20 ఏళ్లుగా వీల్​ఛైర్‌‌‌‌లో నుంచే సామాజిక సేవ.. ప్రజాసేవకు వరించిన ‘పద్మశ్రీ’

కేంద్ర ప్రభుత్వం గణతంత్ర దినోత్సవం సందర్భంగా పద్మ అవార్డులను ప్రకటించింది. వివిధ రంగాల్లో విశేష సేవలు అందించినవారిని ఈ ప్రతిష్ఠాత్మక అవార్డులకు ఎంపిక చేసింది. ఈ ఏడాది మొత్తం 132 మందికి ‘పద్మ’ పురస్కారాలను ప్రకటించగా.. ఐదుగురికి పద్మ విభూషణ్‌, 17 మందికి పద్మభూషణ్‌, 110 మందికి పద్మశ్రీ వరించాయి. ప్రముఖ నటుడు చిరంజీవి, మాజీ ఉపరాష్ట్రపతి వెంకయ్యనాయుడులను పద్మవిభూషణ్‌తో గౌరవించింది. ఇక, పద్మశ్రీ దక్కినవారిలో హరియాణాకు చెందిన సామాజిక కార్యకర్త గుర్‌వేందర్ సింగ్ ఒకరు. ప్రమాదంలో గాయపడి వీల్ఛైర్కే పరిమితమైన ఆయన దాదాపుగా రెండు దశాబ్దాలుగా ప్రజా సేవకు అంకితమయ్యారు.

ఒక ఆశ్రమాన్ని స్థాపించి వందల మంది అభాగ్యులకు ఆపన్నహస్తం అందిస్తున్నారు. ఆయన సమాజ సేవను గుర్తించిన కేంద్ర ప్రభుత్వం ఈ ఏడాది పద్శశ్రీ అవార్డును ప్రకటించింది. సిర్సా జిల్లాకు చెందిన గుర్వేందర్ సింగ్... 2012లో భాయ్ కన్హయా లాల్ పేరుతో ఓ ఆశ్రమాన్ని ఏర్పాటు చేశారు. నిరుపేదలు, దివ్యాంగులు, రోగులు సహా ప్రస్తుతం 400 మంది అందులో ఆశ్రయం పొందుతున్నారు. వారికి సకల సౌకర్యాలను కల్పించారు. తాను సామాజిక సేవను 2005 నుంచే మొదలు పెట్టినట్లు గుర్వేందర్ సింగ్ చెప్పారు. 1997 జూన్ 7న లారీ ఢీకొట్టడంతో తీవ్రంగా గాయపడిన గుర్‌వేందర్ సింగ్‌కు కాళ్లుచచ్చుబడ్డాయి. ఆయన అప్పటి నుంచి వీల్ ఛైర్‌కే పరిమితమయ్యారు. ప్రమాదం జరిగిన తర్వాత ఆస్పత్రిలో చికిత్స పొందుతున్న సమయంలో ఓ సంఘటన ఆయనను సామాజిక సేవకు ప్రేరణనిచ్చింది. డీఎంసీ ఆస్పత్రిలో స్వచ్ఛంద సంస్థ రోగులకు పాలు, బ్రెడ్ పంపిణీ చేయడంతో తాను కూడా సేవ చేయలని నిర్ణయించుకున్నారు. ఆ ప్రేరణతోనే ఆశ్రమాన్ని ఏర్పాటు చేశారు.

చిన్నారుల కోసం బాల్ గోపాల్ ధామ్ పేరుతో చైల్డ్ కేర్ ఇన్స్టిట్యూట్ని స్థాపించిన గుర్వేందర్ సింగ్.. ఉచిత అంబులెన్స్ సేవలను కూడా ప్రారంభించారు. ఇప్పటి వరకు సుమారు 6 వేల మందికిపైగా ప్రమాద బాధితులకు, గర్భిణీలకు ఉచిత అంబులెన్స్ సేవలను అందించారు. ఇప్పటి వరకు ఆయన 700 మందికి పైగా నిరుపేదలకు సహాయం చేసి, 500 మందికి పైగా వారి కుటుంబాలతో కలిపారు. చాలా మంది అమ్మాయిలకు వివాహాలు చేశారు. వితంతువులు, ఆర్థికంగా బలహీనమైన పిల్లలు, విడాకులు తీసుకున్న మహిళల పిల్లలకు ఉచితంగా పాఠశాలను కూడా నిర్మించారు. సేవ చేయడానికి ఆశ్రమాలే అవసరం లేదని, మనసులో ఆ ఆలోచన ఉంటే అనేక మార్గాలున్నాయని గుర్వేందర్ సింగ్ అన్నారు.