నేను మలాలాను కాదు.. భారత్‌లో స్వేచ్ఛగా ఉన్నా: బ్రిటన్ పార్లమెంట్‌లో కశ్మీర్ జర్నలిస్ట్ ప్రసంగం వైరల్

జమ్మూ కశ్మీర్‌కు చెందిన సామాజిక కార్యకర్త, జర్నలిస్ట్ యానా మీర్‌ను డైవర్సిటీ అంబాసిడర్ అవార్డుతో యూకే పార్లమెంట్‌లో సత్కరించారు. ఈ సందర్బంగా పార్లమెంట్‌ను ఉద్దేశించిన ప్రసంగించిన మీర్.. కశ్మీర్‌కు వ్యతిరేకంగా జరుగుతోన్న ప్రచారాన్ని తిప్పికొట్టారు. ఆ చేసిన ప్రసంగం ప్రస్తుతం సోషల్ మీడియాలో వైరల్ అవుతోంది. తానేమీ మలాలా యూసఫ్‌జాయ్ కాదు అని, భారత్‌లో మేము ఎంతో స్వేచ్ఛగా జీవిస్తున్నామని మీర్ ఉద్ఘాటించారు. తాలిబన్ల దాడికి గురైన పాకిస్థాన్ యువతి, నోబెల్ శాంతి గ్రహీత మలాలా యూసఫ్‌జాయ్ ప్రస్తుతం బ్రిటన్‌లో ఆశ్రయం పొందుతోన్న విషయం తెలిసిందే.

యూకేలోని కశ్మీర్ స్టడీ సెంటర్ నిర్వహించిన ‘భారత్ సంకల్ప్ దివాస్’ కార్యక్రమంలో యానా మీర్‌కు అవార్డును అందజేశారు. అవార్డు అందున్న మీర్ మాట్లాడుతూ.. ‘నేను మాలాలా యూసఫ్‌జాయ్‌ను కాదు.. ఎందుకంటే భారత్‌లో భాగమైన నా మాతృభూమి కశ్మీర్‌లో సురక్షితంగా ఉన్నాను.. నేను నా దేశం నుంచి పారిపోయివచ్చి మీ దేశంలో (యూకే)లో శరణార్ధిగా ఆశ్రయం కోరును.. ఎప్పటికీ నేను మలాలాను కాబోను’ అని ఉద్వేగభరితంగా ప్రసంగించారు. ఈ సందర్భంగా కశ్మీరీలు అణచివేతకు గురవుతున్నారంటూ భారత్‌‌‌ను బద్నాం చేయడానికి ప్రయత్నించిన మలాలాపై మీక: విరుచుకుపడ్డారు.

భారత్‌లోని కశ్మీర్‌ను ఎన్నడూ సందర్శించని, అణచివేత కథనాలను రూపొందించే సోషల్ మీడియా, విదేశీ మీడియాలపై మీర్ ఆగ్రహం వ్యక్తం చేశారు. మతం ఆధారంగా భారతీయులను విభజించే పనులను మానుకోవాలని, మమ్మల్ని విచ్ఛిన్నం చేయడానికి మేము మిమ్మల్ని అనుమతించబోమని స్పష్టం చేశారు. ‘మా వెంటపడం మానేయండి.. కశ్మీర్ సమాజాన్ని శాంతితో జీవించనివ్వండి’ అని అభ్యర్థిస్తూ తన ప్రసంగాన్ని ముగించారు.

బ్రిటన్ పార్లమెంట్ సభ్యురాలు థెరిసా విల్లర్స్ చేతుల మీుదగా డైవర్సిటీ అంబాసిడర్ అవార్డును అందుకున్నారు. ఈ కార్యక్రమంలో భారతీయ సంతతికి చెందిన బ్రిటన్ ఎంపీ వీరేంద్ర శర్మ, బాబ్ బ్లాక్‌మెన్‌లు పాల్గొన్నారు. ప్రస్తుతం మీర్ ప్రసంగానికి సంబంధించిన వీడియో సోషల్ మీడియాలో వైరల్ అవుతోంది. అవార్డు అందుకున్న ఆమెకు బాలీవుడ్ నటుడు అనుపమ్ ఖేర్ సహా పలువురు అభినందనలు తెలియజేశారు.

‘యూకే, పాకిస్థాన్‌లలో నివసిస్తున్న నేరస్థులు అంతర్జాతీయ మీడియా, మానవ హక్కుల వేదికలలో నా దేశాన్ని దూషించడాన్ని ఆపివేయాలి.. యూకేలో తలదాచుకున్నవారు తప్పుడు కూతలు ఆపాలి... మా వెంట పడటం మానేయండి... ఉగ్రవాదం అనే చీకటి భూతంతో వేల మంది కశ్మీరీ తల్లులు తమ బిడ్డలను కోల్పోయారు’ అని మీర్ ఆవేదన వ్యక్తం చేశారు. మీర్ ప్రసంగం వీడియో ట్విట్టర్‌లో వైరల్ అవుతోంది. ఆమెపై నెటిజన్లు ప్రశంసలు కురిపిస్తున్నారు.