ప్రియాంక గాంధీకి అస్వస్థత.. ఆస్పత్రికి తరలింపు

కాంగ్రెస్ అగ్ర నాయకురాలు సోనియా గాంధీ కుమార్తె, ఆ పార్టీ జాతీయ ప్రధాన కార్యదర్శి ప్రియాంక గాంధీ వాద్రా ఆస్పత్రిలో చేరారు. ఆమె అస్వస్థతకు గురి కావడంతో ఆస్పత్రిలో చేరినట్లు స్వయంగా ప్రియాంక గాంధీ ఎక్స్ ద్వారా వెల్లడించారు. అనారోగ్య కారణాల వల్ల హాస్పిటల్‌లో చికిత్స తీసుకుంటున్నట్లు తెలిపారు. అయితే ఏం జరిగింది అనే విషయాలను మాత్రం ప్రియాంక గాంధీ వెల్లడించలేదు. అయితే కాంగ్రెస్ అగ్రనేత రాహుల్ గాంధీ చేపట్టిన భారత్ జోడో న్యాయ్ యాత్ర.. ఇవాళ(శుక్రవారం) ఉత్తర్‌ప్రదేశ్‌లోకి ప్రవేశించనుండగా.. ఆ యాత్రకు ప్రియాంక గాంధీ స్వాగతం పలకాలని భావించినా.. అనారోగ్యం కారణంగా ఆస్పత్రిలో చేరడంతో ఆమె అక్కడికి వెళ్లలేకపోయారని కాంగ్రెస్ పార్టీ వర్గాలు వెల్లడించాయి.

తన సోదరుడు రాహుల్ గాంధీ చేస్తున్న భారత్ జోడో న్యాయ్ యాత్ర.. ఉత్తరప్రదేశ్ రాష్ట్రంలోకి ప్రవేశిస్తున్న సందర్భంగా ఆ యాత్రకు స్వాగతం పలికి అందులో పాల్గొనాలని ఎంతో ఉత్సాహంగా ఎదురు చూసినట్లు ప్రియాంక గాంధీ తెలిపారు. అయితే అనారోగ్యం కారణంగా ఆస్పత్రిలో ఉండటంతో దురదృష్టవశాత్తు అది జరగలేదని పేర్కొన్నారు. ఈ క్రమంలోనే తనకు అనారోగ్యం తగ్గి.. ఆస్పత్రి నుంచి డిశ్చార్జ్ అయిన తర్వాత భారత్ జోడో న్యాయ్ యాత్రలో పాల్గొంటానని స్పష్టం చేశారు. ఈ క్రమంలోనే రాహుల్ గాంధీ చేస్తున్న యాత్రకు తన మద్దతు ఎల్లప్పుడూ ఉంటుందని తెలిపారు.

భారత్ జోడో న్యాయ్ యాత్రకు ఉత్తర్‌ప్రదేశ్ ప్రజల ఆశీస్సులు ఉంటాయని.. యూపీ ప్రజల అండదండలతో యాత్ర విజయవంతంగా కొనసాగుతుందని ప్రియాంక గాంధీ ఆకాక్షించారు. మణిపూర్ నుంచి ముంబై వరకు రాహుల్ గాంధీ చేపట్టిన భారత్ జోడో న్యాయ యాత్ర శుక్రవారం(ఫిబ్రవరి 16వ తేదీన) ఉత్తర్‌ప్రదేశ్‌లోని వారణాసిలోకి ప్రవేశించింది. వారణాసి నుంచి ప్రయాగ్‌రాజ్, ప్రతాప్‌గఢ్ మీదుగా ఈ నెల 19 వ తేదీ వరకు రాహుల్ గాంధీ సొంత నియోజకవర్గం అమేథీకి చేరుకోనుంది. ఈ నేపథ్యంలోనే అమేథీలో భారీ బహిరంగ సభను కాంగ్రెస్ పార్టీ వర్గాలు ఏర్పాటు చేశాయి. అనంతరం ఈ నెల 20 వ తేదీన గాంధీల కుటుంబానికి కంచుకోటగా ఉన్న రాయ్‌బరేలికి రాహుల్ గాంధీ యాత్ర చేరుకుంటుంది.

ప్రస్తుతం రాయ్‌బరేలీ ఎంపీగా ఉన్న సోనియాగాంధీ ఇటీవలె రాజ్యసభ ఎన్నికలకు నామినేషన్ దాఖలు చేశారు. ఈ క్రమంలోనే మరికొన్ని రోజుల్లో జరగనున్న లోక్‌సభ ఎన్నికల్లో కాంగ్రెస్ కంచుకోటగా ఉన్న రాయ్‌బరేలీ నియోజకవర్గం నుంచి ప్రియాంక గాంధీ వాద్రా బరిలోకి దిగనున్నారని.. హస్తం పార్టీ వర్గాల్లో జోరుగా చర్చ జరుగుతోంది. ఇందు కోసమే సోనియా గాంధీ తప్పుకుని ఆ స్థానంలో ప్రియాంక గాంధీని రాజకీయాల్లోకి అరంగేట్రం చేయించాలని ప్లాన్ చేస్తున్నట్లు సమాచారం.