హైదరాబాద్ వ్యక్తి అతి తెలివి.. ఏకంగా ప్రోటోకాల్ దర్శనం, అడ్డంగా బుక్
Andhra Pradesh Telugu | Suryaa Desk | Published : Wed, Mar 06, 2024, 10:53 PM
విజయవాడ ఇంద్రకీలాద్రిపై ఓ వ్యక్తి అతి తెలివి ప్రదర్శించాడు. ప్రొటోకాల్ దర్శనం కోసం ఐఆర్ఎస్ అధికారి అవతారమెత్తాడు. చివరికి ఫేక్ ఐడీ కార్డుతో అడ్డంగా దొరికిపోయాడు. మంగళవారం హైదరాబాద్కు చెందిన శ్రీనివాస్ అనే వ్యక్తి ఆదాయపన్ను జాయింట్ కమిషనర్ ఐడీ చూపి ప్రొటోకాల్ దర్శనం ఇవ్వలేదని ఆలయ దిగువ స్థాయి సిబ్బందిని దుర్భాషలాడాడు. దీంతో సిబ్బంది అతడిని ఐడీ కార్డు చూపించమని అడిగారు. ఆయన వి.శ్రీనివాస్ పేరుతో ఒక కార్డు, ఆనంద్ పేరుతో మరో కార్డు చూపించాడు.
ఆలయంలో సిబ్బందికి ఎందుకో అనుమానం వచ్చి విషయాన్ని అవుట్ పోస్టు పోలీసుల దృష్టికి తీసుకు రావడంతో ఫేక్ ఐఆర్ఎస్ బండారం బయటపడింది. ఆరు నెలల కిందట ఇతడే దుర్గగుడికి వచ్చి ఇదేవిధంగా దిగువస్థాయి సిబ్బందిని దుర్భాషలాడడంతో.. అతడి గురించి దేవస్థానం అధికారులు అప్పట్లో ఆరా తీశారు. అతడు ఐఆర్ఎస్ అధికారి కాదని నిర్ధారించుకున్నారు. ఇప్పుడు వెంటనే అప్రమత్తమయ్యారు. నిందితుడిని అదుపులోకి తీసుకుని.. వన్టౌన్ పోలీసుస్టేషనుకు తరలించారు. అతడిని పోలీసులు ప్రశ్నించడంతో అసలు విషయం బయటపడింది. దుర్గగుడి అధికారుల నుంచి లిఖితపూర్వక ఫిర్యాదు స్వీకరించిన తర్వాత పూర్తి స్థాయి విచారణ చేస్తామంటున్నారు పోలీసులు.
|
|