చిలీలో కార్చిచ్చు.. కాలిబూడిదవుతోన్న నివాసాలు.. 46 మంది మృతి

దక్షిణ అమెరికా ఖండంలోని చిలీ దేశాన్ని కార్చిచ్చు దహించవేస్తోంది. అధిక ఉష్ణోగ్రతల కారణంగా చెలరేగిన కార్చిచ్చు అదుపులోకి రావడం లేదు. దావానంలా వ్యాపిస్తున్న మంటల్లో ఇప్పటివరకు కనీసం 46 మంది మృతిచెందినట్లు చిలీ అధ్యక్షుడు బోరిక్‌ గాబ్రియెల్‌ వెల్లడించారు. వేలాది మంది గాయపడినట్లు తెలిపిన ఆయన.. వీరిలో కొంత మంది పరిస్థితి విషమంగా ఉన్నట్లు చెప్పారు. ఇప్పటి వరకూ దాదాపు 1,100 ఇళ్లు అగ్నికి ఆహుతయ్యాయయని పేర్కొన్నారు. వాల్పరైజో ప్రాంతంలో భారీ ఎత్తున మంటలు చెలరేగుతున్న నేపథ్యంలో మృతుల సంఖ్య పెరిగే అవకాశం ఉందని తెలిపారు. ఈ క్రమంలో ప్రజలను అప్రమత్తం చేసిన బోరిక్.. సహాయక చర్యలు చేపడుతున్న సిబ్బందికి సహకరించాలని విజ్ఞప్తి చేశారు.

వేగంగా విస్తరిస్తున్న మంటలను అదుపు చేసేందుకు వాతావరణ పరిస్థితులు అనుకూలించడం లేదని అన్నారు. అధిక ఉష్ణోగ్రతలు, బలమైన గాలులు, స్వల్ప తేమ.. పరిస్థితులను మరింత దయనీయంగా మారుస్తున్నాయని ఆయన ఆందోళన వ్యక్తం చేశారు. మధ్య, దక్షిణ ప్రాంతాల్లో దాదాపు 92 కార్చిచ్చులు చెలరేగినట్లు చిలీ అంతర్గత వ్యవహారాల మంత్రి కరోలినా తొహా వెల్లడించారు. తీవ్రత అధికంగా ఉన్న వాల్పరైజో ప్రాంతం నుంచి వేలాది మందిని ఇప్పటికే సురక్షిత ప్రాంతాలకు తరలించామని, వారంతా పునరావాస కేంద్రాల్లో తలదాంచుకుంటున్నారని తెలిపారు.

ప్రస్తుతం చిలీ వ్యాప్తంగా 92 ప్రాంతాల్లో కార్చిచ్చు చెలరేగగా.. 43 వేల హెక్టార్లలో అడవులు ప్రభావితమైనట్టు మంత్రి చెప్పారు. ఇక, తీరప్రాంత పర్యాటక నగరం వినా డెల్ మార్‌లో పరిస్థితులు అధ్వాన్నంగా ఉన్నాయని, కార్చిచ్చు ప్రాంతాలకు చేరుకోవడం రెస్క్యూ సిబ్బందికి కష్టంగా మారిందని అధికారులు చెప్పారు. గత దశాబ్ద కాలంలో దేశంలో చెలరేగిన కార్చిచ్చుల్లో అత్యంత దారుణమైనది ఇదేనని చిలీ డిజాస్టర్ మేనేజ్‌మెంట్ తెలిపింది. ఇక, చిలీలో కార్చిచ్చు సర్వసాధారణం. గతేడాది అత్యధిక ఉష్ణోగ్రతల కారణంగా 4 లక్షల హెక్టార్ల మేర అడవులు దగ్దమయ్యాయి. 27 మంది ప్రాణాలు కోల్పోయారు. గతేడాదితో పోల్చితే ఇది తక్కువ విస్తీర్ణమైనా.. ప్రాణనష్టం అధికంగా ఉంది.