అమ్మను అలా చూడలేకపోయా.. ఆత్మహత్య చేసుకున్న యువకుడి సూసైడ్ నోట్‌
Andhra Pradesh Telugu | Suryaa Desk | Published : Fri, Feb 16, 2024, 08:08 PM
విశాఖపట్నం జిల్లాలో ఆన్‌లైన్‌ గేమ్స్ ఆడి డబ్బులు పోగొట్టుకుని అప్పుల బాధ తాళలేక ఓ యువకుడు ప్రాణాలు తీసుకున్నాడు. బుచ్చెయ్యపేట మండలం ఆర్‌.శివరాంపురంనకు చెందిన చందక కోటేశ్వరరావు ఇంటికి సమీపంలోని పాకలో ఉరివేసుకున్నాడు. ఆన్‌లైన్‌ గేమ్స్‌లో డబ్బులు పోగొట్టుకోవడం, ఇతరుల నుంచి మానసిక వేధింపులను భరించలేక చనిపోతున్నానని లేఖ రాసి ఆత్మహత్య చేసుకున్నాడు. అతడు తన ఆత్మహత్యకు కారణాలను వెల్లడించారు.
కొంతకాలంగా ఆన్‌లైన్‌ గేమ్స్ ఆడి చాలా నష్టపోయానని ఆవేదన వ్యక్తం చేశాడు కోటేశ్వరరావు. మొదటిసారి తప్పు చేసినపుడు వాటికి సంబంధించిన అప్పులను అమ్మానాన్న తీర్చారని చెప్పుకొచ్చాడు. అప్పుడు తెలిసో తెలియకో తప్పు చేశానని.. రెండోసారి అదే తప్పు చేశాను.. అందుకు పూర్తి బాధ్యత తనదే అన్నాడు. తనవల్ల ఎవరికీ లాభం లేదనుకుని చనిపోతున్నానని లేఖలో రాసుకొచ్చాడు.
తన పిన్ని లత చనిపోయిన కేసులో తమ కుటుంబ సభ్యులందరిపైనా కేసులు బనాయించి కోర్టుల చుట్టూ తిప్పించి మానసికంగా ఇబ్బందులు పెట్టారన్నారు. ఏ తప్పూ చేయకపోయినా ప్రతిరోజూ అమ్మను దుర్భాషలాడుతుండే వారని.. దీంతో మానసికంగా చాలా కుంగిపోయానన్నాడు. తన చావుకు ఆర్థిక సమస్యలతోపాటు పిన్ని కుటుంబ సభ్యులూ కారణమేనని లేఖలో రాశాడు. పోలీసులు కేసు నమోదు చేసి మృతదేహాన్ని పోస్టుమార్టం చేసేందుకు అనకాపల్లి ఆసుపత్రికి తరలించారు.
|
|