దంపతులే టార్గెట్‌గా బొద్దింకలు, సాలె పురుగులు, పందిని డెలివరీ చేసిన ఈ కామర్స్ వెబ్‌సైట్.. రూ.25 కోట్లు ఫైన్

సాధారణంగా మనం ఏదైనా ఆన్‌లైన్ డెలివరీ ప్లాట్‌ఫామ్‌లలో వస్తువులు ఆర్డర్ పెడుతూ ఉంటాం. అయితే ఆ దంపతులు ఏం ఆర్డర్ పెట్టకుండానే ఇంటికి వస్తువులు డెలివరీ అవుతున్నాయి. ఇదేదో బాగుందే అని అనుకోకండి. ఎందుకంటే అందులో రకరకాల భయంకరమైన వస్తువులను పంపిస్తున్నారు. అది చూసి విసిగిపోయిన ఆ దంపతులు కోర్టులో ఫిర్యాదు చేశారు. విచారణ చేపట్టిన కోర్టు.. ఈ వ్యవహారంలో సిబ్బందిని దోషులుగా తేల్చింది. ఈ వ్యవహారాన్ని సెటిల్ చేసుకోవాలని సదరు కంపెనీ బాధిత దంపతులతో ఒక ఒప్పందానికి వచ్చింది. వారికి ఏకంగా రూ.25 కోట్లు పరిహారం చెల్లించేందుకు సిద్ధమైంది. ఈ సంఘటన అమెరికాలో చోటు చేసుకుంది.

అమెరికాలోని మసాచూసెట్స్కు చెందిన ఐనా, డేవిడ్ స్టీనర్ అనే దంపతులు ఆన్‌లైన్ న్యూస్ లెటర్‌లో ఈబే అనే ఆన్‌లైన్ ఈ కామర్స్ వెబ్‌సైట్ గురించి వ్యతిరేకంగా కథనాలు రాసేవారు. అయితే దాని వల్ల తమ కంపెనీ పరువు పోతుందని గుర్తించిన ఈబే సంస్థ చర్యలు చేపట్టింది. ఈ క్రమంలోనే ఈబే సంస్థకు చెందిన ఉద్యోగులు ఐనా, డేవిడ్ స్టీనర్ దంపతులకు నరకం చూపించారు. దాదాపు ఏడుగురు ఉద్యోగులు.. ఆ దంపతులపై కక్షగట్టి.. రకరకాలుగా వేధింపులకు గురి చేశారు. బతికి ఉన్న బొద్దింకలు, సాలె పురుగులతోపాటు ఏకంగా చనిపోయిన పందిని సైతం వారి ఇంటికి డెలివరీ చేశారు.

వాటితోపాటు శవాలపై ఉంచే పూల దండ, చూడటానికే అసహ్యకరంగా ఉండే పంది మాస్క్‌లను పంపించేవారు. జీవిత భాగస్వామి చనిపోతే ఎలా మనుగడ సాగించాలంటూ రాసిన ఒక పుస్తకాన్ని కూడా ఐనా, డేవిడ్ స్టీనర్ ఇంటికి పంపారు. ఇలా ఆన్‌లైన్ డెలివరీలతోనే కాకుండా వారి కారుకు జీపీఎస్ ట్రాకర్ అమర్చి వెంబడించి మరీ వేధిస్తూ తీవ్ర భయాందోళనలకు గురి చేశారు. ఇలా 2019 ఆగస్ట్ 5 వ తేదీ నుంచి 23 వ తేదీ వరకు ఐనా, డేవిడ్ స్టీనర్ దంపతులకు చుక్కలు చూపించారు ఈబే సంస్థ ఉద్యోగులు. ఇక ఈబే సంస్థ వేధింపులకు తాళలేని ఆ దంపతులు చివరికి కేసు నమోదు చేసి కోర్టుకు ఎక్కారు.

ఈ కేసులో విచారణ జరిపిన కోర్టు 2022 సెప్టెంబరులో ఈబే సంస్థకు చెందిన ఏడుగురు సిబ్బందిని దోషులుగా తేల్చి వారికి శిక్షలు ఖరారు చేసింది. ఈ ఏడుగురిలో అప్పటి ఈబే సీనియర్ డైరెక్టర్ ఆఫ్ సేఫ్టీ అండ్ సెక్యూరిటీ జిమ్ బాగ్ సహా మరో ఆరుగురు సిబ్బంది ఉన్నారు. ఈ ఘటనతో ఆ ఏడుగురు సిబ్బందిని ఉద్యోగాల నుంచి ఈబే కంపెనీ తొలగించింది. అయితే ఈ కేసులో తాజాగా ఈబే కంపెనీ బాధిత దంపతులతో సెటిల్‌మెంట్ చేసుకుంది. ఐనా, డేవిడ్ స్టీనర్ దంపతులకు 30 లక్షల డాలర్లు అంటే భారత కరెన్సీలో రూ. 24.86 కోట్లను పరిహారంగా ఇచ్చేందుకు అంగీకరించింది. ఐనా, డేవిడ్ స్టీనర్ రాసిన కథనాల వల్ల ఈబేపై ప్రభావం పడుతుందని.. ఫార్చూన్ 500 కంపెనీల జాబితా నుంచి కంపెనీ కిందికి జారిపోయే ప్రమాదం ఉందన్న భయంతోనే వారిని వేధింపులకు గురిచేసినట్లు ఆ సంస్థ అంగీకరించింది. ఉద్యోగుల చర్యలకు ఆ కంపెనీ బాధ్యత వహిస్తూ సెటిల్మెంట్ చేసుకున్నట్లు ఎఫ్బీఐ బోస్టన్ డివిజన్ ఆఫీసర్ జోడి కోహెన్ చెప్పారు.