తిరుపతి పుట్టినరోజుకు గోవిందరాజస్వామి ఆలయానికి లింక్ తెలుసా.. ఏటా ఎందుకు చేస్తారంటే?

కలియుగ ప్రత్యక్షదైవమైన ఆ వెంకటేశ్వరుడి పాదాల చెంత కొలువైన నగరం తిరుపతి. శ్రీవారి దర్శనం కోసం ఎక్కడెక్కడి నుంచో వచ్చే వేలాది మంది భక్తులు ఈ నగరాన్ని కూడా సందర్శిస్తూ ఉంటారు. అయితే తిరుపతి నగరం శనివారం ( ఫిబ్రవరి 24) 894 పుట్టినరోజు వేడుకలు జరుపుకుంది. సుమారు 9 శతాబ్దాల చరిత్ర కలిగిన తిరుపతి ఆవిర్భావ వేడుకలను శనివారం ఘనంగా నిర్వహించారు. పుర ప్రజలంతా ఏకమై, తిరుపతి జన్మదిన వేడుకల్లో పాలు పంచుకున్నారు. తిరుపతి పుట్టినరోజును పురస్కరించుకుని గోవిందరాజస్వామి ఆలయ మాడవీధుల్లో ఆధ్యాత్మిక శోభాయాత్ర నిర్వహించారు. ఈ సందర్భంగా భక్తుల గోవింద నామస్మరణతో ఆ ప్రాంగణమంతా పరవశించిపోయింది.

ఉదయమే భూమన కరుణాకర రెడ్డి గోవిందరాజ స్వామి ఆలయంలో ప్రత్యేక పూజలు నిర్వహించి, శోభాయాత్రను ప్రారంభించారు. గోవింద నామ కీర్తనలు, భజనలు చేస్తూ పురప్రజలు ఆనందంగా తిరుపతి ఆవిర్భావ వేడుకలు జరుపుకున్నారు. చెక్క భజనలు, కోలాటాలతో కళాబృందాలు లయబద్ధంగా ఆడుతూ పాడుతూ ముందు వరసలో కదిలాయి. పౌరాణిక వేషధారణలు ఆకట్టుకున్నాయి. వేదపండితులు మంత్రోచ్చారణల మధ్య భక్తి చైతన్య యాత్ర కొనసాగింది.

తిరుచానూరు నుంచి అర్చకులు తిరుమలకు వెళ్లి పూజలు చేయడం కష్టంగా ఉండడంతో సద్గురు శ్రీ రామానుజాచార్యులు 24.02.1130న గోవిందరాజస్వామి ఆలయానికి శంకుస్థాపన చేసినట్లు పురాణాలు చెబుతున్నాయి. శంకుస్థాపన సమయంలోనే ఈ నగరానికి గోవిందరాజపురంగా నామకరణం చేసినట్లు చరిత్రకారులు చెబుతారు. అలా 894 ఏళ్ల క్రితం.. సౌమ్య నామ సంవత్సరంలో పాల్గుణ పౌర్ణమి ఉత్తర నక్షట్రంలో సోమవారం రోజున తిరుపతి నగరం వెలసిందని చరిత్ర చెబుతోంది. తిరుపతి ఎమ్మెల్యేగా భూమన కరుణాకర్ రెడ్డి ఎన్నికైన తర్వాత తిరుపతికి పుట్టినరోజు వేడుకలు జరపనున్నట్లు ప్రకటించారు. ఈ క్రమంలోనే వరుసగా మూడో ఏడాదికి కూడా ఆధ్మాత్మిక నగరికి ఆడంబరంగా పుట్టినరోజు వేడుకలు జరిపారు.