పీవీ నరసింహారావుకు భారతరత్నపై సోనియా ఏమన్నారంటే

మాజీ ప్రధాని పీవీ నరసింహారావుకు ప్రస్తుతం కేంద్ర ప్రభుత్వం మరణానంతరం భారతరత్న అవార్డు ఇచ్చింది. ఈ సందర్భంగా కాంగ్రెస్ అగ్రనేత సోనియా గాంధీ స్పందించారు. అయితే గతంలో సోనియాగాంధీకి, పీవీ నరసింహారావుకు మధ్య సత్సంబంధాలు లేవని.. రాజకీయ వర్గాల్లో జోరుగా చర్చ జరిగేది. ఇక ఒకానొక సమయంలో కాంగ్రెస్‌ పార్టీలో పీవీ నరసింహారావుకు అవమానం కలిగించారని.. ప్రతిపక్ష పార్టీలు తీవ్ర విమర్శలు చేసిన సందర్భాలు కూడా ఉన్నాయి. ఈ క్రమంలోనే పీవీ నరసింహారావుకు నరేంద్ర మోదీ ప్రభుత్వం.. భారతరత్న ఇవ్వడంపై సోనియా గాంధీ స్పందించడం ప్రస్తుతం ఆసక్తికరంగా మారింది.

మాజీ ప్రధాని పీవీ నరసింహారావుతోపాటు మరో మాజీ ప్రధాని చౌదరీ చరణ్ సింగ్, దేశ హరిత విప్లవ పితామహుడు ఎంఎస్ స్వామినాథన్‌లకు ఒకేసారి భారతరత్న అవార్డు రావడంపై కాంగ్రెస్ అగ్రనేత సోనియా గాంధీ ప్రకటించారు. కేంద్ర ప్రభుత్వం ఈ ముగ్గురు మహనీయులకు దేశ అత్యున్నత పౌరపురస్కారం అందించడం పట్ల ఆమె సంతోషం వ్యక్తం చేశారు. ఈ సందర్భంగా పార్లమెంట్ బడ్జెట్ సమావేశాల్లో భాగంగా భారతరత్న అవార్డులు ఇవ్వడంపై మీడియా ఆమె స్పందనను కోరారు. కేంద్ర ప్రభుత్వం తీసుకున్న నిర్ణయాన్ని స్వాగతిస్తున్నట్లు తెలిపారు. వారికి భారతరత్న ఇవ్వడాన్ని ఖచ్చితంగా స్వాగతిస్తున్నానని సోనియా గాంధీ వెల్లడించారు.

 అయితే వాస్తవానికి పీవీ నరసింహారావు అంటే సోనియా గాంధీకి అస్సలు పడదని రాజకీయా వర్గాల్లో ఒక విస్తృత ప్రచారం ఉంది. ఒకే పార్టీలోనే ఉన్నా వారి మధ్య పచ్చగడ్డి వేస్తే భగ్గుమనే విధంగా ఉండేదని సొంత పార్టీ నేతలు కూడా కొందరు విమర్శలు చేస్తూ ఉంటారు. ఈ క్రమంలోనే పీవీ నరసింహారావు చనిపోయినపుడు ఆయన అంత్యక్రియలకు కూడా అప్పట్లో కాంగ్రెస్ అగ్రనాయకులు ఎవరూ హాజరు కాలేదని చెబుతారు. ఇక పీవీ నరసింహారావు చనిపోయినపుడు ఆయన భౌతిక కాయాన్ని కూడా కాంగ్రెస్ పార్టీ కార్యాలయానికి తీసుకురావడానికి అనుమతించలేదని కాంగ్రెస్ పార్టీలో ఉండే పీవీ వర్గం నేతలు పేర్కొంటారు. ఈ క్రమంలోనే.. పీవీకి భారతరత్న ఇవ్వడంపై సోనియా గాంధీ ఎలా స్పందిస్తారా అని అంతా ఆసక్తిగా ఎదురు చూశారు. పీవీకి భారతరత్న ఇవ్వడాన్ని స్వాగతిస్తున్నట్లు ఆమె చెప్పారు.