టీడీపీకి షాక్.. గంటా శ్రీనివాసరావు రాజీనామాకు ఆమోదం
Andhra Pradesh Telugu | Suryaa Desk | Published : Tue, Jan 23, 2024, 06:53 PM
తెలుగుదేశం పార్టీ ఎమ్మెల్యే గంటా శ్రీనివాస రావు రాజీనామాకు స్పీకర్ తమ్మినేని సీతారాం ఆమోదం తెలిపారు. విశాఖపట్నం నార్త్ ఎమ్మెల్యే గంటా శ్రీనివాస రావు.. రెండేళ్ల కిందట వైజాగ్ స్టీల్ ప్లాంట్ ఉద్యోగుల పోరాటానికి మద్దతుగా తన ఎమ్మెల్యే పదవికి రాజీనామా లేఖ సమర్పించారు. స్పీకర్ ఫార్మాట్‌లో రాజీనామా చేశారు. స్పీకర్‌ను కలిసి తనన రాజీనామాను ఆమోదించాలని గతంలో కోరారు. ఇంతకాలంగా పెండింగ్‌లో ఉన్న గంటా రాజీనామాను స్పీకర్ తమ్మినేని సీతారామ్.. మంగళవారం (జనవరి 23) ఆమోదించారు. త్వరలో రాజ్యసభ ఎన్నికలు జరుగనున్న నేపథ్యంలో టీడీపీకి ఇది చుక్కెదురే. రాజీనామా ఆమోదంతో రాజ్యసభ ఎన్నికల్లో గంటా శ్రీనివాసరావు తన ఓటు హక్కును వినియోగించుకునేందుకు అవకాశం లేకుండా పోయింది. గంటా శ్రీనివాసరావు కోరిక మేరకు రాజీనామా ఆమోదించినట్లు స్పీకర్ కార్యాలయం వెల్లడించింది.
మరోవైపు.. పార్టీ ఫిరాయించిన ఎమ్మెల్యేలకు స్పీకర్ తమ్మినేని సీతారాం ఇప్పటికే నోటీసులు జారీ చేశారు. వైఎస్సార్‌సీపీ ఫిర్యాదు మేరకు ఎమ్మెల్యేలు కోటంరెడ్డి శ్రీధర్ రెడ్డి, ఆనం రామనారాయణ రెడ్డి, మేకపాటి చంద్రశేఖర్ రెడ్డి, ఉండవల్లి శ్రీదేవిలకు స్పీకర్ నోటీసులు జారీ చేశారు. ఈ నెల 25 లోగా సమాధానం చెప్పాలని స్పష్టం చేశారు. ఎమ్మెల్యేలు ఇచ్చిన సమాధానం ఆధారంగా స్పీకర్ చర్యలు తీసుకునే అవకాశం ఉంది.
|
|