి తీర్థ క్షేత్ర ట్రస్టు ఆహ్వానించింది.