ఏపీలో షర్మిల పర్యటన షెడ్యూల్ ఖరారు.. ఎల్లుండే పీసీసీ చీఫ్‌గా బాధ్యతలు

ఆంధ్రప్రదేశ్ ప్రదేశ్ కాంగ్రెస్ కమిటీ చీఫ్‌గా నియమితులైన వైఎస్ షర్మిల.. ఆదివారం నాడు బాధ్యతలు చేపట్టనున్నారు. ఈ నేపథ్యంలో షర్మిల రెండు రోజుల రాష్ట్ర పర్యటన షెడ్యూల్ వెల్లడయ్యింది. జనవరి 20, 21 తేదీల్లో ఆమె రాష్ట్రంలో పర్యటించనున్నారు. ఈ నెల 20న మధ్యాహ్నం హైదరాబాద్ నుంచి ప్రత్యేక విమానంలో షర్మిల కడపకు బయలుదేరుతారు. అక్కడ నుంచి రోడ్డు మార్గంలో ఇడుపులపాయకు సాయంత్రం 4 గంటలకు చేరుకుని, వైఎస్సార్ ఘాట్ వద్ద నివాళులు అర్పించనున్నారు. ఆ రోజు రాత్రి ఆమె అక్కడే బస చేయనున్నారు.

మర్నాడు అంటే 21న ఉదయం కడప నుంచి ప్రత్యేక విమానంలో విజయవాడ గన్నవరం విమానాశ్రయానికి చేరుకుంటారు. అనంతరం విజయవాడలోని కాంగ్రెస్ పార్టీ కార్యాలయంలో ఉదయం 11 గంటలకు పీసీసీ చీఫ్‌గా వైఎస్ షర్మిల రెడ్డి బాధ్యతలు స్వీకరించనున్నారు. కాగా, ఇటీవలే వైఎస్సార్టీపీని కాంగ్రెస్‌లో విలీనం చేసిన షర్మిల.. ఆ పార్టీ జాతీయ అధ్యక్షుడు మల్లికార్జున ఖర్గే, రాహుల్ గాంధీల సమక్షంలో సొంతగూటికి చేరుకున్నారు. తిరిగి కాంగ్రెస్‌‌లో చేరిన షర్మిలకు అధిష్టానం కీలక బాధ్యతలను అప్పగించింది.

త్వరలో ఎన్నికలు జరగనున్న నేపథ్యంలో రాష్ట్రంలో పార్టీని బలోపేతం చేసి, పూర్వ వైభవాన్ని తీసుకొచ్చేలా పీసీపీ పగ్గాలను షర్మిల చేతుల్లో పెట్టింది కాంగ్రెస్ హైకమాండ్. అంతకుముందు ఏపీసీసీ చీఫ్‌గా ఉన్న గిడుగు రుద్రరాజును కాంగ్రెస్ వర్కింగ్ కమిటీ ప్రత్యేక ఆహ్వానితుడిగా అధిష్టానం నియమించింది. అలాగే, మేనిఫెస్టోను రూపకల్పనకు ఏఐసీసీ కమిటీని ప్రకటించింది. మొత్తం 11 మంది సభ్యులకు ఇందులో చోటు కల్పించారు.

చైర్మన్‌గా కేంద్ర మాజీ మంత్రి పల్లంరాజు, సభ్యులుగా మాజీ ఎంపీ కనుమూరి బాపిరాజు, మాజీ కేంద్ర మంత్రి జేడీ శీలం, పార్టీ సీనియర్ నేత తులసి రెడ్డి, కమలమ్మ, జంగా గౌతమ్, ఉషా నాయుడు, నజీరుద్దీన్, కొరివి వినయ్ కుమార్, డాక్టర్ గంగాధర్, కారుమంచి రమాదేవిలను నియమించారు. రాష్ట్ర విభజన తర్వాత ఇన్నాళ్లు అజ్ఞాతంలోకి వెళ్లిన ముఖ్య నాయకులు, కార్యకర్తలు తిరిగి ప్రత్యక్ష రాజకీయాల్లోకి ఎంట్రీ ఇస్తున్నారు. వరుస ప్రెస్‌ మీట్లు పెడుతూ ఎన్నికల రణరంగంలోకి కాంగ్రెస్ పార్టీ కూడా దిగిదంటూ స్టేట్‌మెంట్లు ఇస్తున్నారు.