జనసేనకు మరో పది సీట్లు!.. కీలక నేత వెల్లడి

టీడీపీ, జనసేన ఉమ్మడి అభ్యర్థుల జాబితాపై జనసైనికుల్లో అసంతృప్తి వ్యక్తమవుతోంది. మరీ 24 సీట్లకే జనసేన పరిమితం కావటం మీద జనసైనికులు, పవన్ కళ్యాణ్ అభిమానులు మండిపడుతున్నారు. కనీసం 40 అసెంబ్లీ స్థానాల్లో జనసేన పోటీ చేయాల్సిందని అంటున్నారు .బొలిశెట్టి సత్యనారాయణ వంటి నేతలు కూడా జనసేనకు 24 సీట్లు కేటాయించడం మీద బాహాటంగానే అసంతృప్తి వ్యక్తం చేశారు. పవన్ కళ్యాణ్‌కు సైతం ఈ నిర్ణయం ఇష్టం ఉండకపోవచ్చని అభిప్రాయపడ్డారు. ఈ నేపథ్యంలో జనసేన సీట్ల కేటాయింపునకు సంబంధించి ఆ పార్టీ నేత కీలక వ్యాఖ్యలు చేశారు.

జనసేన పార్టీ నేత, అనకాపల్లి అభ్యర్థి కొణతాల రామకృష్ణ పొత్తులో భాగంగా జనసేనకు కేటాయించే సీట్లకు సంబంధించి కీలక వ్యాఖ్యలు చేశారు. అనకాపల్లి ఎమ్మెల్యే అభ్యర్థిగా ప్రకటించిన నేపథ్యంలో కొణతాల రామకృష్ణ ఆదివారం రాజుపాలెం సూర్యనారాయణ స్వామి ఆలయాన్ని దర్శించుకొని పూజలు చేశారు. అనంతరం అనకాపల్లి పట్టణంలోని స్థానిక నూకాలమ్మ ఆలయాన్ని దర్శించుకున్నారు. ఈ సందర్బంగా ఆలయ కార్యదర్శి, సిబ్బంది, వేద పండితులు కొణతాలకు స్వాగతం పలికి శాలువా కప్పి ప్రత్యేక పూజలు నిర్వహించారు.

ఈ సందర్బంగా మీడియాతో మాట్లాడిన కొణతాల రామకృష్ణ.. జనసేన, టీడీపీ అభ్యర్థిగా రెండు పార్టీల నాయకులను, కేడర్‌ను కలుపుకుని వెళ్లి పవన్ కళ్యాణ్ నిర్ణయం మేరకు పార్టీ బలోపేతానికి, విజయాన్ని కృషి చేస్తానని అన్నారు. పార్టీ మొదట విడతగా రాష్ట్రవ్యాప్తంగా 24 చోట్ల పోటీ చేయనున్నట్లు ప్రకటించిందన్న కొణతాల రామకృష్ణ.. బీజేపీతో కూడా పొత్తుపై చర్చలు జరుగుతున్నాయని అన్నారు. వచ్చే వారం రోజుల్లోగా దీనిపై క్లారిటీ వస్తుందని చెప్పారు. బీజేపీతో పొత్తును అనుసరించి జనసేనకు మరో 10 సీట్లు రావడానికి అవకాశం ఉందని కొణతాల రామకృష్ణ చెప్పారు.

అనకాపల్లి ఎంపీ స్థానం ఎవరికి ఇస్తారన్నది ఇరు పార్టీల అధినేతలు చర్చించుకొని నిర్ణయం తీసుకుంటారన్న కొణతాల రామకృష్ణ.. వారుతీసుకున్న నిర్ణయానికి అనుగుణంగా కట్టుబడి పనిచేస్తామని అన్నారు. టీడీపీ మాజీ ఎమ్మెల్యే పీలా గోవిందతో ఫోన్లో మాట్లాడే ప్రయత్నం చేశానని, విజయవాడలో ఉన్నట్లు సమాచారం అందిందని చెప్పారు. ఆయన వచ్చిన తర్వాత మాట్లాడుకుని ముందుకు వెళ్తామని స్పష్టం చేశారు. మరోవైపు పీలా గోవింద్‌కు అనకాపల్లి సీటు కేటాయించకపోవటంపై టీడీపీ శ్రేణులు మండిపడుతున్నాయి. అందులో భాగంగా ఆదివారం నల్లబ్యాడ్జీలతో నిరసన తెలిపారు. పార్టీ నిర్ణయం కోసం సాయంత్రం వరకు వేచి చూస్తామని లేని పక్షంలో తమ తిరుగుబాటు ప్రారంభమవుతుందని పీలా అనుచరులు స్పష్టం చేశారు.