టార్గెట్ ఒకటే.. రామ మందిర ప్రారంభోత్సవంపై అంతర్జాతీయ మీడియా స్పందన ఇలా

కోట్లాది మంది హిందువుల కల నెరవేరింది. దాదాపు 500 ఏళ్ల తర్వాత రాముడు అయోధ్యకు వచ్చాడు. అయోధ్య రామ మందిరంలో బాలరాముడి విగ్రహ ప్రాణ ప్రతిష్ఠ కార్యక్రమాన్ని వైభవోపేతంగా నిర్వహించారు. ఈ సందర్భంగా దేశ ప్రజలంతా రామ నామస్మరణలో మునిగిపోయారు. శతాబ్దాల నిరీక్షణ తర్వాత రాముడు అయోధ్యకు తిరిగొచ్చిన సందర్భాన్ని దేశం మొత్తం పండుగలా జరుపుకుంటోంది. దేశంలోని ప్రతి మీడియా సంస్థ ఈ కార్యక్రమానికి ప్రాధాన్యం ఇచ్చి లైవ్ కవరేజీ ఇచ్చింది. అంతర్జాతీయ మీడియా సంస్థలు సైతం అయోధ్య రామ మందిర ప్రారంభోత్సవం గురించి తమ వెబ్‌సైట్లలో రాసుకొచ్చాయి. రామ మందిర ప్రారంభోత్సవ కార్యక్రమం గురించి అంతర్జాతీయ మీడియా సంస్థలు తమ ఆన్‌లైన్ ఎడిషన్లో ఎలా కవర్ చేశాయో చూద్దాం..

మోదీ పెద్ద ఆలయాన్ని ప్రారంభించారు.. హిందూ ఫస్ట్ ఇండియా దిశగా ఓ విజయం సాధించారు అని అమెరికాకు చెందిన న్యూయార్క్ టైమ్స్ తన వెబ్‌సైట్లో ఓ కథనాన్ని ప్రచురించింది. వివాదాస్పద స్థలంలో శతాబ్దాల పాతదైన మసీదుపై హిందువులు దాడి చేసి కూల్చివేసిన అనంతరం.. అక్కడ మసీదు నిర్మించారని న్యూయార్క్ టైమ్స్ తెలిపింది. బాబ్రీ కూల్చివేతను ప్రస్తావించడంతోపాటు.. భారత్‌లో రాముడికి ఉన్న ఆదరణ, ఆలయ ప్రారంభోత్సవం సందర్భంగా హిందువులు ఎంతగా సంతోషిస్తారనే విషయాలను ప్రస్తావించింది. రామమందిరాన్ని కూల్చి బాబ్రీ మసీదును నిర్మించడం.. ఆ తర్వాత మసీదును కూల్చడం.. దేశంలో రాజకీయాలు ఎలా మారుతున్నాయని ప్రతిపక్షాలు ఆరోపిస్తున్నాయి.. తదితర విషయాలను న్యూయార్క్ టైమ్స్ తన సుదీర్ఘ కథనంలో రాసుకొచ్చింది.

భారత్‌లో మసీదు కూల్చిన చోట హిందూ దేవుడికి ఆలయాన్ని నిర్మించారు. అదెందుకు ముఖ్యమంటే..? అనే శీర్షికతో వాషింగ్టన్ పోస్టు కథనాన్ని రాసింది. రామ మందిర ప్రారంభోత్సవానికి వీఐపీలు చిన్న నగరమైన అయోధ్యకు విమానాల్లో ఎలా చేరుకున్నారు.. ఎవరెవరు ఈ కార్యక్రమానికి వచ్చారు అనే విషయాలను ప్రస్తావించిన వాషింగ్టన్ పోస్ట్.. మెజార్టీ ప్రజలైన హిందువులను తనవైపు తిప్పుకోవడానికి బీజేపీ ఈ కార్యక్రమాన్ని ఉపయోగించుకుంటోందని పేర్కొంది. గుడి కట్టిన చోటే రాముడు జన్మించాడని హిందువులు విశ్వసిస్తారని.. కోట్లాది మంది హిందువులు రాముణ్ని ఆరాధిస్తారని వాషింగ్టన్ టైమ్స్ రాసుకొచ్చింది. నూతన రామాలయం ప్రత్యేకతలు, నిర్మాణ ఖర్చు, బాల రాముడి విగ్రహం గురించి ప్రస్తావించింది. అయోధ్య చుట్టూ గత 30 ఏళ్లకుపైగా సాగిన రాజకీయాలను సైతం రాసుకొచ్చింది. 1992లో బాబ్రీ మసీదు కూల్చివేత, 2019లో మందిర నిర్మాణానికి అనుకూలంగా సుప్రీం కోర్టు తీర్పు వెలువరించడాన్ని ప్రస్తావించింది. మూడోసారి అధికారంలోకి రావడానికి మోదీ అయోధ్య రామ మందిర ప్రారంభోత్సవాన్ని ఉపయోగించుకుంటున్నారని వాషింగ్టన్ పోస్ట్ అభిప్రాయపడింది.

