అఫ్గన్ పర్వతాల్లో కూలిపోయిన మాస్కోకు వెళ్తోన్న విమానం
national | Suryaa Desk | Published : Sun, Jan 21, 2024, 11:18 PM
అఫ్గనిస్థాన్‌లో భారతీయ విమానం ప్రమాదానికి గురై కూలిపోయిందని ప్రచారం జరుగుతోంది. తోప్‌ఖానా పర్వత ప్రాంతంలో భారత ప్రయాణికుల విమానం కూలిపోయినట్టు అఫ్గన్ వార్తా సంస్థ టోలో న్యూస్ వెల్లడించింది. బదాక్షన్ ప్రావిన్సుల్లో ఆదివారం ఉదయం ఈ ఘటన చోటుచేసుకున్నట్టు తెలిపింది. ఈ విమానం రష్యాలోని మాస్కోకు వెళ్తున్నట్టు సమాచారం. బాదక్షన్ ప్రావిన్స్‌లోని కురాన్-ముంజన్, జిబాక్ జిల్లాలతో పాటు తోప్‌ఖానా పర్వతాల సమీపంలో భారతీయ ప్రయాణీకుల విమానం కూలిపోయిందని బదాక్షన్ సమాచార, సంస్కృతి విభాగం అధిపతి జబిహుల్లా అమిరి తెలిపారు. ఘటనపై విచారణకు బృందాన్ని ఆ ప్రాంతానికి పంపినట్లు ఆయన చెప్పారు. స్థానికులు తెలిపిన వివరాల ప్రకారం.. ఆదివారం ఉదయం విమానం కూలిపోయిందని టోలో న్యూస్ పేర్కొంది.
అయితే, ఈ ప్రమాదంపై స్పందించిన డీజీసీఏ.. భారతీయ విమానం ఏదీ కూలిపోలేదని ధ్రువీకరించింది. మొరాకో రిజిస్టర్ ఎయిర్‌క్రాఫ్ట్ కూలిపోయిందని, భారతీయ విమానం కాదని స్పష్టం చేసింది. అది చిన్న విమానమని పేర్కొంది. కానీ, విమానంలో ఎంత మంది ఉన్నారు.. ప్రాణనష్ఠం గురించి మాత్రం అఫ్గన్ అధికారులు ఎటువంటి వివరాలను వెల్లడించలేదు. కాగా, ఇది చిన్న విమానం తెలుస్తోంది. అందులో 10 మందిలోపు ప్రయాణికులు ఉన్నట్టు సమాచారం. దీనికి సంబంధించిన పూర్తి వివరాలు తెలియాల్సి ఉంది.
|
|