గుడివాడ సెంటర్లో కొడాలి నానికి ‘అంకుశం’లో రామిరెడ్డికి పట్టిన గతే: మాజీ మంత్రి

ఇటీవలే టీడీపీని వీడిన విజయవాడ ఎంపీ కేశినేని నాని, గుడివాడ వైఎస్ఆర్సీపీ ఎమ్మెల్యే కొడాలి నానిపై టీడీపీ సీనియర్ నేత, మాజీ మంత్రి దేవినేని ఉమామహేశ్వరరావు విమర్శలు గుప్పించారు. తెలంగాణ సీఎం రేవంత్ రెడ్డి, మంత్రి సీతక్కలను చూసి నానీలు బుద్ధి తెచ్చుకోవాలని ఆయన హితవు పలికారు. అంకుశం సినిమాలో రామిరెడ్డి మాదిరిగానే గుడివాడ సెంటర్‌లో కొడాలి నానికి ప్రజలు ఆ గతి పట్టిస్తారని మండిపడ్డారు. గుడివాడలో టీడీపీ అధినేత చంద్రబాబు నాయుడు నిర్వహించిన‘రా కదలిరా’ సభ బ్రహ్మాండంగా విజయవంతం అవ్వడంతో బడుద్దాయి కొడాలి నాని పిచ్చి మాటలు మాట్లాడుతున్నాడని విరుచుకుపడ్డారు.

ఇసుక, మట్టితో వందల కోట్లు దోచేసి.. క్యాసినోతో గుడివాడను గోవా చేసిన తీసేసిన తాసిల్దార్ మళ్లీ మాట్లాడుతున్నాడని దేవినేని ఉమ ఎద్దేవా చేశారు. కృష్ణాజిల్లా పరువు ప్రతిష్ఠను కొడాలి నాని మంటగలిపాడని, ఎక్కడికి వెళ్లినా ఆ బూతులోడు మీ జిల్లా వాడా? అని అడుగుతున్నారని ధ్వజమెత్తారు. ‘ఎన్టీఆర్ చనిపోయినప్పుడు ఈ సన్నాసి నాని మా చుట్టూ తిరిగి మా బూట్లు నాకాడు.. గుడివాడ నుంచి బొంగులు, తాటాకులు వేసుకొని చంద్రబాబు నాయుడు ఇంటి ముందు పందిరి వేశాడు.. రెండుసార్లు చంద్రబాబు బూట్లు నాకి బీఫారం తెచ్చుకున్నాడు.. ఫినాయిల్ పెట్టి కడిగితే డ్రైనేజీ బాగుపడుతుందేమో కానీ కొడాలి నాని నోరు బాగుపడదు’ అని దుయ్యబట్టారు.

‘బుద్ధా వెంకన్న పంపించిన మందులు బొడ్డు చుట్టూ పొడిపించుకో.. నువ్వు దోచుకున్న అవినీతి డబ్బులను కాపాడుకోవడం కోసం మాట్లాడిన లుచ్చా భాషకు కచ్చితంగా సమాధానం చెప్తాం’ అని శపథం చేశారు. ఇదే సమయంలో ఎంపీ నానిపై కూడా విరుచుకుపడ్డారు. పార్టీ రంగు మారగానే కేశినేని నానికి పోలవరం ప్రాజెక్టు గుర్తుకు వచ్చిందన్నారు. ‘వారం రోజుల్లో దుర్మార్గులు ఇచ్చిన స్క్రిప్టులు చదువుతున్నాడు.. పట్టిసీమ, పోలవరం ప్రాజెక్టుల గురించి మాట్లాడే నైతిక అర్హత నానికి లేదు.. అంబటి రాంబాబు డాన్సులు వేస్తున్నాడు.. నువ్వు కూడా అతనితో పాటు డాన్సులు వేసుకో.. కృష్ణాజిల్లాలో లక్షల ఎకరాలు బతికాయి అంటే పట్టిసీమ పుణ్యమే.. పెద్దపుడింగిలా నేను విమానాలు తెచ్చాను.. ఫ్లైఓవర్లు కట్టాను అనే నాని మరి విజయవాడ నుంచి సింగపూర్ విమానం ఎందుకు వెళ్లిపోయింది’ అని ఉమ నిలదీశారు.

‘కుప్పం గురించి మాట్లాడుతున్నావ్.. పులివెందుల అంటున్నావ్.. జనం మిమ్మల్ని సంక నాకిస్తారు. కళ్లుంటే చూడరా కబోదిలాగా సొల్లు కబుర్లు చెప్పమాకు.. పోలవరం అనుమతులు తీసుకొచ్చాను అంటున్నావు ఇంకా నయం నేను తీసుకొచ్చాను అనలేదు ఈ పార్టీలో ఉండగా సామెతలు గుర్తురాలేదా ? రెండుసార్లు బీఫామ్ తీసుకొని పార్టీ దగ్గర ఆర్థిక సహాయం తీసుకుని టీడీపీ ఎమ్మెల్యే అభ్యర్థుల రెక్కల కష్టంతో గెలిచి కార్యకర్తలు, నాయకులు గుండెల మీద తన్ని పరాయి పార్టీ పంచన చేరావు..

పార్టీ మార్చి, రంగులు, జెండాలు మార్చిన కేశినేని నాని, ఎమ్మెల్యే కృష్ణ ప్రసాద్ చెట్టాపట్టాలేసుకొని తిరుగుతున్నారు.. 2024 ఎన్నికల్లో మీ రాజకీయ వ్యభిచారం ఏంటో ప్రజలు తెలుస్తారు.. ఎన్నికల ఫలితాలు వచ్చిన తర్వాత పారిపోవడానికి వైఎస్ఆర్సీపీ నేతంతా విశాఖలో సింగపూర్ విమానం సిద్ధం చేసుకున్నారు .. చంద్రబాబు దగ్గర శిష్యరికం చేసిన కేసీఆర్, రేవంత్ రెడ్డి పక్క రాష్ట్ర ముఖ్యమంత్రులుగా పని చేశారు.. యువగళం స్ఫూర్తితో మరో 40 ఏళ్లు తెలుగుదేశం పార్టీ బతుకుతుంది’ అని జోస్యం చెప్పారు.