నవ శకం: ఎన్నికల ముందు భారత ప్రధాని మోదీ అయోధ్యలో వివాదాస్పద హిందూ ఆలయాన్ని ప్రారంభించారు అని సౌత్ చైనా మార్నింగ్ పోస్ట్ వెబ్‌సైట్ కథనాన్ని ప్రచురించింది. రామ మందిర ప్రారంభోత్సవం ఎన్నికల్లో బీజేపీకి ఉపయోగపడుతుందని అభిప్రాయపడింది. హిందువులకు చాలా కాలం క్రితం ఇచ్చిన హామీని బీజేపీ నెరవేర్చిందని.. రామాలయ ప్రారంభోత్సవం ద్వారా ఎన్నికల ప్రచారం ప్రారంభించినట్లేనని నిపుణులు అభిప్రాయపడుతున్నారని తెలిపింది. రామ మందిరం ఇంకా నిర్మాణంలోనే ఉందని.. ఈ ఆలయాన్ని ఏటా పది కోట్ల మంది సందర్శించే అవకాశం ఉందని వెల్లడించింది.

ఇక రాయిటర్స్ అయితే.. రామ మందిర ప్రారంభోత్సవం సందర్భంగా అనేక కథనాలను తన వెబ్‌సైట్లో ప్రచురించింది. మోదీ రామ మందిరాన్ని ప్రారంభించారనే వార్తతోపాటు.. రామ మందిరం ఎందుకు వివాదాస్పదమైంది? అంటూ ఓ ప్రత్యేక కథనాన్ని ప్రచురించింది. టెంపుల్ టూరిజం ఊపందుకుంటుందని మరో ప్రత్యేక కథనాన్ని రాసుకొచ్చింది.

అయోధ్య రామ మందిరం: భారత ప్రధాని మోదీ బాబ్రీ మసీదును కూల్చిన చోట హిందూ ఆలయాన్ని ప్రారంభించారు అంటూ బీబీసీ ఆన్‌లైన్లో ఓ కథనాన్ని ప్రచురించింది. మరి కొద్ది నెలల్లో భారత్‌లో ఎన్నికలు జరగనున్నాయని.. ఆలయం పేరిట బీజేపీ హిందువుల ఓట్లు కొల్లగొట్టే ప్రయత్నం చేస్తోందని ప్రత్యర్థి పార్టీలు ఆరోపిస్తున్నాయని తెలిపింది. మోదీ ప్రసంగంలోని ముఖ్యాంశాలతోపాటు.. ఆలయ నిర్మాణానికైన ఖర్చు.. అయోధ్య అభివృద్ధి కోసం నిధుల కేటాయింపు లాంటి అంశాలను ప్రస్తావించింది. అయోధ్య ఉద్యమం బీజేపీ ఎదుగుదలకు ఉపకరించిందని తెలిపింది. విదేశాల్లోని హిందువులు సైతం ప్రాణ ప్రతిష్ఠ కార్యక్రమాన్ని సెలబ్రేట్ చేసుకున్నారని తెలిపింది. 2019 నాటి సుప్రీం తీర్పుతోపాటు.. 1989లో బాబ్రీ మసీదు ఫొటోను.. 2024లో రామ మందిరం నిర్మాణంలో ఉన్న ఫొటోను ప్రచురించింది.

అయ్యోధలోని భారత రామ మందిరం ఎందుకు వివాదాస్పదం? అంటూ ఇస్లామిక్ దేశమైన ఖతార్‌కు చెందిన అల్‌జజీరా వెబ్‌సైట్లో ఓ ప్రత్యేక కథనాన్ని ప్రచురించింది. రామ మందిరం ప్రారంభోత్సవం సందర్భంగా స్టాక్ మార్కెట్‌కు సెలవిచ్చారు. కేంద్ర ప్రభుత్వ కార్యాలయాలు ఒక్క పూట మాత్రమే పని చేశాయి. కోట్లాది మంది ప్రజలు ఒకే ఒక కార్యక్రమాన్ని ఆసక్తిగా తిలకించారంటూ.. కథనాన్ని ప్రచురించింది. వివాదాస్పద రామాలయాన్ని మోదీ ఇండియాలో ప్రారంభించారంటూ.. ఓ ప్రత్యేక వీడియోను రూపొందించింది. రామ మందిర ప్రారంభోత్సవం, ప్రజల సంబరాలే కాకుండా.. బాబ్రీ మసీదు కూల్చివేత విజువల్స్‌ను కూడా ఈ వీడియోలో చూపించారు.