పెళ్లి రోజు గిఫ్ట్ ఇవ్వలేదని రెచ్చిపోయిన భార్య.. భర్త నిద్రిస్తుండగా అర్ధరాత్రి కత్తితో దారుణం

పెళ్లి రోజు అంటే భార్యాభర్తలకు ఇద్దరికీ మరపురాని రోజు. వారు వివాహ బంధంలోకి అడుగుపెట్టింది ఆ రోజే కావడంతో దానికి ప్రత్యేకత ఉంటుంది. అయితే ఏటా పెళ్లి రోజును కొందరు గ్రాండ్‌గా సెలబ్రేట్ చేసుకుంటారు. భార్యకు భర్త.. భర్తకు భార్య రకరకాల గిఫ్ట్‌లు, సర్‌ప్రైజ్‌లు అందించుకుంటూ తమ ప్రేమను వ్యక్తపరుచుకుంటారు. కానీ ఓ భర్త మాత్రం తన భార్యకు పెళ్లి రోజున గిఫ్ట్ ఇవ్వలేదు. ప్రతీ ఏడాది తమ పెళ్లి రోజు తన భర్త రకరకాల గిఫ్ట్‌లు ఇచ్చేవాడని.. ఈ ఏడాది ఇవ్వకపోవడంతో ఆ భార్యకు తీవ్ర కోపం వచ్చింది. దీంతో భర్తను చంపేందుకు ప్లాన్ చేసింది. అర్ధరాత్రి భర్త ఇంట్లో నిద్రిస్తుండగా.. కత్తితో చేతిపై కోసింది. ఈ ఘటన కర్ణాటక రాజధాని బెంగళూరులో చోటు చేసుకుంది.

బెంగళూరులోని బెల్లందూర్ పోలీస్ స్టేషన్‌ పరిధిలో ఓ జంట నివసిస్తోంది. భర్తకు 37 ఏళ్లు కాగా.. ఓ ప్రైవేటు కంపెనీలో ఉద్యోగం చేస్తున్నాడు. భార్యకు 35 ఏళ్లు కాగా ఇంటి వద్దే ఉంటుంది. ఈ క్రమంలోనే ఇటీవలె వారి పెళ్లి రోజు వచ్చింది. అయితే ప్రతీ సారి పెళ్లి రోజున గిఫ్ట్ ఇచ్చే తన భర్త ఈసారి పెళ్లి రోజుకు బహుమతి ఇవ్వకపోవడంతో ఆమె తీవ్ర మనస్థాపానికి గురైంది. ఈ క్రమంలోనే ఫిబ్రవరి 27 వ తేదీన ఇంట్లో భర్త నిద్రిస్తుండగా.. అర్ధరాత్రి 1.30 గంటలకు వంటగదిలోకి వెళ్లి కూరగాయలు కోసే కత్తి తీసుకువచ్చింది. పడుకున్న భర్త చేతిపై కత్తితో దాడి చేసింది. వెంటనే నిద్రలో నుంచి ఉలిక్కిపడి లేచిన భర్త.. భార్య చేసిన పనికి షాక్ అయ్యాడు.

నిద్రలో నుంచి లేవగానే కత్తి పట్టుకున్న భార్యను చూసి ఆమెను పక్కకు తోసేశాడు. వెంటనే ఇరుగు పొరుగున ఉన్నవారికి సమాచారం అందించగా.. వారు దగ్గర్లోని ఆస్పత్రికి తరలించారు. ఈ క్రమంలోనే డాక్టర్లు బెల్లందూర్ పోలీసులకు సమాచారం అందించగా.. వారు ఆ భర్త దగ్గర వివరాలు సేకరించి భార్యపై మార్చి 1 వ తేదీన కేసు నమోదు చేశారు. అనంతరం ఆమెను ప్రశ్నించగా.. అసలు విషయం వెల్లడించింది. పెళ్లి రోజున తన భర్త తనకు గిఫ్ట్ ఇవ్వలేదని.. అందుకే కత్తితో దాడి చేసినట్లు తెలిపింది. అది విని పోలీసులు షాక్ అయ్యారు. వారిద్దరికీ కౌన్సిలింగ్ ఇప్పించాలని నిర్ణయించినట్లు పోలీసులు తెలిపారు. ప్రస్తుతం భర్త పరిస్థితి బాగానే ఉన్నట్లు డాక్టర్లు వెల్లడించారు.

ఈ క్రమంలోనే దర్యాప్తు చేపట్టిన పోలీసులకు మరో విషయం తెలిసింది. అసలు ఆ భర్త తన భార్యకు పెళ్లి రోజున ఎందుకు గిఫ్ట్ ఇవ్వలేదు అనే దానికి సమాధానం దొరికింది. తన పెళ్లి రోజు కంటే ముందు రోజు ఆ భర్త వాళ్ల తాత చనిపోవడంతో.. తీవ్ర దుఃఖంలో ఉన్న ఆయన తన భార్యకు ఎలాంటి బహుమతి కొనలేదని పేర్కొన్నారు. అయితే ఈసారి గిఫ్ట్ కొనలేనని భర్త చెప్పినా ఆ భార్య వినలేదని.. తనకు బహుమతి కావాలని పట్టుబట్టినట్లు గుర్తించారు. తన భర్త ఎలాంటి గిఫ్ట్ ఇవ్వకపోవడంతో తీవ్ర ఆగ్రహానికి గురైన ఆ భార్య కత్తి దాడికి దిగిందని పోలీసులు పేర్కొన్నారు. తన భార్యకు కౌన్సిలింగ్ ఇప్పించాలని ఆ భర్త పోలీసులకు విజ్ఞప్తి చేశాడు.