50 కిలోమీటర్ల దూరంలో ప్రయాణికుడిని దించేసిన బస్సు.. రూ.2 లక్షల నష్టపరిహారం చెల్లింపు

మనం ఏదైనా దూర ప్రయాణాలకు వెళ్లాలంటే ట్రావెల్స్ బస్‌లో సీట్ బుక్ చేసుకుంటాం. అయితే ఎక్కాల్సిన పాయింట్ నుంచి దిగాల్సిన పాయింట్ వరకు ఖచ్చితమైన వివరాలు ఎంటర్ చేసి టికెట్ బుక్ చేస్తాం. ప్రయాణికుడు బుక్ చేసుకున్న స్థలం నుంచి పికప్ చేసుకుని.. దిగాల్సిన స్టేజీ వద్ద దించడం ట్రావెల్స్ బస్ బాధ్యత. అయితే అలా కాకుండా ఓ ప్రైవేట్ ట్రావెల్స్ బస్సు.. ఒక ప్రయాణికుడిని దిగాల్సిన స్టేజీ కాకుండా 50 కిలోమీటర్ల దూరంలో దించేసింది. దీంతో ఈ ఘటనపై ఆ ప్రయాణికుడు ఫిర్యాదు చేయడంతో ట్రావెల్స్ కంపెనీ దిగి వచ్చింది. ఆ ప్రయాణికుడికి రూ.2 లక్షల నష్ట పరిహారాన్ని అందించింది.

ముంబై కండివాలి ప్రాంతానికి చెందిన శేఖర్ హట్టంగడి అనే 69 ఏళ్ల వృద్ధుడు.. 2018లో సూరత్ నుంచి ముంబైకి టికెట్ బుక్ చేసుకున్నాడు. ట్రావెల్‌యాత్రిడాట్‌కామ్ అనే ట్రావెల్ పోర్టల్ ద్వారా శేకర్ టికెట్ బుక్ చేసుకోగా.. పాలో ట్రావెల్స్‌కి చెందిన బస్సులో టికెట్ కన్ఫర్మ్ అయింది. అయితే.. అహ్మదాబాద్-ముంబై హైవేలో మరమ్మతులు జరుగుతుండటంతో.. బస్సు డ్రైవర్ ఆ బస్సును హైవే నుంచి థానే వైపుకు తీసుకెళ్లాడు. దీంతో శేఖర్ దిగాల్సిన ప్రాంతం నుంచి వేరే ప్రాంతం గుండా ప్రయాణించడంతో అతడు దిగాల్సిన స్టేజీ దాటిపోయింది.

చివరికి శేఖర్ దిగాల్సిన స్థానం నుంచి 50 కిలోమీటర్ల దూరంలో బలవంతంగా దింపేశాడు బస్ డ్రైవర్. అదేంటీ అని అడిగితే రూట్ మ్యాప్‌లో మార్పులు చేసినట్లు నిర్లక్ష్యంగా బదులిచ్చాడు. దీంతో ఆ ప్రయాణికుడు.. అవస్థలు పడుతూ చివరికి గమ్యస్థానానికి చేరుకున్నాడు. అయితే తనకు జరిగిన ఈ అన్యాయం పట్ల తీవ్ర ఆగ్రహం వ్యక్తం చేసిన శేఖర్.. వినియోగదారుల ఫోరంలో ఫిర్యాదు చేశాడు.

అయితే తనకు రూట్ మ్యాప్ మార్పు గురించి ఎలాంటి ముందస్తు సమాచారం ఇవ్వలేదని.. 50 కిలోమీటర్ల దూరంలో దింపడం వల్ల తాను అసౌకర్యానికి గురైనట్లు శేఖర్ తన ఫిర్యాదులో పేర్కొన్నాడు. దీంతోపాటు సూరత్‌లో తనకు సరైన పికప్ పాయింట్ కూడా ఇవ్వలేదని.. గమ్యస్థానానికి చేరుకునేందుకు ప్రత్యామ్నాయ ఏర్పాట్లు కూడా చేయలేదని తన ఆవేదనను వెల్లడించాడు. తనకు కలిగిన అసౌకర్యానికి సదరు సంస్థ కేవలం ఈ మెయిల్ ద్వారా క్షమాపణలు చెప్పింది తప్ప ఎలాంటి బాధ్యత తీసుకోలేదని ఆరోపించారు.

ఈ ఫిర్యాదుపై విచారణ జరిపిన వినియోగదారుల వివాదాల పరిష్కార కమిషన్‌.. బాధితుడికి రూ.2 లక్షల జరిమానా చెల్లించాలని సదరు ట్రావెల్స్ సంస్థను ఆదేశించింది. రూట్ మ్యాప్ మార్చినప్పుడు ప్రయాణికులకు తప్పకుండా సమాచారం అందించాలని.. కానీ ఈ ఘటనలో ఎలాంటి సమాచారం ఇవ్వలేదని పేర్కొంది. కాబట్టి నష్టపరిహారంగా బాధితుడికి రూ.2 లక్షలు, అలాగే రూ.2 వేలు న్యాయ ఖర్చులు ఇవ్వాలని ఆదేశాలు జారీ చేసింది.