కుక్క మాంసం తింటే 3 ఏళ్లు జైలు శిక్ష.. కొత్త చట్టం తీసుకొచ్చిన ప్రభుత్వం

మనిషి సాధారణంగా ఎన్నో రకాల జంతువులను చంపి తన ఆహారం కోసం తింటూ ఉంటాడు. కొంత మంది, కొన్ని ప్రాంతాల్లో తినే జంతువులు గానీ, పక్షులు గానీ, కీటకాలు గానీ మరో ప్రాంతంలో, మరికొందరి వ్యక్తులకు అస్సలు నచ్చదు. కానీ ఎవరి ఆహారపు అలవాట్లకు అనుగుణంగా వారు తింటూ ఉంటారు. అయితే మన దగ్గర కుక్క మాంసాన్ని తినడం చాలా చాలా తక్కువ. కొన్ని ఈశాన్య రాష్ట్రాలు.. మరీ ముఖ్యంగా నాగాలాండ్‌లోని కొన్ని తెగలకు చెందిన వారు కుక్క మాంసాన్ని తమ ఆహారంగా తీసుకుంటారు. అయితే తాజాగా ఒక దేశ ప్రభుత్వం సంచలన చట్టం తీసుకువచ్చింది. కుక్క మాంసం తినేవారికి జైలు శిక్ష విధించాలని ఆ చట్టంలో పొందుపర్చింది.

దక్షిణ కొరియా దేశం ఈ చారిత్రాత్మక నిర్ణయాన్ని తీసుకుంది. అక్కడ కుక్క మాంసం విక్రయాలపై నిషేధం విధించింది. 2027 నాటికి కుక్కలను చంపడం, కుక్కల మాంసాన్ని అమ్మడం వంటి వాటిని నిలిపివేయాలని లక్ష్యంగా పెట్టుకుంది. ఈ క్రమంలోనే ఈ కొత్త చట్టానికి ఆమోదం కల్పించింది. అనాదిగా వస్తున్న ఆచారానికి స్వస్తి పలకడమే లక్ష్యంగా కుక్క మాంసం తినడంపై నిషేధం విధిస్తూ ఈ చట్టాన్ని తీసుకువచ్చింది.

కుక్క మాంసం వినియోగాన్ని నిషేధిస్తూ ద‌క్షిణ కొరియా పార్ల‌మెంట్ తాజాగా కొత్త‌ బిల్లుకు ఆమోదం కల్పించింది. ఆ దేశ అసెంబ్లీలో కుక్క మాంసం నిషేధంపై నిర్వహించిన ఓటింగ్ ఏకగ్రీవం అయింది. 208-0 ఓట్ల తేడాతో ఆ తీర్మానాన్ని అధికార, ప్రతిపక్ష సభ్యులంతా ఆమోదించారు. ఎన్నో శ‌తాబ్దాల నుంచి ద‌క్షిణ కొరియాలో కుక్క మాంసం తినడం అలవాటుగా ఉంది. తాజాగా అమల్లోకి వచ్చిన కొత్త చట్టం ప్ర‌కారం.. కుక్క‌ల్ని చంప‌డం, బ్రీడింగ్ చేయ‌డం, ట్రేడింగ్‌, అమ్మ‌కాలు నిషేధం. 2027 నాటికి పూర్తిగా నిషేధం విధించనున్నారు. ఆ త‌ర్వాత ఎవ‌రైనా కుక్క మాంసాన్ని వినియోగిస్తే వాళ్ల‌కు మూడేళ్ల వ‌ర‌కు జైలు శిక్ష విధించ‌నున్నారు.

అయితే గత కొన్ని దశాబ్దాలలో కుక్క మాంసానికి వినియోగదారుల నుంచి పెద్దగా స్పందన లేదు. మరీ ముఖ్యంగా యువత ఈ కుక్క మాంసానికి దూరంగా ఉంటున్నారు. ఎన్నో ఏళ్ల నుంచి ఈ కుక్క మాంసం వినియోగాన్ని నిషేధించాలని ఒత్తిడి తెచ్చిన జంతు హక్కుల సంఘాలు ఈ కొత్త చట్టం తీసుకురావడాన్ని స్వాగతించాయి. అయితే ఈ నిషేధానికి వ్యతిరేకంగా రైతులు ప్రచారం చేశారు. ఈ వ్యాపారంతో సంబంధం ఉన్న చాలా మంది చాలా ఏళ్లుగా ఇదే పని చేస్తున్నారని.. ఇప్పటికిప్పుడు నిషేధం విధిస్తే తమ జీవనాధారం ఏంటి అని ప్రశ్నిస్తున్నారు. ప్రభుత్వం తెలిపి వివరాల ప్రకారం.. 2023 లో దక్షిణ కొరియాలో దాదాపు 1600 కుక్క మాంసం రెస్టారెంట్లు.. 1150 డాగ్ ఫామ్‌లు ఉన్నాయి.