పదేళ్ల తర్వాత ఒకే వేదిక పైకి మోదీ, చంద్రబాబు, పవన్‌.. ‘ప్రజాగళం’ సభకు భారీ ఏర్పాట్లు

ప్రజాగళం పేరుతో టీడీపీ-జనసేన-బీజేపీ కూటమి చిలకలూరిపేట సమీపంలోని బొప్పూడి వద్ద ఆదివారం భారీ ఎత్తున్న బహిరంగ సభ నిర్వహిస్తోంది. పదేళ్ల తర్వాత ప్రధాని నరేంద్ర మోదీ, టీడీపీ అధినేత చంద్రబాబు నాయుడు, జనసేన అధ్యక్షుడు పవన్‌ కళ్యాణ్‌ ఒకే వేదికపైకి వస్తున్నారు. అధికార వైఎస్సార్సీపీని గద్దె దింపేందుకు ఈ వేదికగా శంఖారావం పూరించనున్నారు. మూడు పార్టీల మధ్య పొత్తు ఖరారైన తర్వాత కూటమి తొలిసారి నిర్వహిస్తున్న సభ కావడంతో కనీవినీ ఎరుగని రీతిలో అత్యంత భారీగా నిర్వహించేందుకు ఏర్పాట్లు చేశారు. వైఎస్ఆర్సీపీ సిద్ధం సభలను మరిపించేలా ఈ ‘ప్రజాగళం’ నిర్వహించేందుకు విస్తృత ఏర్పాట్లు జరిగాయి. ఈ సభకు కనీసం 10 లక్షల మంది వస్తారని అంచనా.

‘ప్రజాగళం’ ద్వారా మూడు పార్టీల అగ్రనేతలు రాష్ట్ర ప్రజలకు బలమైన సందేశాన్ని పంపనున్నారు. ఐదేళ్ల జగన్ పాలనలో రాష్ట్రానికి ఎలాంటి నష్టం జరిగిందో వివరిస్తూ, కేంద్రంలో ఎన్‌డీఏ, రాష్ట్రంలో కూటమి అధికారంలోకి వస్తే జరిగే మేలును వివరించనున్నారు. ఎన్టీఆర్‌, వాజ్‌పేయీ హయాం నుంచి టీడీపీ, బీజేపీ మధ్య పొత్తు కొనసాగుతున్నా మధ్యలో కొన్నాళ్లు దూరంగా ఉన్నాయి. 2014లో రాష్ట్ర విభజన తర్వాత ఇరు పార్టీలు మళ్లీ కలిశాయి. ఆ ఎన్నికల్లో ఈ రెండు పార్టీలతో జనసేన కూడా కలిసింది.

అప్పట్లో గుంటూరులో జరిగిన సభలో మోదీ, చంద్రబాబు, పవన్‌ ఒకే వేదికపై ప్రచారంలో పాల్గొన్నారు. మళ్లీ పదేళ్ల తర్వాత ముగ్గురూ ఒకే వేదికను పంచుకోబోతున్నారు. ప్రధాని సహా ముఖ్యనేతలంతా కూర్చునేందుకు ప్రధాన వేదికను, సాంస్కృతిక కార్యక్రమాలకు మరో చిన్న వేదికను ఏర్పాటు చేశారు. ప్రధాన వేదికపై ఆశీనులయ్యేందుకు ప్రధాని మోదీ, చంద్రబాబు, పవన్‌ కళ్యాణ్‌తో పాటు మరో 27 మందికి అనుమతిచ్చారు. ఈ సభకు రాష్ట్రం నలుమూలల నుంచి కార్యకర్తలు, ప్రజలు తరలిరానున్నారు. సాయంత్రం 5.20 గంటలకు సభా ప్రాంగణానికి చేరుకునే ప్రధాని.. 6.15 గంటల వరకు ఉంటారు. జాతీయ రహదారిపైనే ప్రధాని మోదీ విమానం ల్యాండింగ్ అయ్యేందుకు ఏర్పాట్లు చేశారు. ఇక, పార్కింగ్‌తో కలిపి 300 ఎకరాల విస్తీర్ణంలో సభను నిర్వహిస్తున్నారు. సభలో కార్యకర్తలు, ప్రజలు కూర్చునేందుకు 24 గ్యాలరీలు, 20 భారీ ఎల్‌ఈడీ స్క్రీన్లు ఉంచారు.