వీళ్లతో పెట్టుకోవద్దు: శత్రు దేశాల ఆర్మీకి ఆనంద్ మహీంద్రా స్వీట్ వార్నింగ్

ప్రముఖ పారిశ్రామికవేత్త, మహీంద్రా అండ్ మహీంద్ర గ్రూప్ అధినేత ఆనంద్ మహీంద్రా తన దృష్టికి వచ్చిన ఆసక్తికరమైన వీడియోలు, కొత్తకొత్త విషయాలను పంచుకుంటూ.. సోషల్ మీడియాలో యాక్టివ్‌గా ఉంటారు. తాజాగా, గణతంత్ర దినోత్సవ వేడుకల పరేడ్‌లో సైనికుల ప్రదర్శన, అమేయ శక్తి సామర్థ్యాలపై ప్రశంసలు గుప్పించారు. ఈ సందర్భంగా ఆయన విదేశీ సైన్యాలకు సున్నితమైన హెచ్చరికలు చేశారు. రిపబ్లిక్ డే వేడుకల్లో భాగంగా దేశ రాజధాని ఢిల్లీలోని కర్తవ్యపథ్‌లో శుక్రవారం జరిగిన పరేడ్‌ (Parade) ఆసాంతం ఆకట్టుకుంది. ట్విట్టర్‌లో హర్జీందర్ సింగ్ కుక్రేజా అనే యూజర్ పోస్ట్‌ చేసిన సిక్కు రెజిమెంట్ పరేడ్ వీడియోను ఆనంద్ మహీంద్రా ఉటంకిస్తూ.. ‘‘ఇతర దేశాల సైన్యానికి నాదో వ్యక్తిగత సలహా. ఈ కుర్రాళ్లతో ఎప్పుడూ పెట్టుకోవద్దు’ అని రాసుకొచ్చారు. మన సైన్యం శక్తి సామర్థ్యాలను ఉద్దేశిస్తూ ‘భారత్‌ దృఢంగా ఉంది’ అనే అర్థం వచ్చేలా ఎమోజీలు జత చేశారు. ఈ పోస్ట్‌ ప్రస్తుతం నెట్టింట వైరల్‌గా మారింది.

గణతంత్ర వేడుకల పరేడ్‌లో మన సైనిక శక్తిని ప్రపంచానికి చాటిచెప్పాయి త్రివిధ దళాలు. మేజర్ సరబ్జీత్ సింగ్ నేతృత్వంలోని భారత సైన్యం సిక్కు రెజిమెంట్ బృందం కర్తవ్యపథ్‌లో కవాతు నిర్వహించింది. మహారాజా రంజిత్ సింగ్ 'షేర్-ఎ-పంజాబ్' సైన్యం స్ఫూర్తితో 1846లో స్థాపించిన సిక్కు రెజిమెంట్‌కు ఘనమైన చరిత్రను కలిగి ఉంది, వివిధ యుద్ధాలు, ప్రచారాలకు గణనీయంగా దోహదపడింది. బ్రిటిష్ ఇండియా సమయంలో నార్త్-వెస్ట్ ఫ్రాంటియర్ ప్రావిన్స్‌లో కీలక పాత్ర పోషించింది. టోఫ్రెక్ (1885), సారాగర్హి (1897), లా బస్సీ (1914), న్యూవ్ చాపెల్లే (1914-15), హాయ్ (1971) సహా మొదటి ప్రపంచ యుద్ధం, అనేక యుద్ధాల్లో పాల్గొంది. స్వాతంత్య్రానంతరం సిక్కు రెజిమెంట్ శ్రీనగర్ (1947), తిత్వాల్ (1948), బుర్కీ (1965), రాజా (1965), పూంచ్ (1971), పర్బత్ అలీ (1971)లలో కీలకమైన సేవలను కొనసాగించింది.

ఈ రెజిమెంట్ సేవలకుగానూ 82 యుద్ధ గౌరవాలు, 16 థియేటర్ గౌరవాలు, 10 విక్టోరియా క్రాస్‌లు, 21 ఇండియన్ ఆర్డర్స్ ఆఫ్ మెరిట్, రెండు పరమవీర చక్రాలు, మూడు అశోక చక్రాలు, ఒక పద్మవిభూషణ్, రెండు పద్మభూషణ్, సేవా పతకాలు, 14 మహావీర చక్రాలు, 12 కీర్తి చక్రాలు, రెండు ఉత్తమ్ విశిష్ట సేవా పతకాలు వంటి అనేక ప్రశంసలు, గుర్తింపు లభించింది. దేశీయంగా రూపొందించిన ఆయుధాలతో పాటు నాగ్‌ క్షిపణులు, టీ-90 భీష్మ యుద్ధ ట్యాంకులు, డ్రోన్‌ జామర్లు, నిఘా వ్యవస్థలు, వాహనాలపై అమర్చే మోటార్లు, పినాక మల్టిపుల్‌ రాకెట్‌ వ్యవస్థ, వెపన్‌ లొకేషన్‌ రాడార్‌ వ్యవస్థలు, బీఎంపీ-2 సాయుధ శకటాలను ప్రదర్శించారు. ఇక, తొలిసారిగా పూర్తిస్థాయిలో త్రివిధ దళాలకు చెందిన నారీమణులు చేసిన కవాతు, విన్యాసాలు ఆకట్టుకున్నాయి.