యెమెన్‌లోని 36 హౌతీ స్థావరాలపై అమెరికా, బ్రిటన్ మెరుపు దాడులు

యెమెన్‌లోని ఇరాన్ మద్దతున్న హౌతీ తిరుగుబాటుదారుల స్థావరాలే లక్ష్యంగా అమెరికా, బ్రిటన్‌ సైన్యాలు శనివారం దాడులు చేశాయి. ఇటీవల ఎర్ర సముద్రంలో నౌకలపై వరుస దాడులతో ప్రపంచ వాణిజ్యానికి హౌతీలు విఘాతం కలిగిస్తున్నారు. ఈ నేపథ్యంలో ఇరు దేశాలూ సంయుక్తంగా ఈ దాడులకు వ్యూహం రచించాయి. జనవరి 28న జోర్డాన్‌లో ముగ్గురు అమెరికా సైనికులను చంపినందుకు ప్రతిస్పందనగా ఇరాక్- సిరియాలో ఇరాన్-సంబంధిత లక్ష్యాలపై ఏకపక్షంగా అమెరికా దాడులు చేసిన మర్నాడు యెమెన్‌లో ఉమ్మడి వైమానిక దాడులు జరిగాయి.

‘అంతర్జాతీయ, వాణిజ్య నౌకల రవాణాతో పాటు ఎర్ర సముద్రం మీదుగా ప్రయాణించే నౌకాదళ నౌకలపై హౌతీల నిరంతర దాడులకు ప్రతిస్పందనగా యెమెన్‌లోని 13 ప్రదేశాలలోని 36 హౌతీ స్థావరాలను లక్ష్యంగా చేసుకున్నాం’ అని అమెరికా, బ్రిటన్ సహా ఆపరేషన్‌కు మద్దతునిచ్చిన ఇతర దేశాలు ఒక ప్రకటనలో తెలిపాయి. ‘ఈ లక్షిత దాడులు ప్రపంచ వాణిజ్యాన్ని, అమాయకుల జీవితాలను ప్రమాదంలో పడేయడానికి హౌతీల ఉపయోగించే సామర్థ్యాలను నిర్వీర్యం చేయడం, కి ఉద్దేశించినవి’ అని ప్రకటన పేర్కొంది. భూగర్భంలోని హౌతీల ఆయుధాల నిల్వలు, క్షిపణి వ్యవస్థలు, లాంచర్లు, వాయు రక్షణ వ్యవస్థలు, రాడార్‌లతో సంబంధం ఉన్న స్థావరాలను లక్ష్యంగా చేసుకున్నాం.. ఎర్ర సముద్రంలో నౌకలపై దాడికి సిద్ధంగా ఉన్న ఆరు హౌతీ యాంటీ-షిప్ క్షిపణులపై శనివారం సంయుక్త దళాలు విడివిడిగా దాడులు నిర్వహించాయి’ అని సెంట్రల్ కమాండ్ తెలిపింది.

దీనికి ముందు యెమెన్‌కు సమీపంలో ఎనిమిది డ్రోన్‌లను అమెరికా బలగాలు కూల్చివేసి, వాటిని ప్రయోగించేలోపు మరో నాలుగు ధ్వంసం చేశాయని సైనిక కమాండ్ శనివారం వెల్లడించారు. ధ్వంసమైన నాలుగు డ్రోన్‌లు హౌతీలకు చెందినవని, కానీ, గాల్లో కూల్చివేసిన వాటితో సంబంధం ఉన్న దేశం లేదా సమూహాన్ని గుర్తించలేదని పేర్కొంది. గాజాలో పాలస్తీనియన్లపై ఇజ్రాయేల్‌కు దాడులకు ప్రతీకారంగా ఆ దేశం, వారికి మద్దతుగా ఉన్నవారికి సంబంధించిన నౌకలను హౌతీలు గత నవంబరు నుంచి లక్ష్యంగా చేసుకున్నారు. వీటిపైఅమెరికా, బ్రిటిష్ దళాలు ప్రతిస్పందించాయి. అప్పటి నుంచి అమెరికా, బ్రిటన్‌లు అవి చట్టబద్ధమైన లక్ష్యాలుగా ప్రకటించాయి.