భారత సైన్యానికి మార్షల్ ఆర్ట్స్‌లో శిక్షణ.. చైనా దూకుడుకు చెక్

ప్రపంచంలోనే అత్యంత శక్తివంతమైన సైన్యంలో భారత సైన్యం కూడా ఒకటి. దేశాన్ని రక్షించడం కోసం ఎలాంటి సమయాల్లోనైనా ఎలాంటి యుద్ధానికైనా ముందుంటారు. ఇక సైన్యం అలా సిద్ధంగా ఉండడానికి వారికి కఠోర శిక్షణను ఇస్తారు. ఈ క్రమంలోనే 2020 లో చైనాతో గల్వాన్ లోయలో జరిగిన ఘర్షణ తర్వాత కేంద్ర ప్రభుత్వం.. భారత సైనికుల శిక్షణలో కీలక మార్పులు చేసింది. ఆ ఘటన తర్వాత సైన్యానికి మార్షల్ ఆర్ట్స్‌ ట్రైనింగ్ కూడా ఇప్పించి.. వారిని రాటుదేలుస్తోంది. ఆయుధాలు వాడని సమయంలో కూడా ప్రత్యర్థిని మట్టికరిపించి.. దేశాన్ని రక్షించేందుకు ఆర్మీని తయారు చేస్తున్నారు.

ఇండియన్ ఆర్మీలోని ఆయా రెజిమెంట్ల సైనికులకు రోజువారీ ఫిట్‌నెస్‌ శిక్షణతో పాటు.. వివిధ మార్షల్‌ ఆర్ట్స్‌ను కూడా నేర్పిస్తున్నట్లు సైనిక వర్గాలు చెప్పినట్లు నేషనల్ మీడియా ఒక కథనాన్ని ప్రచురించింది. పంజాబ్‌ రెజిమెంట్‌లోని సైనికులకు ఘాతక్‌.. గూర్ఖా రెజిమెంట్‌కు కుక్రీ డ్యాన్స్‌.. మద్రాస్‌ రెజిమెంట్‌కు కలిరిపయట్టు వంటి మార్షల్ ఆర్ట్స్ నేర్పిస్తున్నట్లు తెలుస్తోంది. ఈ క్రమంలోనే ఇప్పటికే పంజాబ్‌ రెజిమెంట్‌కు చెందిన సైనికులను అరుణాచల్‌ ప్రదేశ్‌లోని కిబితు ప్రాంతంలో ఉన్నతాధికారులు మోహరించారు. ఆ రెజిమెంట్‌కు చెందిన సైనికులు ఇటీవలె జర్నలిస్టుల ముందు మార్షల్‌ ఆర్ట్స్‌ను ప్రదర్శించడంతో బయటపడింది.

ఇక పంజాబ్ రెజిమెంట్‌ యూనిట్‌కు చెందిన మేజర్‌ కార్తికేయ జైస్వాల్‌ ఈ మార్షల్ ఆర్ట్స్ ట్రైనింగ్ గురించి మీడియాతో మాట్లాడారు. స్థానికంగా విధులు నిర్వర్తించే భూభాగం, ఆ ప్రాంతాలతోపాటు.. సైనికులు సరిహద్దుల్లో గస్తీ కాసే సమయంలో ఎదురయ్యే సవాళ్లు భిన్నంగా ఉంటాయని పేర్కొన్నారు. వేగంగా ప్రవహించే నదులు, ముళ్లు, వర్షాలు, ఎప్పటికప్పుడు త్వరగా మారిపోయే వాతావరణం, ఎత్తైన శిఖరాలు సరిహద్దుల్లో ఉంటాయని తెలిపారు. అందుకోసం సైనికులకు రోజువారీ శిక్షణ అవసరమని వెల్లడించారు. అందులో మార్షల్‌ ఆర్ట్స్‌ కూడా భాగమని వివరించారు. ఇక మేజర్ కార్తికేయ జైస్వాల్ చెప్పిన విషయాన్నే పంజాబ్ రెజిమెంట్ యూనిట్‌ కమాండింగ్‌ అధికారి కర్నల్‌ ప్రిన్స్‌ రోహిత్‌ కూడా వెల్లడించారు.

చైనా సైనికులతో భారత సైనికులు 2020 జూన్‌లో గల్వాన్‌ లోయలో ఘర్షణ పడిన తర్వాత ఇండియన్ ఆర్మీ ఈ మార్షల్ ఆర్ట్స్‌ను మిలటరీ ట్రైనింగ్‌లో ప్రవేశపెట్టింది. ఉధంపుర్‌లోని నార్తర్న్‌ కమాండ్‌.. ఇజ్రాయెల్‌కు చెందిన క్రావ్‌ మాగా అనే మార్షల్‌ ఆర్ట్స్‌ను ట్రైనింగ్‌లో భాగం చేశారు. ఈ మేరకు ఆయా యూనిట్లకు నార్తర్న్ కమాండ్ లేఖలు రాసింది. ఈ నేపథ్యంలోనే ఆయా యూనిట్లు తమకు అవసరమైన మార్షల్ ఆర్ట్స్‌ను ఎంచుకున్నాయని.. సైనిక అధికారి ఒకరు వెల్లడించారు. భారత సైనికులకు ప్రస్తుతం నేర్పించిన మార్షల్ ఆర్ట్స్ కారణంగా ఇప్పుడు సరిహద్దుల వెంట ఘర్షణలు జరిగినా ఏం ఆందోళన చెందాల్సిన అవసరం లేదని పేర్కొన్నారు.

ఇక 45 ఏళ్ల లోపు సైనికులు ఫిజికల్, మెంటల్‌గా ఫిట్‌గా ఉన్నామని నిరూపించుకునేందుకు ఇప్పటికే ప్రతి 4 నెలలకు ఒకసారి బ్యాటిల్ ప్రిపేర్డ్‌నెస్ అండ్ ఎఫీషియెన్సీ టెస్ట్-బీపీఏటీను పూర్తి చేయాల్సి ఉంటుంది. ఇందులో 30 ఏళ్ల లోపు ఉన్న సైనికులు 25 నిమిషాల్లో 5 కిలోమీటర్లు పరిగెత్తాల్సి ఉంటుంది. 30 నుంచి 40 ఏళ్ల వయసు ఉన్న వారు 27 నిమిషాలలో 5 కిలోమీటర్ల దూరం పరిగెత్తాల్సి ఉంటుంది. అధికారుల ఫిట్‌నెస్‌కు సంబంధించిన నిబంధనలను కూడా సైన్యం మార్చింది. అయితే ఇవి ఇంకా అమల్లోకి రావాల్సి ఉంది.