పార్టీలకు విరాళాలు ఇచ్చిన కంపెనీలపై ఈడీ, సీబీఐ, ఐటీ దాడులు.. ఆస్తులు కూడా అటాచ్

 కేంద్ర ప్రభుత్వం తీసుకువచ్చిన ఎలక్టోరల్ బాండ్స్ పథకం కింద వ్యక్తులు, కంపెనీలు రాజకీయ పార్టీలకు విరాళాలు అందించే అవకాశం కల్పించింది. ఈ నేపథ్యంలోనే ఆ వివరాలు వెల్లడించకుండా రహస్యంగా ఉంచింది. అయితే సుప్రీంకోర్టు తాజాగా ఇచ్చిన ఆదేశాలతో ఆ వివరాలన్నీ బహిర్గతం అయ్యాయి. అయితే రాజకీయ పార్టీలకు విరాళాలు అందించిన చాలా కంపెనీలపై కేంద్ర దర్యాప్తు సంస్థలైన సెంట్రల్ బ్యూరో ఆఫ్ ఇన్వెస్టిగేషన్-సీబీఐ, ఎన్‌ఫోర్స్‌మెంట్ డైరెక్టరేట్-ఈడీ, ఇన్‌కమ్ ట్యాక్స్-ఐటీలు ఇప్పటికే దాడులు చేశాయి. అంతేకాకుండా కొన్ని కంపెనీలకు సంబంధించిన ఆస్తులను కూడా అటాచ్ చేశాయి. ఈ నేపథ్యంలో ఆ కంపెనీలు రాజకీయ పార్టీలకు చెందిన ఎలక్టోరల్ బాండ్లను భారీగా కొనుగోలు చేసి విరాళాలు అందించడం ప్రస్తుతం తీవ్ర చర్చనీయాంశంగా మారింది.

రాజకీయ పార్టీలకు విరాళాల అంశం కూడా ఆయా సంస్థలపై దాడులు, దర్యాప్తు తీవ్రతను ప్రభావితం చేసినట్లు తెలుస్తోంది. పార్టీలకు చెందిన ఎలక్టోరల్ బాండ్లను ఎక్కువగా కొనుగోలు చేసిన 30 కంపెనీలలో 15 కంపెనీలపై ఐటీ, ఈడీ, సీబీఐ దాడులు నిర్వహించి కేసులు నమోదు చేశాయి. ఇప్పటికీ కొన్ని కంపెనీలపై కేసులు నడుస్తూనే ఉన్నాయి. ఈ క్రమంలోనే కొన్ని కంపెనీల్లో ఆస్తులను కూడా దర్యాప్తు సంస్థలు అటాచ్ చేసుకున్నాయి. ఈ క్రమంలోనే తాజాగా రాజకీయ పార్టీలకు ఆ కంపెనీలు ఇచ్చిన విరాళాల విషయం బయటికి వస్తుండటంతో ఆ సంస్థల్లో మరోసారి భయం రేకెత్తుతోంది. ఇక ఇప్పటివరకు దాడులు జరగని, కేసులు నమోదు కాని కంపెనీలు కూడా భయపడుతున్నాయి.

కేంద్ర ఎన్నికల కమిషన్‌కు ఎస్‌బీఐ అందజేసిన ఎలక్టోరల్ బాండ్ల సమాచారం ప్రకారం వాటిని కొనుగోలు చేసిన టాప్‌ కంపెనీల్లో సగానికి పైగా ఏజెన్సీల దర్యాప్తును ఎదుర్కొంటున్నాయని తెలుస్తోంది. అత్యధికంగా రూ.1300 కోట్లకు పైగా ఎలక్టోరల్ బాండ్లు కొనుగోలు చేసిన ఫ్యూచర్ గేమింగ్ అండ్ హోటల్ సర్వీసెస్ పైనా కేంద్ర దర్యాప్తు సంస్థలు కేసులు పెట్టాయి. అంతే కాకుండా మేఘా ఇంజినీరింగ్ అండ్ ఇన్‌ఫ్రాస్ట్రక్చర్ లిమిటెడ్, వేదాంత లిమిటెడ్, హల్దియా ఎనర్జీ లిమిటెడ్, యశోద సూపర్ స్పెషాలిటీ హాస్పిటల్, జిందాల్ స్టీల్ అండ్ పవర్ లిమిటెడ్, డీఎల్‌ఎఫ్‌ కమర్షియల్ డెవలపర్స్ లిమిటెడ్, చెన్నై గ్రీన్‌వుడ్స్ ప్రైవేట్‌ లిమిటెడ్‌, డాక్టర్ రెడ్డీస్ లేబొరేటరీస్ లిమిటెడ్, ఎన్‌సీసీ లిమిటెడ్, ఐఎఫ్‌బీ ఆగ్రో లిమిటెడ్, దివీస్‌ లేబొరేటరీ లిమిటెడ్, అరబిందో ఫార్మా, యునైటెడ్ ఫాస్ఫరస్ ఇండియా లిమిటెడ్ వంటి సంస్థలు ఇప్పటికే సీబీఐ, ఈడీ, ఐటీ దర్యాప్తులున్న జాబితాలో ఉన్నాయి.