షాపులో పనిచేసే అమ్మాయితో ఎఫైర్.. ప్రశ్నించిన భార్యకు ఆ వీడియోలు చూపిస్తూ భర్త శాడిజం

విజయవాడలో దారుణ ఘటన వెలుగుచూసింది. అక్రమ సంబంధాన్ని ప్రశ్నించిందనే అక్కసుతో కట్టుకున్న భార్య పట్ల కర్కశంగా వ్యవహరించాడో కసాయి. సెల్‌ఫోన్‌లో పోర్న్ వీడియోలు చూపిస్తూ అమానుషంగా వ్యవహరించాడు. ఆ వీడియోలో ఉన్న విధంగా ప్రవర్తించాలంటూ వేధింపులకు గురిచేశాడు. భర్త అరాచకాలను భరించినన్ని రోజులు భరించిన ఆ భార్య.. చివరకు తెగించింది. భర్త వేధింపులను తట్టుకోలేక పుట్టింటికి వెళ్లిపోయింది. ఆ తర్వాత కుటుంబసభ్యుల సహాయంతో దిశ పోలీసులను ఆశ్రయించింది. దీంతో అతగాడి వ్యవహారం బయటకు వచ్చింది.

అసలు వివరాల్లోకి వెళ్తే.. కృష్ణా జిల్లా కూచిపూడికి చెందిన ఓ వ్యక్తి స్థానికంగా కిరాణా హోల్ సేల్ దుకాణం నడుపుతున్నాడు. ఇతనికి విజయవాడ పటమట పోలీస్ స్టేషన్ పరిధిలో ఉండే యువతితో 2021 ఏప్రిల్‍‌లో వివాహం జరిగింది. కట్నం కింద రూ.2లక్షలు, రూ.50వేల విలువైన ఫర్నీచర్ ఇచ్చారు. పెళ్లైన కొద్దిరోజులు సంసారం సజావుగానే సాగింది. ఆ తర్వాత భర్తలోని రాక్షసుడు బయటకు వచ్చాడు. అదనపు కట్నం తేవాలంటూ యువతిని బలవంతం చేయడం మొదలెట్టాడు. అత్తకు తన బాధ చెప్పుకుందామంటే ఆమె కూడా మరో లక్ష రూపాయలు అదనపుకట్నం తేవాలంటూ వేధించడం మొదలెట్టారు. భర్త వేధింపులు, అత్తా మరిది సాధింపులతో ఆమె విలవిల్లాడిపోయింది.

కట్నం వేధింపుల వ్యవహారం ఇలా జరుగుతుండగానే భర్తలోని మరో కోణం భార్య గుర్తించింది. కిరాణాషాపు నడుపుతున్న ఆ ప్రబుద్ధుడు.. అందులో పనిచేస్తున్న అమ్మాయితో వివాహేతర సంబంధం పెట్టుకున్నాడు. ఈ విషయం ఎలాగో భార్యకు తెలిసింది. దీనిపై భర్తను ప్రశ్నిస్తే వేధింపులు మరింత పెరిగాయి. అంతేకాదు సెల్‌ఫోన్‌లో పోర్న్ వీడియోలు చూపిస్తూ ఆమెకు నరకం చూపించాడు. ఆ వీడియోల్లో ఉన్న మాదిరిగా ప్రవర్తించాలంటూ ఒత్తిడి చేయడం మొదలెట్టాడు. భర్త వేధింపులు తట్టుకోలేకపోయిన బాధితురాలు చివరకు పుట్టింటికి వెళ్లిపోయింది. తన బాధనంతా వారికి తెలియజేసింది.

అనంతరం కుటుంబసభ్యుల సహకారంతో దిశ పోలీసులను బాధితురాలు ఆశ్రయించింది. భర్త, అత్త, మరిది మీద ఫిర్యాదు చేసింది. కట్నం కోసం ఎలా వేధించింది, భర్త తనతో ఎలా వ్యవహరించిందీ పోలీసులకు వివరించింది. బాధితురాలి ఫిర్యాదుతో రంగంలోకి దిగిన పోలీసులు.. కేసు నమోదు చేసుకుని దర్యాప్తు ప్రారంభించారు.