మహిళా దినోత్సవ కానుకగా చీరలు పంచుతున్న విశాఖ ఎంపీ

ఎన్నికల షెడ్యూల్‌ విడుదల కాకముందే ఓటర్లకు తాయిలాల పంపిణీకి తెరలేచింది. ఓటర్లను ఆకట్టుకునేందుకు పలువురు నేతలు రంగంలోకి దిగారు. విశాఖ తూర్పు నియోజకవర్గ వైఎస్ఆర్సీపీ సమన్వయకర్త, ఎంపీ ఎంవీవీ సత్యనారాయణ ఒక్క అడుగు ముందులో ఉన్నారు. కొద్ది రోజుల కిందట నియోజకవర్గమంతా ఆయన స్వీట్‌ ప్యాకెట్లు పంపిణీ చేసిన విషయం చర్చనీయాంశమైన విషయం తెలిసిందే. ఇంటికొక స్వీట్ పాకెట్ ఇచ్చారు. తాజాగా, విశాఖ ఎంపీ ఎంవీవీ చీరల పంపిణీకి శ్రీకారం చుట్టారు. ఇంట్లో ఎంతమంది మహిళా ఓటర్లు ఉంటే అన్ని చీరలను ఆయన అందిస్తున్నారు.

సీఎం జగన్‌, ఎంపీ ఎంవీవీ బొమ్మలతో పాటు సిద్ధం నినాదం, ఎంపీ పేరు ముద్రించిన కవర్లలో చీరలను అందజేస్తున్నారు. అక్క చెల్లెమ్మలకు మహిళా దినోత్సవ శుభాకాంక్షలు కూడా ముద్రించిన వీటిని వార్డు వలంటీర్లతోనే ఇంటింటికీ పంపిణీ చేయిస్తున్నారు. ఇప్పటికే దాదాపు సగం వార్డుల్లో చీరల పంపిణీ పూర్తయిందని తెలుస్తోంది. మిగిలిన ప్రాంతాల్లోనూ ఇది జోరుగా సాగుతోంది. ‘ఎం.పి. ఎం.వి.వి. సత్యనారాయణ చీర ఇచ్చారు... మీరంతా ఆయనను గుర్తుంచుకోవాలని’ వారు కోరుతున్నారు. ఇంటింటికి వెళ్లి బొట్టుపెట్టి చీరల కిట్ అందజేస్తూ.. వచ్చే ఎన్నికల్లో ఎంవీవీ సత్యనారాయణకు ఓటు వేయాలని వాలంటీర్లు చెబుతున్నారనే ప్రచారం కూడా సాగుతోంది.

అయితే, కేవలం తూర్పు నియోజకవర్గంలోనే ఇస్తారా? ఆయన మాకు కూడా ఎంపీ కదా... తమకెందుకు ఇవ్వరని వైఎస్‌ఆర్సీపీ నాయకులను పక్క నియోజకవర్గాల మహిళలు నిలదీస్తున్నట్టు సమాచారం. వచ్చే ఎన్నికల్లో ఎంవీవీకే ఓటు వేయాలని అభ్యర్థించారు. అంతేగాక బిందెలు ఇస్తామని ప్రలోభాలకు గురిచేశారు. ఇక చీరల పంపిణీలో వాలంటీర్ల చేతిలో ఓటర్ల జాబితా ఉందని ఆరోపణలు వినవస్తున్నాయి.